Read new_tumbuka_bible Yeremiya 20 Bible Online

Yeremiya 20 - new_tumbuka_bible bible

Yeremiya 20

¹Pashuru mwana wa Imere wakaŵa musofi ndipo wakaŵa murara mu Nyumba ya FUMU. Iyo wakapulika kuti Yeremiya ndiyo wakuchima vinthu ivi.

²Pashuru wakalangula kuti ŵanthu ŵatimbe Yeremiya na kumukaka malundi na magwede na kumuŵika mu gadi pa chipata cha kunena cha Benjamini cha Nyumba ya FUMU.

³Na machero ghakhe, apo Pashuru wakamusutula Yeremiya ku magwede, Yeremiya wakati kwa iyo, “FUMU kuti yikukuchema zina lakuti Pashuru chara kweni lakuti ‘Chofyo kufuma kosekose’.

⁴Pakuti FUMU yikuti, ‘Nditi ndikwimike kuŵa chofyo kwa iwe wamwene na ku ŵabwezi ŵako. Ŵizamkukomeka na lupanga lwa ŵarwani ŵako, iwe ukuwona. Ndipo ŵanthu wose ŵa charu cha Yuda, nditi ndiŵapereke mu mawoko gha karonga wa charu cha Babuloni. Ŵanji wati waŵakore umikori na kuruta nawo ku charu cha Babuloni ndipo ŵanyakhe wamkuŵakoma na lupanga.

⁵Usambazi wose wa mu msumba uwu, mphango zakhe zose, vyakuzirwa vyakhe vyose, na vyuma vyose vya ŵakaronga ŵa mu charu cha Yuda, nditi ndipereke ku ŵarwani ŵawo. Iwo ŵizamkuskogha vyose ivi na kuruta navyo ku charu cha Babuloni.

⁶Ndipo iwe Pashuru, na wose wa mbumba yako, mwizamkukoreka umikori na kuruta namwe ku charu cha Babuloni. Iwe pamoza na ŵakutemweka ŵako awo ukaŵachimiranga vya utesi mwamkufwira kwenekura na kusungika kwenekuko.’ ”

⁷Mwe FUMU mwandipusika ndipo ndapusikika nadi. Imwe muli na nkhongono kuruska ine, ndipo mwanditonda nadi. Munthu yose wakundiseka, ndili waka chimuhoyere nyengo zose.

⁸Para nkhuyowoya, nkhulira na kulira wuwo, nkhuchemerezga kuti, “Kuli chivulupi na pharaniko!” Pakuti mazgu gha imwe, Mwe FUMU, ghandizgora chisunjizgo na chimuhoyere zuŵa lose.

⁹Kweni usange nkhuti, “Ine kuti ndimuzunurenge chara, nesi kupharazga mu zina lakhe,” mazgu ghakhe mu mtima wane, ghakocha nga ndi moto, weneuwo wajalirika mu viwangwa vyane. Kweni vyalema kuwusungilira mukati, nadi kuti ndingawusungilira chara.

¹⁰Nkhupulika ŵanandi ŵakuphwepwerezgana. Vinthu vyakofya vili posepose. Ŵabwezi ŵane ŵenecho, ŵakulindirira kuti ndiwe pasi, ŵakuti, “Muchombolani! Tiyeni timuchombole! Panji wati wapusikikenge. Ntheura ise tizamkumutonda, na kuwezgera nduzga pa iyo.”

¹¹Kweni FUMU yili nane, yili nga nchinkhara cha nkhongono, awo ŵakundizikizga ŵati ŵakhuŵare, kuti ŵati ŵanditonde chara. Nadi ŵati ŵakhozgeke soni, chifukwa ŵati ŵatondeke. Kukhozgeka soni kwawo, kuti kuruwikenge muyirayira chara.

¹²Kweni imwe, Mwe FUMU Mwenenkhongono zose, mukweruzga mu urunji, mukusanda mtima na maghanoghano gha munthu. Mundirongore kuti mwawezgera nduzga, chifukwa mrandu wane ndili kuwupereka kwa imwe.

¹³Yimbirani FUMU! Rumbaninge FUMU! Pakuti ndiyo yikuthaska umoyo wa ŵakutindiŵizgika, ku nkhongono za ŵanthu ŵaheni.

¹⁴Litembeke zuŵa ilo nkhababikira! Zuŵa ilo amama ŵakandibabira lireke kutumbikika!

¹⁵Watembeke uyo wakaŵaphalira ŵadada mazgu ghakuŵakondweska ghakuti, “Mwana mwanarume wababika kwa imwe.”

¹⁶Munthu uyo waŵe nga ndi misumba, iyo FUMU yili kubwangandula kwambula kuŵa na chiwuravi. Wapulike kulira kwa ŵanthu na mulenje, ndiposo na nchenjezgo ya nkhondo na muhanya pakati.

¹⁷Pakuti wakareka kundikoma ndichali ndindababike, ndipo amama mphanyi ŵakaŵa dindi lane, ndipo nthumbo yawo yaŵa yakulirakulira kwa muyirayira.

¹⁸Kasi ine nkhababikirachi? Kasi nkhababika kuti ndiŵe na visuzgo na chitima, kuti ndiŵe wakulengeskeka pera mu umoyo wane?