Read new_tumbuka_bible Yeremiya 25 Bible Online

Yeremiya 25 - new_tumbuka_bible bible

Yeremiya 25

¹Mazgu ghakiza kwa nchimi Yeremiya kuphara vya ŵanthu wose ŵa mu charu cha Yuda mu chirimika cha chinayi cha kuwusa kwa Yehoyiyakimu, mwana wa Yosiya, mweneuyo wakaŵa karonga wa charu cha Yuda. Ichi chikaŵa chirimika chakudanga cha kuwusa kwa Nebukadinezara, karonga wa charu cha Babuloni.

²Sono Yeremiya wakati ku ŵaYuda wose, na wose awo ŵakakharanga mu Yerusalemu,

³“Pa virimika 23 kufuma mu chirimika cha 13 cha kuwusa kwa Yosiya, mwana wa Amoni, mweneuyo wakaŵa karonga wa charu cha Yuda, mpaka muhanya uno, mazgu gha FUMU ghizanga kwa ine. Ine ndamuyowoyeraninge kaŵirikaŵiri, kweni kuti mwapulikiranga chara.

⁴Nangauli kaŵirikaŵiri FUMU yamutumiraninge nchimi, ŵateŵeti ŵakhe wose, imwe kuti mwapulikanga, nesi kutegherezga chara.

⁵Nchimi izi zikatenge, ‘Sono werani, yose wa imwe ku nthowa zakhe na machitiro ghakhe ghaheni, mwakuti mukhare mu charu icho FUMU yikamupani, imwe na ŵawiskemwekuru kufuma liro mwaka mpaka muyirayira.

⁶Mureke kurondezga ŵachiuta ŵanyakhe pakuŵateŵetera na kuŵasopa. Mureke kundavyira ku ukari na ivyo mawoko ghinu ghali kupanga. Penepapo ine kuti nditi ndimuchitiraninge chinthu chiheni chara.’ ”

⁷FUMU yikuti, “Ndipouli imwe kuti mukandipulikira chara. Mukandavyira ku ukari na ivyo mawoko ghinu ghali kupanga. Ntheura mukajipweteka mwekha.”

⁸Ntheura FUMU Mwenenkhongono zose yikuti, “Chifukwa chakuti mundapulikire mazgu ghane,

⁹nditi ndimuchemerani mafuko ghose gha ku mpoto pamoza na muteŵeti wane Nebukadinezara, karonga wa charu cha Babuloni. Ndizamkuŵatuma kurwa nkhondo na charu ichi na ŵanthu ŵakhe, ndiposo na mafuko agho ghazingirizga charu ichi. Ndizamkuŵamara petu na kuŵazgora kuŵa chinthu chakuseruska, chakujuma nacho, ndiposo na phasulo kwa muyirayira.

¹⁰Ndizamkumarizga kukondwa na kusekerera kose pakati pawo. Ndizamkukanizgirathu mazgu gha chimwemwe gha mwene-nthengwa na mutengwa. Kwizamkuŵavye kulira kwa malwara ndiposo na ungweru wa nyali.

¹¹Charu chose ichi chizamkuzgoka mahami na mapopa. Mafuko agha ghizamkuteŵetera karonga wa ku Babuloni virimika 70.”

¹²FUMU yikuti, “Para virimika 70 vyamara, ndizamkulanga karonga wa charu cha Babuloni na ŵanthu ŵakhe, chifukwa cha ubendezi wawo. Charu chawo ndizamkuchizgora kuŵa mapopa kwa muyirayira.

¹³Ndizamkufiska mazgu ghose agho ndili kuyowoya vya charu ichi, vyose ivyo vili kulembeka mu buku ili, ivyo nchimi Yeremiya wakachima vyakukhwaska mafuko ghose agha.

¹⁴Pakuti mafuko ghanandi na ŵakaronga ŵankhongono ŵizamkuŵazgora iwo kuŵa ŵazga ŵawo. Ine ndizamkuŵawezgera nduzga kwakuyana na ivyo ŵakachita ndiposo na milimo ya mawoko ghawo.” Ntheura ndimo FUMU yikuyowoyera.

¹⁵FUMU, Chiuta wa Israele wakati kwa ine, “Tora nkhombo iyi yakuzura na ukari wane mu woko lane, ndipo ukamweske mafuko ghose gha ŵanthu iyo nditi ndikutume.

¹⁶Para ŵamwa, ŵamkwenda penthyapenthya ndipo ŵazerezekenge chifukwa cha nkhondo iyo nditi nditume mukati mwawo.”

¹⁷Ntheura nkhatora nkhombo yira ku woko la FUMU, ndipo nkhayakamweska mafuko ghose agho FUMU yikanditumako.

¹⁸Yikandituma ku Yerusalemu, ku misumba ya charu cha Yuda, kwa ŵakaronga ŵakhe na kwa nduna zakhe, kuti ndiŵazgore kuŵa phasulo, chinthu chakuzukumiska, cha kujuma nacho, na nthembo nga ndi umo kuliri sono.

