Read new_tumbuka_bible Yeremiya 23 Bible Online

Yeremiya 23 - new_tumbuka_bible bible

Yeremiya 23

¹FUMU yikuti, “Soka ku ŵarongozgi awo ŵakukoma na kumbininiska ŵanthu ŵane nga ndi muliska pamberere za mu luhari lwane.”

²Ntheura FUMU, Chiuta wa Israele wakuti pa vya ŵarongozgi awo ŵakuwusa ŵanthu ŵane, “Chifukwa chakuti mwambininiska mberere zane na kuzichimbizgira kutali, kureka kuzipwererera, nditi ndimulangani chifukwa cha chiheni icho mwachita.

³Pamanyuma ndizamkuwunganya mberere izo zakharako kufumira mu vyaru vyose umo ndili kuzichimbizgira. Ndizamkuziwezgeraso mu chitupa chawo, ndipo ziti zibabanenge na kwandana.

⁴Ndizamkuŵapa ŵarongozgi awo ŵizamkuŵapwererera. Ŵizamkuwopa chara nanga nkhuthika lusoko, ndipo pamkuŵavye nanga njumoza wakutayikapo.” Ntheura ndimo FUMU yikuyowoyera.

⁵FUMU yikuti, “Mazuŵa ghakwiza, apo nditi ndimuwuskire Davide mphapu ya urunji, karonga uyo wizamkuwusa mwa mahara, uyo wizamkweruzga mwakunyoroka na mu urunji mu charu.

⁶Mu mazuŵa ghakhe ŵaYuda ŵizamkuponoskeka, ŵaIsraele ŵizamkukhara mu mutende. Ŵizamkuchemeka na zina lakuti, ‘FUMU ndiyo urunji withu.’ ”

⁷FUMU yikuti, “Ntheura, wonani, mazuŵa ghakwiza apo ŵanthu ŵamkuyowoya chara kuti, ‘Nkhurapira mwa FUMU iyo yikafumya ŵaIsraele mu charu cha Eguputo’

⁸Kweni ŵizamkuti, ‘Nkhurapira mwa FUMU iyo yikafumya na kurongozga mbumba ya Israele kufuma ku mpoto na ku vyaru vyose uko yikaŵachimbizgira.’ Penepapo ŵizamkukhara mu charu chawo na chawo.”

⁹Pakuyowoya vya nchimi, mtima wane wasweka, viwangwa vyane vyasoghoyeka. Ine ndili nga ndi munthu uyo waloŵera, nga ndi uyo watimbanizgika na vinyo, chifukwa cha FUMU, ndiposo chifukwa cha mazgu ghakhe ghakupatulika.

¹⁰Charu chazura na ŵanthu ŵambula kugomezgeka. Charu chikutengera chifukwa cha nthembo, maluhari gha ku mapopa ghomira. Umoyo uwo ŵakwendamo nguheni, ndipo nkhongono zawo kuti nzakunyoroka chara.

¹¹“Nchimi na ŵasofi mbakukazuzgika. Nanga ndi mu nyumba yane nkhuwusanga ubendezi wawo.” Ntheura ndimo FUMU yikuyowoyera.

¹²“Ntheura nthowa zawo zizamkuteremuka, ŵizamkuchimbizgikira ku mdima, ndipo kweneuko ndiko ŵamkuŵa. Ndizamkuŵachitira chinthu chiheni, pa nyengo iyo ŵizamkulangikira.” Ntheura ndimo FUMU yikuyowoyera.

¹³Mu nchimi za ku Samariya, nkhawonamo chinthu cha wakawaka ichi: Zikachimiranga mu zina la Baala, ntheura zikapuruska ŵanthu ŵane ŵaIsraele.

¹⁴Mu nchimi ku Yerusalemu, nkhawonamo chinthu chakuseruska ichi: Ŵakaŵa ŵambula kugomezgeka kwa ine na kuyowoya utesi, ŵakarumbanga awo ŵakachitanga viheni, mwakuti palije na yumoza uyo wakureka ubendezi wakhe. Kwa ine wose ŵali nga Sodomu, awo ŵakukhara mu Yerusalemu ŵali nga Gomora.

¹⁵Ntheura vya nchimi FUMU Mwenenkhongono zose yikuti, “Nditi ndiŵaryeske khuni la mulangali, na kuŵapa maji ghakukoma kuti ŵamwe. Pakuti mu nchimi za ku Yerusalemu, ndimo mwafumira uheni uwo watandazgika mu charu chose.”

¹⁶FUMU Mwenenkhongono zose yikuti, “Mureke kupulikira ivyo nchimi zikuyowoya kwa imwe, Zinchimi izi zikumuzuzgani na vigomezgo vya utesi. Ŵakuyowoya mboniwoni za maghanoghano ghawo waka, ivyo ŵakuyowoya kuti vikufuma kwa FUMU chara.

¹⁷Kaŵirikaŵiri zikuyowoya kwa awo ŵakuyuyura mazgu gha FUMU kuti, ‘Vinthu viŵenge makora kwa imwe.’ Ndipo kwa awo ŵakurondezga unonono wa mitima yawo zikuti, ‘Kulije kaheni kalikose ako kati kamuwirani.’ ”

¹⁸“Ndi njani pa nchimi zira uyo wali kuŵapo mu ungano wa FUMU, kuti wamanyiske na kupulika mazgu ghakhe? Kasi ndi uyo wali kutegherezga panji kupulikiska mazgu ghakhe?

