Read new_tumbuka_bible Yeremiya 22 Bible Online

Yeremiya 22 - new_tumbuka_bible bible

Yeremiya 22

¹FUMU yikuti, “Ruta ku nyumba ya ufumu ya charu cha Yuda, ndipo kwenekura ukayowoye mazgu agha:

²Pulika mazgu gha FUMU, iwe karonga wa charu cha Yuda, wamweneiwe ukukhara pa chizumbe cha Davide, iwe pamoza na nduna zako, ndiposo na ŵanthu ŵako ŵa mu Yerusalemu awo ŵakunjira pa vipata ivi.

³Weruzgenge mwakunyoroka na mu urunji. Munthu uyo waskogheka umuthaske kwa uyo wakumutindiŵizgira pasi. Ureke kuchita chiheni panji chivulupi kwa mulendo, mulanda panji chokoro. Ureke kukoma munthu wambula mrandu mu malo agha.

⁴Pakuti usange nadi uti upulikire mazgu agha, ŵakaronga awo ŵakuhara chizumbe cha Davide, ŵamkwiza pakwendera pa vipata vya nyumba iyi, uku ŵakwera mu magareta na pa mahachi, iwo pamoza na nduna zawo, ndiposo na ŵanthu ŵawo.

⁵Kweni usange ukureka kupulikira mazgu agha, nkhujirapizga nadi kuti nyumba iyi yizamkuzgoka mahami.”

⁶FUMU yikuti pa vya nyumba ya ufumu ya karonga wa charu cha Yuda: Iwe uli wakutowa nga ndi Gileyadi kwa ine, uli pachanya nga ndi mapiri gha Lebanoni. Ndipouli nditi ndikuzgore kuŵa mapopa msumba wambula kukharamo ŵanthu.

⁷Nditi ndikutumire ŵanthu kwiza kakubwangandula, waliyose uku wayegha mahomwa. Ŵizamkudumulira pasi milanje yako yakutowa, na kuyiponya mu moto.

⁸“Ŵanthu kufuma ku mafuko ghanandi ŵizamkujumpha pa msumba uwu ndipo ŵizamkufumbananga kuti, ‘Kasi nchifukwa uli FUMU yili kuchita chinthu cha ntheura ku msumba ukuru uwu?’

⁹Ndipo ŵizamkuzgora kuti, ‘nchifukwa chakuti ŵanthu ŵali kusida phangano la FUMU, Chiuta wawo ndipo wakasopa na kuteŵetera ŵachiuta ŵanyakhe.’ ”

¹⁰Mureke kumulirira karonga uyo wafwa, nanga nkhumutengerera. Kweni mulirirani chomene uyo wakuruta ku umikori, pakuti wamkuweraso chara, kwiza kawona charu icho wakababiwirako.

¹¹Pakuti FUMU yikuti pa vya Shalumu,[5] mwana wa Yosiya, karonga wa charu cha Yuda mweneuyo wakawusa mu malo gha wiske, kweni wakafumapo pa malo agha, “Iyo kuti wamkuwereraso kuno chara.

¹²Wamkufwira ku umikori kweneuko ŵakamutorera. Charu ichi kuti wizamkuchiwonaso chara.”

¹³Soka kwa uyo wakuzenga nyumba yakhe, kwambula kuchitira mu urunji, wakuzenga vipinda vyakhe vya pachanya mu upusikizgi. Iyo wakuteŵeteska ŵanthu ŵanyakhe kwambula kuŵalipira.

¹⁴Soka kwa uyo wakuti, “Nditi ndijizengere nyumba yikuru, na vipinda vya pachanya visani. Ndizamkuŵikamo vidangazi visani, ndizamkukhomamo mathabwa gha milanje, na kughaphaka utoto uchesamu.”

¹⁵Kasi ukujipima kuti ndiwe karonga, chifukwa cha chipharizgano chakuzenga nyumba za makuni gha milanje? Asi ŵawuso ŵakaryanga na kumwa, na kweruzga mwakunyoroka na mu urunji? Ndicho chifukwa vinthu vikaŵaŵiranga makora.

