Read new_tumbuka_bible Yeremiya 29 Bible Online

Yeremiya 29 - new_tumbuka_bible bible

Yeremiya 29

¹Agha ndigho mazgu agho Yeremiya wakalemba mu karata na kutuma kufuma ku Yerusalemu kuruta kwa ŵararaŵarara, ŵasofi, nchimi ndiposo na ku ŵanthu ŵanyakhe wose awo ŵakakharako, ŵeneawo Nebukadinezara wakaŵatorera ku umikori kufuma ku Yerusalemu kuya nawo ku charu cha Babuloni.

²Karata iyo yikalembeka apo Karonga Yekoniya, ŵanyina, zinthunguli ndiposo na nduna za charu cha Yuda na za mu Yerusalemu, ŵaŵaji na ŵafuzi ŵati ŵafumako ku Yerusalemu.

³Karata yura wakatumizga Elasa mwana wa Shafani na Gemariya mwana wa Hilikiya, ŵeneawo Zedekiya, karonga wa charu cha Yuda wakaŵatuma kwa Nebukadinezara, karonga wa charu cha Babuloni. Mu karata yira wakalembamo kuti:

⁴Ku wose awo nkhaŵatorera ku umikori, kufuma ku Yerusalemu kuruta ku Babuloni, “FUMU Mwenenkhongono zose, Chiuta wa Israele, wakuti,

⁵‘Zenganinge nyumba, mukharengemo ndipo limaninge minda na kurya vuna yakhe.

⁶Mutorenge kuti muŵe na ŵana. Muŵatoreskenge ŵana ŵinu ŵanarume, ndipo ŵana ŵinu ŵanakazi muŵatezgenge, mwakuti nawo ŵababenge ŵana. Mwandanenge kwenekuko mwakuti mureke kuchepa.

⁷Msumba uwo ndamutumaniko kuti muŵe ŵamikori, muwupenjerenge mutende na uweme. Muwuromberenge kwa FUMU, chifukwa usange msumba uli na mutende namweso mukharenge mu mutende.’ ”

⁸FUMU Mwenenkhongono zose, Chiuta wa Israele, wakuti, “Mureke kupusikika na nchimi, na ŵaroski awo ŵali mukati mwinu. Mureke kupulikira maloto ghawo.

⁹Pakuti ivyo ŵakumuchimirani mu zina lane ndi vya utesi. Ine kuti ndili kuŵatuma chara.” Ntheura ndimo FUMU yikuyowoyera.

¹⁰FUMU yikuti, “Para vyamara virimika 70 vyeneivyo Babuloni wali kupimikira, ndamkwiza ndipo ndizamkufiska phangano lane ndipo ndamkumuwezgerani ku charu chinu.”

¹¹FUMU yikuti, “Ine ndine nkhumanya ivyo ndili kumunozgerani imwe. Unozgero wakuti imwe muŵe paweme, paheni chara, unozgero wakumupani chigomezgo na kukhara kuweme kunthazi.

¹²Penepapo mwamkundichema ndipo mwamkwiza kuti mundirombe, ndipo ine ndizamkumupulikani.

¹³Mwamkundipenja na kundisanga. Usange mwamkundipenja na mtima wose,

¹⁴mwamkundisanga nadi. Ndizamkumuwezgerani mauweme ghinu na kumuwunganyani kufuma ku mafuko ghose na ku malo ghose uko nkhamuchimbizgirani. Ndamkumuwezgeraniso nadi ku malo uko mukaŵa para nkhamutumaninge ku umikori.” Ntheura ndimo FUMU yikuyowoyera.

¹⁵Imwe mukuyowoya kuti, “FUMU yili kutipa nchimi mu charu cha Babuloni.”

¹⁶Pa vya karonga uyo wakukhara pa chizumbe cha Davide, na za ŵanthu wose awo ŵakukhara mu msumba uwu, ŵabali ŵinu ŵeneawo kuti mukayorekera lumoza kuya ku umikori chara:

¹⁷FUMU Mwenenkhongono zose yikuti, “Ndizamkuŵatumira nkhondo, njara na nthenda yakofya. Nditi ndiŵazgore kuŵa nga ndi vikuyu viheni, vyakuvunda, ivyo munthu kuti wangarya chara.

