Read new_tumbuka_bible Yeremiya 24 Bible Online

Yeremiya 24 - new_tumbuka_bible bible

Yeremiya 24

¹FUMU yikandirongora mboniwoni gha masokora ghaŵiri gha vikuyu agho ghakaŵikika panthazi pa Nyumba ya Chiuta. Ichi chikachitika Nebukadinezara, karonga wa charu cha Babuloni, wati watorera ku umikori Yekoniya, karonga wa charu cha Yuda, mwana wa Yehoyiyakimu, pamoza na nduna zakhe, ŵaŵaji na ŵafuzi, kufuma mu Yerusalemu, kuruta nawo ku Babuloni.

²Mu sokora limoza mukaŵa vikuyu viweme chomene, vyakuyana waka na vikuyu vyakudanga kuphya. Kweni mu sokora linyakhe mukaŵa vikuyu viheni chomene, ivyo munthu kuti wangarya chara.

³FUMU yikandifumba yikati, “Kasi iwe Yeremiya ukuwonachi?” Ine nkhazgora nkhati, “Nkhuwona vikuyu, vikuyu viweme, viweme chomene. Nkhuwonaso vikuyu viheni, viheni chomene, viheni nadi ivyo munthu kuti wangarya chara.”

⁴Penepapo mazgu gha FUMU ghakiza kwa ine ghakati,

⁵“FUMU, Chiuta wa Israele wakuti, ‘Nga ndi vikuyu viweme ivi, ndimo nditi ndiŵapimire ŵamikori kufuma ku charu cha Yuda, awo ndaŵachimbizga kufuma kuno kuruta ku charu cha Babuloni.

⁶Nditi ndiŵalaŵiske na kuŵachitira viweme ndipo ndizamkuŵawezgeraso mu charu chino. Ndizamkuŵazenga, kuti ndizamkuŵabwangandula chara. Ndizamkuŵapanda, kuti ndizamkuŵazgura chara.

⁷Ndizamkuŵapa mtima wakuti ŵamanyenge kuti ine ndine FUMU. Iwo ŵizamkuŵa ŵanthu ŵane ndipo ine ndizamkuŵa Chiuta wawo, pakuti ŵizamkuwerera kwa ine na mtima wawo wose.’ ”

⁸FUMU yikuti, “Nga ndi umo viliri vikuyu viheni, ivyo munthu kuti wangarya chara, ndimo nditi ndimupimire Zedekiya, karonga wa charu cha Yuda na nduna zakhe, awo ŵakharako mu Yerusalemu, ŵeneawo ŵakukhara mu charu ichi, ndiposo na awo ŵakukhara mu charu cha Eguputo.

⁹Ndizamkuŵazgora kuŵa chinthu chakuseruska ku ŵanthu ŵa maufumu ghose gha mu charu cha pasi. Ŵizamkuŵa chisunjizgo na chimuhoyere, ndiposo nthombozgo na nthembo mu malo ghose agho ndizamkuŵachimbizgiramo.

¹⁰Ndizamkuŵatumira nkhondo, njara ndiposo na nthenda yakofya, ŵasuke ŵamare petu mu charu icho nkhapereka kwa iwo na ku ŵawiskewokuru.”