¹⁹Yikandituma kwa Faro, karonga wa ku Eguputo, ku nduna zakhe, ku ŵateŵeti ŵakhe na ku ŵanthu ŵakhe wose,

²⁰ku ŵalendo wose awo ŵakaŵa pakati pawo, ku ŵakaronga wose ŵa mu charu cha Uzi, ku ŵakaronga wose ŵa mu charu cha ŵaFilisiti, ndiko kuti ku Ashikeloni, ku Gaza, ku Ekuroni na ku chigaŵa chakukharako cha ku Ashidodi.

²¹Yikandituma ku charu cha Edomu, cha Mowabu na cha Amoni.

²²Yikandituma ku ŵakaronga wose ŵa charu cha Ture, ŵakaronga wose ŵa charu cha Sidoni ndiposo na ku ŵakaronga ŵa sirya lira mu mphepete mwa nyanja,

²³ku vigaŵa vya Dedani, Tema, Buzi na wose awo ŵakumeta masisi ghawo mu mphepete.

²⁴Yikandituma ku ŵakaronga wose ŵa mu charu cha Arabiya ndiposo na ku ŵakaronga wose awo ŵakuwusa mafuko ghakupambanapambana iyo yikukhara mu chiparamba.

²⁵Yikandituma ku ŵakaronga wose ŵa mu charu cha Zimuri, cha Elamu na ŵa wose ku Mediya,

²⁶ku ŵakaronga wose ŵa ku mpoto, ŵa kutali na ŵa pafupi wuwo, yumozayumoza na ku maufumu ghose gha pa charu cha pasi. Pa umaliro Karonga Sheshaki, wa charu cha Babuloni nayo wizamkumwa.

²⁷“Sono ukaŵaphalire kuti FUMU Mwenenkhongono zose, Chiuta wa Israele wakuti, ‘Imwani, muroŵere ndipo muwukure. Muwe pasi na kureka kuwukaso, chifukwa cha nkhondo iyo nditi nditume mukati mwinu.’

²⁸Ndipo usange ŵakukana kupokerera nkhombo, kufuma mu woko lako kuti ŵamwemo, ukaŵaphalire kuti FUMU Mwenenkhongono zose yikuti, ‘Mukwenera kumwa ndipera.’

²⁹Pakuti, wona, sono nkhwamba kulanga msumba uwo ukuchemeka na zina lane. Kasi mukughanaghana kuti imwe mulangikenge chara? Na pachoko pose, mulangikenge ndipera. Nadi nditi nditume nkhondo pa ŵanthu wose awo ŵakukhara pa charu cha pasi.” Ntheura ndimo FUMU yikuyowoyera Yankhongono zose.

³⁰Ntheura uŵapharazgire mazgu ghakuŵasuska agha ndipo uyowoye kwa iwo kuti, “FUMU yiti yibangule kufuma kuchanya, yiti yidudumire kufuma ku malo ghakhe ghakupatulika. Yiti yibangule na nkhongono kwimikana na ŵanthu ŵakhe, yiti yichemerezge nga ndi awo ŵakuponda mpheska, kwimikana na ŵanthu wose ŵa pa charu cha pasi.

³¹Kamphomezi kamkupulikikwa ku mphererekezgo zose za charu cha pasi, pakuti FUMU yamkuŵapa mrandu ŵanthu ŵa mafuko ghose. Yamkweruzga ŵanthu wose, ndipo ŵabendezi ŵati ŵakomekenge.” Ntheura ndimo FUMU yikuyowoyera.

³²FUMU Mwenenkhongono zose yikuti, “Wonani, pharaniko likutandazgika, kufuma ku fuko ili kuya ku fuko linyakhe. Chimphupuru chikuru chikuwuka, kufuma ku mphererekezgo za charu.”

³³Awo ŵakomeka na FUMU pa zuŵa leneilo, ŵati ŵagonerane kufuma ku mphererekezgo za charu kuya ku mphererekezgo zinyakhe. Kuti ŵamkuŵatengerera chara, nesi kuŵawunjika, nesi kuŵasunga, kweni ŵamkurekeka waka pa charu nga ndi ulongwe.

³⁴Imwe mwa ŵaliska, tengerani ndipo lirani, imwe ŵarongozgi ŵa ŵanthu wane, kunkhurani mu vyoto. Pakuti nyengo yinu yakuti mukomeke na kumbininika yafika, ndipo muti mukomekenge nga ndi mberere zanarume ziweme.

³⁵Ŵarongozgi kuti ŵamkuŵa nako kwakuchimbilira chara, nanga ndi mbenecho ŵa mberere kuti ŵizamkuŵa na pakuphokwera chara.

³⁶Pulikani kulira kwa ŵarongozgi, kutengera kwa ŵenecho ŵa mberere pakuti FUMU yikuparanya luhari lwawo.

³⁷Vikaya vyawo vya mutende, sono vyapankhuka, chifukwa cha ukari wakofya wa FUMU.

³⁸Ŵakuchimbira nga ndi nkharamu iyo yareka chiwono chakhe, pakuti charu chawo chazgoka mapopa, chifukwa cha visuzgo vya nkhondo, ndiposo na ukari wakofya wa FUMU.