Read new_tumbuka_bible Yeremiya 28 Bible Online

Yeremiya 28 - new_tumbuka_bible bible

Yeremiya 28

¹Mu chirimika cheneicho, kwamba kwa kuwusa kwa Zedekiya, karonga wa charu cha Yuda, mwezi wa chinkhonde wa chirimika cha chinayi, nchimi Hananiya mwana wa Azuru, wa ku msumba wa Gibeyoni, wakayowoya kwa ine mu Nyumba ya FUMU panthazi pa ŵasofi na pa ŵanthu wose, wakati,

²“FUMU Mwenenkhongono zose, Chiuta wa Israele wakuti, ‘Ndamkuphyora goliwoli la karonga wa charu cha Babuloni.

³Mu virimika viŵiri pera nditi ndiwezgereso mu malo agha viteŵetero vyose vya mu Nyumba ya FUMU, ivyo Nebukadinezara, karonga wa charu cha Babuloni, wakatorera ku Babuloni kufuma kuno.

⁴Ndizamkumuwezgeraso mu malo agha Yekoniya, karonga wa charu cha Yuda, mwana wa Yehoyiyakimu. Ndizamkuwezgaso ŵanthu wose awo ŵakatorekera ku umikori kufuma mu charu cha Yuda kuruta ku charu cha Babuloni, pakuti ndizamkuphyora goliwoli la karonga wa charu cha Babuloni.’” Ntheura ndimo FUMU yikuyowoyera nchimi.

⁵Penepapo nchimi Yeremiya wakamuzgora Hananiya, panthazi pa ŵasofi na pa ŵanthu wose awo ŵakimilira mu Nyumba ya FUMU.

⁶Iyo wakati, “Ameni! Mphanyi FUMU yanguchita nadi ntheura. FUMU yifiske ivyo wachima pakuwezgera mu malo agha viteŵetero vya mu nyumba yakhe kufuma ku charu cha Babuloni ndiposo na wose awo ŵakayorekera ku umikori.

⁷Ndipouli upulike sono mazgu agho nditi ndikuyowoyenge kwa iwe na ku ŵanthu wose.

⁸Nchimi izo zikaŵako kale pambere iwe na ine, zikachima kuti kwizamkuŵa nkhondo, njara na nthenda yakofya mu vyaru vinandi na mu maufumu ghakuru.

⁹Kweni usange nchimi yikuchima vya mutende, ndipo usange ivyo wachima vyafiskika, penepapo ndipo wamkumanyikwa nadi kuti FUMU ndiyo yikamutuma.”

¹⁰Penepapo nchimi Hananiya wakavura goliwoli mu singo ya Yeremiya ndipo wakaliphyora.

¹¹Penepapo Hananiya wakayowoya ku ŵanthu wose wakati, “FUMU yikuti, ‘Ntheura ndimo nditi ndiphyorerenge mu virimika viŵiri goliwoli la Nebukadinezara karonga wa charu cha Babuloni ilo wakaŵika mu singo za ŵanthu ŵa mafuko ghose.’ ” Penepapo nchimi Yeremiya wakafumapo.

¹²Pakati pajumpha kanyengo kachoko waka, Hananiya wakati wakaphyora goliwoli mu singo ya nchimi Yeremiya, mazgu gha FUMU ghakiza kwa Yeremiya ghakati:

¹³FUMU yikuti, “Ruta ukamuphalire Hananiya kuti, ‘Iwe waphyora goliwoli la khuni, kweni nditi ndinozge mu malo ghakhe goliwoli la chisulo.’ ”

¹⁴FUMU Mwenenkhongono zose, Chiuta wa Israele wakuti, “Ndamkuŵika goliwoli la chisulo mu singo za mafuko ghose kuti ghamuteŵeterenge Nebukadinezara, karonga wa charu cha Babuloni. Ghati ghamuteŵetere pakuti ndaghapereka kwa iyo na vinyama vya mu thengere wuwo.”

¹⁵Sono Yeremiya wakaphalira Hananiya wakati, “Pulika, iwe Hananiya, FUMU yilije kukutuma ndipo wakhorweska ŵanthu aŵa kuti ŵagomezge uchimi wa utesi.

¹⁶Ntheura FUMU yikuti, ‘Nditi ndikuwuskemo mu charu. Uti ufwenge chirimika cheneichi chifukwa wapharazga ivyo vikwimikana na FUMU.’ ”

¹⁷Mu mwezi wa chinkhonde na chiŵiri wa chirimika chenechira, nchimi Hananiya wakafwa.