¹⁹Wonani, chimphupuru cha FUMU, chiti chiphulike mu ukari. Uyu ndi kavuruvuru wakofya, uyo wakwiza pa mitu ya ŵabendezi.

²⁰Ukari wakofya wa FUMU kuti wizamkufumapo chara, yisuke yichite na kufiska, icho chikaŵa mu mtima wakhe. Mu mazuŵa agho ghakwiza, mwizamkuchimanyiska ichi.”

²¹FUMU yikuti, “Ine kuti nkhazituma nchimi izi chara, ndipouli zikachimbira uku na uku na uthenga wawo. Ine kuti nkhaziyowoyera chara, ndipouli izo zikachimanga ndipera.

²²Kweni ziŵengepo pa ungano wane, mphanyi zikapharazga mazgu ghane ku ŵanthu ŵane. Nadi mphanyi zikaŵawezgako ku nthowa zawo ziheni, na ku machitiro ghawo ghaheni.”

²³FUMU yikuti, “Kasi ndine Chiuta para ndili pafupi pera, ndipo para ndili kutali kasi ndili Chiuta chara?”

²⁴FUMU yikuti, “Kasi munthu wangabisama mu malo gha ku udesi, kuti ine ndingareka kumuwona? Asi ine ndili posepose, kuchanya na pasi?”

²⁵“Ine ndapulika ivyo nchimi izi zikuyowoya zeneizo zikuchima vinthu vya utesi mu zina lane. Izo zikuti, ‘Ndalota, ndalota!’

²⁶Kasi vya ntheura viŵenge mu mitima ya nchimi zitesi izi mpaka pauli? Izo zikuchima waka upusikizgi wa mu mitima yawo.

²⁷Izo zikughanaghana kuti ŵanthu ŵane ŵandiruwenge pakupulika maloto agho zikuphalirana yumoza na munyakhe, nga ndi umo ŵawiskewokuru ŵakaruwira zina lane pakusopa Baala.

²⁸Usange nchimi yalota, yirongosore maloto ghakhe. Kweni uyo wali na mazgu ghane, wapharazge mazgu ghane mwakugomezgeka. Kasi gaga wakukozgana na tirigu?” Ntheura ndimo FUMU yikuyowoyera.

²⁹FUMU yikuti, “Asi mazgu ghane ghali nga ndi moto? Asi mazgu ghane ghali nga ndi nyondo iyo yikuswa jarawe tuchokotuchoko?”

³⁰Ntheura FUMU yikuti, “Ndicho chifukwa nkhwimikana na nchimi izo zikwibirana mazgu na kupharazga nga ndi mazgu ghane.”

³¹FUMU yikuti, “Nkhwimikana na nchimi izo zikuyowoya waka mazgu ghawo na kuyowoya kuti, ‘Ntheura ndimo FUMU yikuyowoyera.’ ”

³²FUMU yikuti, “Nadi, nkhwimikana na nchimi izo zikuchima maloto gha utesi. Zikuŵaphalira ŵanthu ŵane maloto ghawo na kuŵapuruska na mautesi ghawo kwambula kupwererera. Ine kuti nkhaŵatuma chara, nesi kuŵalangulira. Ntheura maloto agho kuti ghali na chandulo pa ŵanthu aŵa na pachoko pose chara.”

³³FUMU yikuti, “Para nchimi, panji musofi, panji waliyose wakwiza kwa iwe na kukufumba kuti, ‘Kasi FUMU yili na uchimi uli uwo yakuzotofya nawo?’ Iwe umuphalire kuti, ‘FUMU yikuti: Iwe ndiwe uchimi wakuzotofya kwa FUMU. Ndipo ine nditi ndimufumyenge.’

³⁴Kweni usange nchimi, panji musofi, panji yumoza wa ŵanthu, yose wakuti, ‘Uwu ndi uchimi waka wa FUMU.’ Munthu uyo nditi ndimulangenge na nyumba yakhe yose.

³⁵Icho munthu waliyose wakuyowoya ku muzengezgani wakhe panji kwa mubali wakhe ndi chakuti, ‘Kasi FUMU yazgorachi,’ panji, ‘Kasi FUMU yayowoyachi?’

³⁶Kweni murekerethu kuyowoya kuti, ‘Uwu ndi uchimi wakuzotofya wa FUMU,’ pakuti uchimi wakuzotofya wa munthu waliyose ndi mazgu ghakhe na ghakhe. Imwe ndimwe mukubendezga mazgu gha Chiuta wamoyo, FUMU Mwenenkhongono zose, Chiuta withu.”

³⁷“Sono iwe ufumbe nchimi kuti, ‘Kasi FUMU yakuzgorachi?’ panji kuti, ‘Kasi FUMU yayowoyachi?’

³⁸Kweni yose wa imwe uyo wakuti, ‘Uchimi wa FUMU ndi wakuzotofya,’ ntheura FUMU yikuti: Chifukwa chakuyowoya kuti, ‘Uchimi wa FUMU ndi wakuzotofya’, nangauli FUMU yikuti, ‘Ine nkhamutumirani mazgu kumukanirani kuyowoya ntheura.

³⁹Ntheura wonani, nditi ndimuyeghani nga ndi katundu wakuzotofya na kumuponyani kutali kufuma panthazi pane, imwe pamoza na msumba uwo nkhamupani imwe na ŵasekuru ŵinu.

⁴⁰Nditi nditorere pa imwe chisunjizgo cha mutatakuya na kulengeskeka kwambula kumara, ivyo kuti vyamkuruwika chara.’ ”