Read new_tumbuka_bible Yeremiya 30 Bible Online

Yeremiya 30 - new_tumbuka_bible bible

Yeremiya 30

¹Mazgu agho ghakiza kwa Yeremiya kufuma kwa FUMU ndi agha:

²FUMU, Chiuta wa Israele wakuti, “Lemba mu buku mazgu ghose agho ndayowoya kwa iwe.

³Pakuti mazuŵa ghakwiza apo ndamkuwezgera mauweme pa ŵanthu ŵane ŵaIsraele na ŵaYuda kufuma ku umikori kwiza nawo mu charu icho nkhaŵapa ŵawiskewokuru kuti chiŵe chiharo chawo.” Ntheura ndimo FUMU yikuyowoyera.

⁴Mazgu agho FUMU yikayowoya ghakukhwaska charu cha Israele na cha Yuda ndi agha:

⁵FUMU yikuti, “Tapulika kulira kwa chitenthe, kulira kwa wofi, kwa mutende chara.

⁶Fumbani sono, kuti mupanikizge. Kasi mwanarume wangababa mwana? Chifukwa uli nkhuwona mwanarume waliyose wakora mu luwunda, nga ndi mwanakazi pa nyengo ya kubaba? Chifukwa uli chisko cha munthu waliyose chawa?

⁷Mbaya mwe! Zuŵa ilo ndakofya chomene, palije zuŵa na limoza lakuyana nalo. Yizamkuŵa nyengo ya visuzgo kwa mbumba ya Yakhobe ndipouli ŵizamkuthaskika ku visuzgo vira.”

⁸FUMU Mwenenkhongono zose yikuti, “Mu zuŵa ilo ndizamkuphyora goliwoli mu singo yawo, na kubanthura vikondo vyawo. ŴaIsraele ŵizamkuŵaso ŵazga ŵa ŵanthu ŵa chilendo chara.

⁹Mu malo mwakhe ŵizamkuteŵetera FUMU, Chiuta wawo na wa mphapu ya Davide karonga wawo uyo mweneuyo ndizamkuŵasankhira.”

¹⁰FUMU yikuti, “Ntheura imwe ŵa mbumba ya Yakhobe, muteŵeti wane, mureke kopa, imwe ŵaIsraele, mureke kuthika lusoko. Nditi ndimuthaskeni kufuma ku charu cha kutali, pamoza na ŵa mphapu yinu kufuma ku charu cha umikori wawo. Ŵa mbumba ya Yakhobe wati waŵeso mu mutende na kukhara mu kufwasa, ndipo paŵavyenge na yumoza wakumofya.

¹¹Ine ndili namwe kuti ndimuthaskeni.” Ntheura ndimo FUMU yikuyowoyera. “Nditi ndighamare petu mafuko ghose, mwenemumo nkhamumbininiskiranimo. Kweni iwe kuti ndizamkukumara petu chara, nditi ndikulange kwakuyana na umo kukwenera kuŵira, ndipo kuti ndirekengepo chara kukulanga, na pachoko pose.” Ntheura ndimo FUMU yikuyowoyera.

¹²FUMU yikuti, “Kupwetekeka kwako kungachizgika chara, chilonda chako ncha zoza.

¹³Palije na yumoza uyo wangakuvikirira pa mrandu wako. Palije munkhwara wa chilonda chako, palije munkhwara uwo ungakuchizga.

¹⁴Ŵakutemweka ŵako wose ŵakuruwa, kuti ŵakupwererako na iwe chara. Ine ndakupweteka nga ndi umo murwani wakuchitira. Ndakulanga mwa nkhaza, chifukwa mrandu wako ngukuru, zakwananga zako ndi zinandi chomene.

¹⁵Kasi chifukwa uli ukulira na kupwetekeka kwako? Chilonda chako kuti chingapora chara. Mrandu wako ngukuru, kwananga kwako nako nkhunandi, ndicho chifukwa ndakuchitira vinthu ivi.

¹⁶Ntheura wose awo ŵakukuparanya, ŵati ŵaparanyika, ŵarwani ŵako wose ŵizamkuyorekera ku umikori. Awo ŵakuskogha vinthu vyako, vinthu vyawo navyo vizamkuskogheka. Wose awo ŵakukwibira, ndizamkuchita kuti nawoso ŵibilike.

¹⁷Kweni iwe, nditi ndikuwezgerenge umoyo, ndipo ndizamkupozga vilonda vyako, ndipouli ŵanthu ŵanji ŵakuti ndiwe ŵakutayika.” Iwo ŵakuti, “Mbanthu ŵa ku Ziyoni aŵa, awo kulije munthu wakuŵapwererera.” Ntheura ndimo FUMU yikuyowoyera.

¹⁸FUMU yikuti, “Ndizamkuwezgeramoso mauweme gha mu mbumba ya Yakhobe, ndizamkuŵa na chiwuravi na iyo ku malo ghakhe ghose. Msumba wa Yerusalemu ura wizamkuzengekaso, pa mahami ghakhe gheneghara. Nyumba ya ufumu yizamkuŵaso apo yikaŵa kale.

¹⁹Mwa iwo mwamkufuma sumu za kuwonga, na mazgu gha awo ŵakukondwa. Ndizamkuŵandaniska, kuti ŵizamkuŵa ŵachoko chara. Ndizamkuŵazgora kuŵa ŵakuchindikika, kuti ŵizamkuyuyurika chara.

²⁰Ŵana ŵawo ŵizamkuŵaso nga ndi umo ŵakaŵira kale, mpingo wawo wizamkukhozgeka panthazi pane, ndipo ndizamkuŵalanga wose awo ŵakuŵayuzga.

²¹Murongozgi wamkuŵa yumoza wa mu fuko lawo, uyo wakuŵawusa, wizamkufuma mukati mwawo. Iyo ndizamkumuguzira kufupi na ine, ndipo iyo wizamkusenderera kufupi na ine. Pakuti kasi ndi njani wangaŵa na chikanga pa yekha, kuti wasenderere kwa ine?” Ntheura ndimo FUMU yikuyowoyera.

²²“Ntheura imwe mwamkuŵa ŵanthu ŵane, ndipo ine ndamkuŵa Chiuta winu.

²³“Wonani, chimphupuru cha FUMU, chiti chiphulike mu ukari. Uyu ndi kavuruvuru wakofya, uyo wakwiza pa mitu ya ŵabendezi.

²⁴Ukari wakofya wa FUMU kuti wizamkufumapo chara, yisuke yichite na kufiska, icho chikaŵa mu mtima wakhe. Mu mazuŵa agho ghakwiza, mwizamkuchimanyiska ichi.”