¹⁸Ndizamkuŵachimbizga na nkhondo, njara na nthenda yakofya ndipo ndizamkuŵazgora kuŵa chinthu chakuseruska ku maufumu ghose gha mu charu cha pasi. Ŵizamkuŵa nthembo na chinthu chakuzukumiska, chimuhoyere ndiposo na chisunjizgo mukati mu mafuko ghose uko ndamkuŵachimbizgirako.”

¹⁹FUMU yikuti, “Ivi vyamkuŵa ntheura chifukwa ŵandapulikire mazgu ghane gheneagho nkhaŵatumira kaŵirikaŵiri kwizira mu nchimi, ŵateŵeti ŵane. Kweni iwo kuti ŵakapulikira chara.” Ntheura ndimo FUMU yikuyowoyera.

²⁰Ntheura pulikani mazgu gha FUMU mose imwe, muli mu umikori, mwaŵeneimwe nkhamutumani ku charu cha Babuloni kufuma ku Yerusalemu.

²¹“FUMU Mwenenkhongono zose, Chiuta wa Israele wakuti pa vya Ahabu mwana wa Kolaya ndiposo na vya Zedekiya mwana wa Maaseya, ŵeneawo ŵakachima vya utesi kwa imwe mu zina lakhe: Ndizamkuŵaperekeka kwa Nebukadinezara, karonga wa charu cha Babuloni uyo wizamkuŵakomera panthazi pinu.

²²Sono para yumoza wa awo ŵakayorekera ku umikori kufuma ku charu cha Yuda kuruta ku charu cha Babuloni wakukhumba kutemba, wayowoyenge kuti, ‘FUMU yikuchitire nga ndi umo yikachitira na Zedekiya na Ahabu ŵeneawo karonga wa ku charu cha Babuloni wakaŵawocha pa moto.’

²³Pakuti iwo ŵachita vya ukazuzi mu charu cha Israele. Ŵachita uleŵe na ŵawoli ŵaŵene, ŵachima mu zina lane mazgu gha utesi gheneagho nkhawura na kuŵalangulira. Ine ndine nkhumanya ndipo ndingaperekaso ukaboni.” Ntheura ndimo FUMU yikuyowoyera.

²⁴Iwe Yeremiya, ukamuphalire Shemaya mwana wa Nehelamu kuti

²⁵FUMU Mwenenkhongono zose, Chiuta wa Israele wakuti, “Iwe ukatumizga makarata mu zina lako ku ŵanthu wose awo ŵali mu Yerusalemu, na kwa musofi Zefaniya mwana wa Maaseya, na ku ŵasofi ŵanyakhe wose, kuti,

²⁶“ ‘FUMU yakwimika iwe Zefaniya kuŵa musofi mu malo mwa musofi Yehoyada, kuti uŵe na mazaza mu Nyumba ya Chiuta, pa munthu wakufuntha waliyose mweneuyo wakuchima, kuti umukakenge malundi na magwede ndiposo na chisulo mu singo.

²⁷Kasi sono warekerachi kumuchenya Yeremiya wa ku Anatoti mweneuyo wakuchima mukati mwinu?

²⁸Ise kuno ku Babuloni, Yeremiya watitumizgira mazgu ghakuti mukharenge nyengo yitali ku umikori winu. Ntheura zenganinge nyumba na kukharamo ndipo limaninge minda na kurya vuna yakhe.’ ”

²⁹Musofi Zefaniya wakaŵazga karata yura panthazi pa Yeremiya uku wakupulika.

³⁰Penepapo mazgu gha FUMU ghakiza kwa Yeremiya ghakati,

³¹FUMU yikuti, “Tuma uthenga uwu ku ŵamikori wose mu charu cha Babuloni, pa vya Shemaya wa ku Nehelamu. Shemaya wachima kwa imwe apo ine kuti ndili kumutuma chara, ndipo wachita kuti imwe mugomezge utesi.

³²Ntheura nditi ndimulange Shemaya pamoza na ŵa mphapu yakhe. Kuti wati waŵe na munthu na yumoza chara kufuma mu mphapu yakhe uyo wizamkukharako, mweneuyo wizamkuwona vinthu viweme, ivyo ndamkuŵachitira ŵanthu ŵane, pakuti iyo wayowoya ivyo vikwimikana nane.” Ntheura ndimo FUMU yikuyowoyera.