Read new_tumbuka_bible Yeremiya 3 Bible Online

Yeremiya 3 - new_tumbuka_bible bible

Yeremiya 3

¹“Usange mufumu wakumupata muwoli wakhe, ndipo muwoli yura wafumako kwa iyo, na kutengwa kwa mufumu munyakhe, kasi mufumu wakudanga wangamutoraso mwanakazi yura? Usange wangachita ichi charu[2] chiŵenge chakukazuzgika chomene. Sono iwe Israele, wachita uzaghali na vibwezi vinandi. Kasi ungamanya kuwereraso kwa ine? Ntheura ndimo FUMU yikuyowoyera.

²Inuskani maso ghinu ku malo gha pachanya, ndipo muwone. Kasi ndi mpha apo imwe mundachitirepo uzaghali? Mu mphepete mwa nthowa ndimo mukakharanga, kulindizga ŵakutemweka ŵinu, nga ndi umo muArabu wakwibira mu mapopa. Mwachikazuzga charu, na nkharo yinu yiheni ya uzaghali.

³Pa chifukwa ichi vura yakudanga yakanizgika kurokwa, ndipo vura ya kumalira nayo yindarokwe. Ndipouli kawonekero kinu nkha munthu muzaghali, ndipo na soni mulije.

⁴Asi ndimwe mwachemanga sonosono apa kuti, ‘Ŵadada, ndimwe mubwezi wane wa mu uwukirano wane.’

⁵Kasi wati wakaripenge kwa muyirayira? Kasi wati wasungilire ukari mpaka ku umaliro? Ntheura ndimo mukuyowoyera, kweni mwachita uheni wose uwo mukamanya kuchita.”

⁶Mu mazuŵa ghakuwusa kwa Karonga Yosiya, FUMU yikati kwa ine, “Kasi wawona ivyo wali kuchita wambula kugomezgeka, Israele? Iyo wakarutanga ku phiri lirilose litali na kukhara musi mu khuni lirilose lakutandazga minthavi yakhe na kuchita uzaghali kwenekura.

⁷Nkhaghanaghana kuti para wachita vyose ivi, wati wawerere kwa ine, kweni kuti wakawerako chara. Yuda mukuru wakhe uyo wakaŵaso wambula kugomezgeka kwa ine, wakachiwona ichi.

⁸Yuda nayo wakawona kuti Israele nayo wambula kugomezgeka nkhamusuzula ndipo nkhamupa karata wa chipati chifukwa cha uzaghali wakhe. Ndipouli Yuda mukuru wakhe nayo wambula kugomezgeka kuti wakopa chara, ndipo nayo wakaruta kuya kachita uzaghali.

⁹Pakuti kuchita uzaghali kakaŵa kanthu kapusu kwa Yuda, wakakazuzga charu. Wakachita uzaghali pakusopa vikozgo vya mawe na makuni wuwo.

¹⁰Ndipouli nanga kukaŵa ntheura, Yuda mukuru wakhe kuti wakawerera kwa ine na mtima wose chara, kweni na mtima wa upusikizgi.” Ntheura ndimo FUMU yikuyowoyera.

¹¹FUMU yikati kwa ine, “Israele, wambula kugomezgeka yura, wajirongora kuŵa murunji kuruska Yuda mupusikizgi yura.

¹²Sono iwe Yeremiya, ruta ukapharazge ku mpoto mazgu ghose agha kuti: Iwe Israele wambula kugomezgeka, werako, ine kuti ndikukwiyirenge chara. Pakuti ine ndili wa chisungusungu, kuti ndikaripenge kwa muyirayira chara.” Ntheura ndimo FUMU yikuyowoyera.

¹³“Iwe uzomere waka kwananga kwako, zomera kuti ukagarukira FUMU, Chiuta wako. Iwe ukasopanga ŵachiuta ŵachilendo, musi mu khuni lose lakutandazga minthavi yakhe, ndipo kuti ukandipulikira ine chara.” Ntheura ndimo FUMU yikuyowoyera.