¹⁶Ŵakavu na ŵasokwano ŵakaŵavikirira makora mirandu yawo, ntheura vyose vikaŵaŵira makora. Asi ivi vikurongora kuti ŵakandimanya ine? Ntheura ndimo FUMU yikuyowoyera.

¹⁷Kweni maso na mtima wako, vili pakupanga chandulo mu upusikizgi pera. Vili pakukoma ŵanthu ŵambula kwananga, pakuŵayuzga na kuŵachitira nkhaza.

¹⁸FUMU yikuti, pa vya Yehoyiyakimu mwana wa Yosiya, karonga wa charu cha Yuda, “Kuti ŵizamkumutengerera iyo chara pakuyowoya kuti, ‘Mbaya mwe, mwana wa kwithu!’ ‘Mbaya mwe, mudumbu wane!’ Kuti ŵizamkumutengerera iyo chara pakuyowoya kuti, ‘Mbaya mwe, sekuru wane!’ ‘Mbaya mwe, munthu wakuchindikika!’

¹⁹Wizamkusungika nga ndi mbunda, ŵizamkumuguguza na kumutaya kuwaro, kwa vipata vya Yerusalemu.”

²⁰“Kwerera ku Lebanoni ukachemerezge, ukatumphuskire mazgu ghako mu charu cha Bashani. Ukachemerezge pa Phiri la Abarimu, pakuti ŵakutemweka ŵako wose ŵamara petu.

²¹Nkhakuchenjezga para ukaŵa mu mutende, kweni iwe ukati, ‘Ndipulikenge chara?’ Aka kaŵa kaluso kako kufuma ku wanichi wako, kuti ukupulikira mazgu ghane chara.

²²Mphepo yiti yiŵawuruskire kutali ŵarongozgi ŵako wose, ndipo ŵakutemweka ŵako ŵati ŵarute ku umikori. Penepapo wizamkukhozgeka soni na kulengeskeka, chifukwa cha zakwananga zako zinandinandi.

²³Iwe, ukukhara mu nguyi ya Lebanoni, wamwene iwe wazenga chivimbo pakati pa makuni gha milanje. Asi kuŵinya kuti kukukore, nga ndi ŵanakazi pa nyengo ya kubaba?”

²⁴FUMU yikuti, “Nkhurapa nadi, kuti iwe Yehoyakini, mwana wa Yehoyiyakimu, karonga wa charu cha Yuda, nangauli uli mphete ku woko lane la maryero, ndipouli nditi ndikufumyepo ndipera.

²⁵Nditi ndikupereke mu mawoko gha awo ŵakukhumba umoyo wako, awo iwe ukuŵawopa. Ndikuperekengeso kwa Nebukadinezara, karonga wa ku Babuloni na ku ŵasilikari.

²⁶Iwe pamoza na ŵanyoko ŵakukubaba nditi ndimuponyani ku charu chinyakhe, uko kuti ukababikirako chara ndipo kwenekura ndiko mwamkufwira mose mwa ŵaŵiri wuwo.

²⁷Kuti mwamkuwereraso chara ku charu icho mwizamkunwekera kuwererako.”

²⁸Ntheura ine nkhati, “Asi Yehoyakini uyu ngwa kuyuyurika, chiŵiya chakusweka, chisero icho na yumoza wakuchipwererera? Kasi nchifukwa uli iyo na ŵana ŵakhe, ŵafumiskika na kutayika kuwaro ku charu icho ŵakuchimanya chara?”

²⁹Okwe iwe charu! Iwe charu! Iwe charu, pulika mazgu gha FUMU!

³⁰FUMU yikuti, “Munthu wa ntheura mumulembe nga ndi chumba, munthu uyo kuti wachitengepo kaweme chara mu umoyo wakhe. Pakuti palije na yumoza wa mphapu yakhe, uyo wizamkuchita makora, palije na yumoza uyo wizamkuhara chizumbe cha Davide, na kwiza kachiwusaso charu cha Yuda.”