Read new_tumbuka_bible Yeremiya 27 Bible Online

Yeremiya 27 - new_tumbuka_bible bible

Yeremiya 27

¹Pa nyengo iyo Zedekiya mwana wa Yosiya, karonga wa charu cha Yuda, wakambira kuwusa, mazgu gha FUMU ghakiza kwa Yeremiya ghakati:

²FUMU yikati kwa ine, Utore vingwe na makuni gha goliwoli ndipo ujivwarike mu singo.

³Utumizge mazgu kwa ŵakaronga ŵa charu cha Edomu, cha Mowabu, cha Amoni, cha Ture na cha Sidoni. Uŵatumire kwizira mu nthumi izo zafika ku Yerusalemu kwa Karonga Zedekiya.

⁴Uŵaphalire kuti ŵakayowoye kwa ŵarongozgi ŵawo kuti FUMU Mwenenkhongono zose, Chiuta wa Israele wakuti: Icho mukwenera kuyowoya ku sekuru ŵinu ndi ichi:

⁵“Na nkhongono zikuru ndiposo na woko lane lakutambazuka, nkhalenga charu cha pasi, ŵanthu, vinyama na vyose ivyo vili mu charu. Nkhupereka charu ichi kwa waliyose uyo ndakhumba kumupa.

⁶Sono ndapereka vyaru vyose ivi kwa muteŵeti wane Nebukadinezara, karonga wa charu cha Babuloni. Ndamupaso vinyama vya mu thengere kuti vimuteŵeterenge.

⁷Ŵanthu ŵa mafuko ghose ŵati ŵamuteŵeterenge iyo, mwana wakhe na muzukuru wakhe mpaka yifike nyengo yakuti charu chakhe chithereskeke. Penepapo mafuko ghanandi na ŵakaronga ŵankhongono ŵamkumuzgora iyo kuŵa muzga wawo.

⁸“Kweni usange fuko lirilose panji ufumu unyakhe wamkureka kumuteŵetera Nebukadinezara karonga wa charu cha Babuloni, panji kureka kumulambira, ine ndizamkulanga fuko lira na nkhondo, njara ndiposo na nthenda yakofya ndisuke ndiŵapereke mu mawoko ghakhe kuŵamara petu. Ntheura ndimo FUMU yikuyowoyera.

⁹Ntheura mureke kupulikira nchimi zinu, ŵawukwi ŵinu, ŵamaloto ŵinu, ŵaroski ŵinu ndiposo na ŵamaula ŵinu awo ŵakumuphalirani kuti muti muteŵetere karonga wa charu cha Babuloni chara.

¹⁰Ivyo ŵakuchima kwa imwe ndi utesi, mwakuti ŵarwani ŵamkumufumiskanimo mu charu chinu na kuruta namwe kutali. Ndizamkumuchimbizganimo mu charu ndipo muzamkumara petu.

¹¹Kweni fuko lose ilo lizamkumulambira karonga wa charu cha Babuloni na kumuteŵetera, ndamkulireka kuti likhare mu charu chakhe, kuti lilimenge na kukhara mwenemumo.” Ntheura ndimo FUMU yikuyowoyera.

¹²Kwa Zedekiya karonga wa charu cha Yuda nako nkhayowoya mazgu gheneghagha pera, nkhati, “Ujilambike kwa karonga wa ku Babuloni na kumuteŵetera iyo pamoza na ŵanthu ŵakhe mwakuti uthaske umoyo winu.

¹³Kasi iwe na ŵanthu ŵako mufwirengechi na nkhondo, njara na nthenda yakofya, kwakuyana na ivyo FUMU yayowoyera mafuko agho ghamkureka kuteŵetera karonga wa charu cha Babuloni?

¹⁴Mureke kupulikira mazgu gha nchimi izo zikuti, ‘Kuti mwamkuteŵetera karonga wa charu cha Babuloni chara,’ pakuti ivyo ŵakumuchimirani ndi vya utesi.”

¹⁵FUMU yikuti, “Ine kuti ndili kuŵatuma chara, kweni ŵakuchima waka vya utesi mu zina lane. Pa chifukwa ichi ine nditi ndimuchimbizganimo mu charu ichi ndipo muzamkumara petu imwe pamoza na nchimi izo zikuchima kwa imwe.”

¹⁶Penepapo nkhaŵaphalira ŵasofi na ŵanthu wose aŵa kuti FUMU yikuti, “Mureke kupulikira nchimi izo zikumuphalirani kuti, ‘Viteŵetero vya mu Nyumba ya Chiuta ŵizamkuviwezgeraso sonosono kufuma ku charu cha Babuloni,’ pakuti nvya utesi ivyo ŵakumuchimirani imwe.

¹⁷Mureke kuŵapulikira kweni muteŵeterani karonga wa charu cha Babuloni mwakuti muthaske umoyo winu. Kasi msumba uwu uzgokerengechi mahami?

¹⁸Usange iwo ndi nchimi nadi, ndipo zili na mazgu gha FUMU, ipo ŵaŵeyerere kwa FUMU Mwenenkhongono zose kuti viteŵetero ivyo vili kurekeka mu Nyumba ya Chiuta, na mu nyumba ya ufumu wa charu cha Yuda ndiposo na mu Yerusalemu, vireke kuruta ku charu cha Babuloni.

¹⁹FUMU Mwenenkhongono zose yikuti pa vya mizati, chiŵiya cha mkuŵa chakuŵikamo maji, vyakwimapo na viteŵetero vinyakhe ivyo vikakharapo mu msumba uwu,

²⁰ivyo Nebukadinezara, karonga wa charu cha Babuloni kuti wakavitora chara, apo wakamutoreranga ku umikori Yekoniya, karonga wa charu cha Yuda mwana wa Yehoyiyakimu, kufuma mu Yerusalemu na kuruta nayo ku charu cha Babuloni pamoza na ŵarongozgi wose ŵa charu cha Yuda na ŵa mu Yerusalemu.

²¹Nadi, FUMU Mwenenkhongono zose, Chiuta wa Israele wakuti pa vya viteŵetero ivyo vili kurekeka mu Nyumba ya Chiuta, na mu nyumba ya ufumu wa charu cha Yuda, ndiposo na mu Yerusalemu,

²²‘Vizamkutorekera ku Babuloni na kukhara kwenekuko mpaka pa zuŵa ilo ndizamkuvikumbukiraso. Penepapo ndipo ndizamkuviwezga na kuviŵika mu malo agha.’ ” Ntheura ndimo FUMU yikuyowoyera.