Read new_tumbuka_bible Yeremiya 26 Bible Online

Yeremiya 26 - new_tumbuka_bible bible

Yeremiya 26

¹Pa nyengo iyo Yehoyiyakimu, mwana wa Yosiya, karonga wa charu cha Yuda wakambiranga kuwusa, mazgu agha ghakiza kufuma kwa FUMU ghakati,

²“FUMU yikuti, ‘Imilira mu baraza la Nyumba ya Chiuta ndipo uyowoye ku ŵanthu wose awo ŵakukhara mu misumba ya charu cha Yuda, awo ŵiza kuti ŵasope mu Nyumba ya Chiuta. Ukaŵaphalire vyose ivyo ndakulangula kwambula kurekako nanga ndi lizgu limoza.

³Panyakhe ŵamkupulika ndipo munthu yose wangamanya kuwerako ku nthowa zakhe ziheni, mwakuti ndigowoke na kureka kuchita chiheni icho ndaghanaghananga kuchita kwa iwo chifukwa cha machitiro ghawo ghaheni.’ ”

⁴“Ukaŵaphalire kuti, ‘FUMU yikuti: Usange mukureka kundipulika ine, pakusunga dango lane ilo ndimika panthazi pinu,

⁵usange mukureka kupulika mazgu gha nchimi, ŵateŵeti ŵane, ŵeneawo nkhumutumirani kaŵirikaŵiri, nangauli imwe mulije kuŵapulikira,

⁶penepapo nditi ndiyipankhure nyumba iyi kuŵa nga ndi Shilo, ndipo msumba uwu kuŵa wakutembeka ku mafuko ghose gha pa charu cha pasi.’ ”

⁷Ŵasofi, nchimi na ŵanthu wose ŵakamupulika Yeremiya wakuyowoya mazgu agha mu Nyumba ya FUMU.

⁸Para Yeremiya wakamara kuyowoya vyose ivyo FUMU yikamulangula kuŵaphalira ŵanthu wose, ŵasofi, nchimi pamoza na ŵanthu wose ŵakamukora ndipo ŵakati kwa iyo, “Iwe ukwenera nadi kukomeka.

⁹Chifukwa uli ukuchima mu zina la FUMU, pakuyowoya kuti, ‘Nyumba iyi yiti yiŵenge nga ndi Shilo, ndipo msumba uwu uti uŵenge mapopa na wambula kukharamo ŵanthu?’ ” Ndipo ŵanthu wose ŵakamuwunganira Yeremiya mu Nyumba ya Chiuta.

¹⁰Para nduna za charu cha Yuda zikapulika vinthu ivi, zikaruta kufuma ku nyumba ya karonga kuya ku Nyumba ya FUMU. Zikakhara pa muryango wa Chipata Chiphya cha Nyumba ya FUMU kupulikizga.

¹¹Penepapo ŵasofi pamoza na nchimi ŵakati ku nduna zira na ŵanthu wose, “Munthu uyu wakwenera kukomeka, chifukwa wachima kususka msumba uwu, nga ndi umo mwajipulikira mwekha.”

¹²Penepapo Yeremiya wakayowoya ku nduna zose na ku ŵanthu wose wakati, FUMU ndiyo yikandituma kuti ndikachime mazgu ghakususkana na Nyumba ya Chiuta iyi na msumba uwu mazgu ghose agho mwaghapulika.

¹³Ntheura sono nozgani nthowa zinu na machitiro ghinu ndipo mupulikire mazgu gha FUMU, Chiuta winu. FUMU yiti yigowoke na kureka kuchita chiheni icho ghanaghananga kuchita kwa iwo.

¹⁴Kweni ine sono ndili mu mawoko ghinu. Chitani nane chilichose icho mukuwona nchiweme na chakwenerera kwa imwe.

¹⁵Kweni manyani kuti para mwandikoma, muti mujitorere ndopa zambula mrandu pa imwe mwaŵene na pa msumba uwu ndiposo na pa awo ŵakukhara mwenemumo, pakuti unenesko ngwa kuti FUMU yikandituma kuti ndiyowoye mazgu agha kwa imwe kuti mupulike.

¹⁶Ntheura nduna na ŵanthu wose ŵakati ku ŵasofi na ku nchimi, “Munthu uyu kuti wakwenerera kukomeka chara, chifukwa wayowoya mu zina la FUMU, Chiuta withu.”

¹⁷Penepapo ŵararaŵarara ŵanji ŵa mu charu chira ŵakawuka na kuyowoya ku ŵanthu awo ŵakawungana ŵakati,

¹⁸“Pa nyengo iyo Hezekiya wakaŵa karonga wa charu cha Yuda, Mika wa mu msumba wa Moresheti wakachima, ndipo wakaŵaphalira ŵanthu wose ŵa ku charu cha Yuda kuti FUMU Mwenenkhongono zose yikuti, ‘Msumba wa Ziyoni uti ulimike nga ndi munda, Yerusalemu wati wazgoke kuŵa mulu wa mahami, ndipo phiri la Nyumba ya Chiuta, liti lizgoke kuŵa phiri la thengere.’

¹⁹Asi Karonga Hezekiya na ŵanthu wose ŵa mu charu cha Yuda ŵakamukoma Mika? Asi karonga yura wakopanga FUMU na kuŵeyerera kuti yiŵe nawo na uchizi? Ndipo asi FUMU yikagowoka kureka kuchita chiheni icho yikaphara kususka iwo? Kweni ise tili pafupi waka kujitorera uheni ukuru chomene pa ise taŵene.”

²⁰Wakaŵakoso munthu munyakhe uyo wakachima mu zina la FUMU, zina lakhe Uriya mwana wa Shemaya wa ku msumba wa Kiriyati Yeyarimu. Iyo wakachima kususka msumba uwu na charu ichi mu mazgu ghakuyana waka na gha Yeremiya.

²¹Karonga Yehoyiyakimu na ŵasilikari ŵakhe wose na nduna zakhe, ŵakati ŵapulika ivyo wakayowoya, karonga wakakhumba kuti Uriya wakomeke. Uriya wakati wapulika ichi, wakaŵa na wofi ndipo wakachimbilira ku Eguputo.

²²Pamanyuma Karonga Yehoyiyakimu wakatuma Elinatani, mwana wa Akibori pamoza na ŵanthu ŵanyakhe ku Eguputo kuti ŵakamutore Uriya.

²³Iwo ŵakaya kamupenjerera Uriya ku Eguputo kura ndipo ŵakati ŵamusanga, ŵakiza nayo kwa Karonga Yehoyiyakimu, uyo wakamukoma Uriya na lupanga ndipo chitanda chakhe ŵakachitaya ku mararo agho ŵakusungako ŵanthu ŵambula kuzirwa.

²⁴Kweni Ahikamu mwana wa Shafani wakaŵa pamoza na Yeremiya, mwakuti wakaperekeka ku ŵanthu ŵara chara kuti ŵamukome.