Read new_tumbuka_bible Yeremiya 21 Bible Online

Yeremiya 21 - new_tumbuka_bible bible

Yeremiya 21

¹Mazgu gha FUMU ghakiza kwa Yeremiya para Karonga Zedekiya wakamutumira Pashuru, mwana wa Malikiya, ndiposo na musofi Zefaniya, mwana wa Maaseya. Iwo ŵakati:

²“Utifumbire kwa FUMU, pakuti Nebukadinezara, karonga wa charu cha Babuloni wakunozgekera kwiza na nkhondo kwa ise. Panyakhe FUMU yingatichitira vinthu kwakuyana na vyakuzizwiska vyakhe vyose, ndipo Nebukadinezara wafumeko kwa ise.”

³Sono Yeremiya wakaŵazgora wakati, “Mukamuphalire Zedekiya kuti,

⁴‘FUMU, Chiuta wa Israele wakuti: Nditi ndimupokani mahomwa gha nkhondo agho mukurwera nagho karonga wa charu cha Babuloni na ŵasilikari ŵakhe ŵeneawo ŵamuzingirizgani kuwaro kwa malinga ghinu. Ndipo nditi ndighawunjike pamoza mukati mu msumba uwu.

⁵Ine ndekha ndamkurwa namwe nkhondo na woko lane lankhongono, mu ukari, mu kutukutwa na mu kucheruka kukuru.

⁶Ndizamkukoma vyose ivyo vikukhara mu msumba weneuwu, ŵanthu na vinyama wuwo, ndipo vyose vizamkufwa na nthenda yakofya.’

⁷FUMU yikuti, ‘Pamanyuma pa vyeneivi ndizamkumupereka Zedekiya, karonga wa charu cha Yuda, nduna zakhe ndiposo na ŵanthu ŵa mu msumba uwu ŵeneawo ŵamkuponapo ku nthenda yakofya, ku nkhondo ndiposo na ku njara, kwa Nebukadinezara, karonga wa ku Babuloni, ku ŵarwani ŵawo awo ŵakukhumba umoyo wawo. Nebukadinezara wizamkuŵakoma na lupanga. Kuti wizamkuŵa na lusungu na iwo chara, nesi kuŵa na chitima na iwo, panji kuŵa nawo na chiwuravi.’ ”

⁸FUMU yikarutilira yikati, “Ŵanthu aŵa uŵaphalire uti: FUMU yikuti musankhepo pakati pa nthowa yakuya ku umoyo na yakuya ku nyifwa.

⁹Uyo wati wakharenge mu msumba uwu, wafwenge na nkhondo, na njara ndiposo na nthenda yakofya. Kweni uyo wati wafumire kuya kajipereka ku ŵaBabuloni, awo ŵamuzingirizgani, wati waŵenge wa moyo, ndipo umoyo wakhe uŵenge nga ndi chakuskogha ku nkhondo.

¹⁰FUMU yikuti, ‘Ine ndaghanaghana kwimikana na msumba uwu kuwuchitira chiheni, chiweme chara. Uti uperekekenge kwa karonga wa ku Babuloni, uyo wizamkuwuwocha na moto.’ ”

¹¹“Ku ŵakaronga ŵa charu cha Yuda uŵaphalire kuti, ‘Pulikani mazgu gha FUMU.

¹²Imwe ŵa mu mbumba ya Davide, FUMU yikuti: Mweruzgenge mwa kunyoroka mulenje uliwose. Munthu uyo ŵamwibira katundu, mumuthaskenge ku woko la munthu wankhaza, mzire ukari wane ugolere nga ndi moto, kwambula na yumoza wakuwuzimya, chifukwa cha machitiro ghinu ghaheni.’ ”

¹³“Nkhwimikana namwe, imwe mukukhara mu madambo, mu majarawe gha mu charu chakuwa.” Ntheura ndimo FUMU yikuyowoyera. “Imwe mukuti, ‘Kasi ndi njani wangiza, kuti warwe nase nkhondo? Kasi ndi njani wanganjira mu malinga ghithu?’ ” Ntheura ndimo FUMU yikuyowoyera.

¹⁴“Nditi ndimulangani, kwakuyana na vipambi vya milimo yinu. Nditi ndibuske moto ku michiko ya mathabwa mu nyumba yinu ya ufumu, ndipo wochenge vyose ivyo vili kumuzingirizgani.” Ntheura ndimo FUMU yikuyowoyera.