¹⁴“Weraniko, imwe mwa ŵambula kugomezgeka, pakuti imwe ndimwe ŵane na ŵane. Nditi ndimutorani kuruta namwe ku Ziyoni, yumoza kufuma ku msumba uliwose, ŵaŵiri kufuma mu mbumba yiliyose. Ntheura ndimo FUMU yikuyowoyera.

¹⁵“Pamanyuma nditi ndimupani ŵarongozgi awo ine nkhuŵakhumba. Ŵeneaŵa ŵati ŵamuwusani na mahara na umanyi.”

¹⁶Ntheura FUMU yikuti, “Mu mazuŵa gheneghara, para mwizamkwandana na kuŵa ŵanandi mu charu chira, penepapo ŵamkuyowoyaso chara kuti, ‘Bokosi la Phangano la FUMU liri nkhu?’ Kuti ŵamkulighanaghanaso chara, nesi kulikumbuka, nanga ndikulinwekera ndipo kuti ŵamkupangaso linyakhe chara.

¹⁷Pa nyengo yeneiyo, Yerusalemu wamkuchemeka kuti ‘Chizumbe cha FUMU.’ Ndipo mafuko ghose ghamkuwungana mwenemumo mu Yerusalemu panthazi pa FUMU kuti ŵayichindike. Kuti ŵamkurondezgaso kunonofyeka kwa mitima yawo yiheni chara.

¹⁸Mu mazuŵa gheneagho ŵaYuda na ŵaIsraele ŵamkuŵa pamoza ndipo wose ŵamkuwera kufuma ku charu cha ku mpoto na kwiza ku charu icho nkhaŵapa ŵasekuru ŵinu kuŵa chawo.”

¹⁹FUMU yikati kwa Israele, “Ine nkhaghanaghana nkhati, ‘Nkhukhumba kukuŵika mukati mu ŵana ŵane, na kukupa charu chakukondweska, charu chakutowa chomene kuruska cha mafuko ghanyakhe? Ine nkhapima kuti uti undichemenge kuti, “Ŵadada,” urekenge chara kundirondezga ine.

²⁰Kweni nga ndi muwoli wambula kugomezgeka, uyo wakureka mufumu wakhe, ntheura ndimo waŵira iwe, We mbumba ya Israele. Iwe waŵa wambula magomezgeko kwa ine.’ ” Ntheura ndimo FUMU yikuyowoyera.

²¹Chiwawa chikupulikikwa pa mapiri gha chiparamba. ŴaIsraele ŵakulira na kuŵeya, chifukwa ŵabendezga nthowa zawo, ŵaruwa FUMU, Chiuta wawo.

²²Imwe ŵanthu ŵambula kugomezgeka, wererani. Ine nditi ndimuchizgani ku kuwura kugomezgeka kwinu. Imwe mukuti, “Inya, tikwiza kwa imwe, pakuti ndimwe FUMU, Chiuta withu.

²³Nadi kusopa mu tumapiri kuti nkhwakupusika waka, kuŵa na viphikiro pa mapiri, nchiwawa chawakawaka. Nadi FUMU, Chiuta withu, ndiyo Muponoski pera wa ŵaIsraele.”

²⁴“Kweni kufuma ku uwukirano withu, chiuta Baala, chinthu chakukhozga soni chatinangira vyose ivyo ŵasekuru withu ŵakatokatokerapo: mberere na mbuzi na ng'ombe zawo, ŵana ŵawo ŵanarume na ŵanakazi.

²⁵Tiyeni tigone pasi na soni zithu ndipo kuyuyurika kwithu kutibenekerere. Pakuti ise pamoza na ŵasekuru ŵithu tanangira FUMU, Chiuta withu, kufuma ku uwukirano withu mpaka sono. Tilije kupulikira mazgu gha FUMU, Chiuta withu.