Read new_tumbuka_bible Yeremiya 31 Bible Online

Yeremiya 31 - new_tumbuka_bible bible

Yeremiya 31

¹FUMU yikuti, “Pa nyengo yeneiyo ndizamkuŵa Chiuta, wa mbumba zose za Israele, ndipo iwo ŵizamkuŵa ŵanthu ŵane.”

²FUMU yikuti, “Ŵanthu awo ŵakapona ku nkhondo, ŵakasanga uchizi mu mapopa, para Israele wakapenjanga chipumulo.”

³FUMU yikamuwonekera wali kutali, yikati, “Ndakutemwa iwe Israele, na kutemwa kwa muyirayira, ndarutilira kuŵa na chisungusungu kwa iwe.

⁴Ndizamkukuzengaso iwe, We Israele, ndipo wizamkuzengeka nadi. Wizamkutoraso ŵakalimba ŵako, wamkufuma kuya kavina na awo ŵakukondwera.

⁵Wamkupandaso mpheska, mu mapiri gha mu charu cha Samariya. Ŵalimi ŵati ŵapande mpheska, ndipo ŵati ŵakondwe na vipambi vyakhe.

⁶Pakuti lizamkuŵako zuŵa, apo ŵalinda ŵamkuchemerezga, mu charu cha mapiri cha Efurayimu kuti, ‘Wukani tirutenge ku Ziyoni, kwa FUMU, Chiuta withu.’ ”

⁷FUMU yikuti, “Yimbirani Israele mwakukondwa, chemerezgani chifukwa ndiyo mukuru wa mafuko, Pharazgani, ndipo murumbenge na kuyowoya kuti, ‘FUMU yaponoska ŵanthu ŵakhe, ŵaIsraele awo ŵali kukharako.’

⁸Ndamkwiza nawo kufuma ku charu cha ku mpoto, ndamkuŵawunganya kufuma ku mphererekezgo za charu. Ŵanji mba chiburumutira na ŵakupendera, ŵanakazi ŵa nthumbo, na awo ŵali pa nyengo ya kubabira. Mpingo ukuru ŵamkuwerera.

⁹Ŵamkwiza uku ŵakulira, kweni ine ndizamkuŵasanguruska na kuŵarongozga. Ndizamkuŵayendeska mu mironga ya maji, mu msewu wakuskesketeka umo kuti ŵamkukhuŵara chara. Pakuti ine ndine wiske wa Israele, ndipo Efurayimu ndi mwana wane wa uŵere.”

¹⁰“Pulikani mazgu gha FUMU, imwe ŵamitundu, mughapharazge mu vyaru vya kutali, mu mphepete mwa nyanja. Chiuta uyo wakaŵambininiska ŵaIsraele, wati waŵawunganye. Wizamkuŵasunga nga ndi muliska, umo wakupwererera mskambo wakhe.

¹¹Pakuti FUMU yawombola Yakhobe, yamuthaska ku awo mbankhongono kuruska iyo.

¹²Ŵamkwiza uku ŵakwimba mwa kuchemerezga, pa Phiri la Ziyoni. Ŵizamkumwemwetera chifukwa cha viweme, kufumira kwa FUMU. Ndivyo vyakurya, vinyo na mafuta, ŵana-mberere na ŵana ŵa ng'ombe. Umoyo wawo wizamkuŵa nga ndi munda wa nthilira, ndipo iwo kuti ŵamkusuzgikaso chara.

¹³Ŵamwali ŵizamkuvina na kusekerera, ŵawukirano na ŵarara ŵizamkukondwa. Ndamkuzgora kutengera kwawo kuŵa chimwemwe, ndamkuŵasanguruska na kuŵapa kukondwa, mu malo mwa chitima.

¹⁴Ŵasofi ndamkuŵakhutiska na vyakurya vinandi, ŵanthu ŵane ŵamkukhutiskika na viweme vyane.” Ntheura ndimo FUMU yikuyowoyera.

¹⁵FUMU yikuti, “Mazgu ghakupulikikwa mu Rama, chiliro na chitengero chikuru. Rakelo wakulirira ŵana ŵakhe. Iyo wakukana na kusanguruskika wuwo, pakuti ŵalikoso chara.”

¹⁶FUMU yikuti, “Reka kulira, ungathiranga masozi chara, pakuti Chiuta wizamkupa njombe chifukwa cha kubaba ŵana, ndipo ŵizamkufuma ku charu cha ŵarwani.” Ntheura ndimo FUMU yikuyowoyera.

¹⁷FUMU yikuti, “Kunthazi kuli chigomezgo, ŵana ŵinu ŵamkuwerera mu charu chawo.” Ntheura ndimo FUMU yikuyowoyera.

¹⁸“Ndapulika Efurayimu ŵakutengera wakuti, ‘Mwandilanga, ndipo ndalangika nadi, nga ndi mwana wa ng'ombe wambula kusambizgika. Ndiwezgani kuti ndimanye kuwerako, pakuti imwe ndimwe FUMU, Chiuta wane.

¹⁹Para nkhati ndapuruka, nkhaŵa na chitima. Para nkhasambizgika, nkhajitimba pa chifuŵa. Nkhachita soni, ndipo nkhakatimbanizgika, chifukwa nkhayegha kulengeskeka kwa pa uwukirano wane.’

²⁰Asi Efurayimu ndi mwana wane wakutemweka? Asi ndi mwana wane wa pa mtima? Pakuti nanga kaŵirikaŵiri, nkhuyowoya vyakumususka, ndipouli nkhumukumbuka ndipera. Ntheura mtima wane ukumunwekera iyo. Nadi nditi ndimulengerenge lusungu.” Ntheura ndimo FUMU yikuyowoyera.

²¹“Yimika vimanyikwiro vya nthowa, yimika mizati yakukurongozga. Ughanaghanenge za msewu ukuru, msewu uwo ukendamo pakuruta. Wererani imwe ŵaIsraele, ŵanthu ŵane ŵakulangwa werera ku misumba yako yira.

²²Kasi uti uziwurike mpaka pauli, iwe wa munthu wambula chipulikano? FUMU yalenga chinthu chiphya, pa charu cha pasi: mwanakazi ndiyo wakuvikirira mwanarume.”

²³FUMU Mwenenkhongono zose, Chiuta wa Israele, wakuti, “Para ŵanthu ŵane ndaŵawezga kufuma ku umikori, ŵizamkuyowoyaso mazgu agha mu charu cha Yuda na mu misumba yakhe ghakuti: ‘FUMU yikutumbike, iwe chikhazi cha urunji, iwe phiri lakupatulika.’

²⁴Ŵanthu ŵizamkukhara mu charu cha Yuda na mu misumba yakhe yose. Ŵanji ŵamkuŵa ŵalimi ndipo ŵanji ŵamkuŵa ŵaliska ŵa viŵeto.

²⁵Pakuti ndamkuwezgeramo nkhongono mwa awo mbakuvuka, ndipo awo ŵali na njara ndizamkuŵakhutiska.”

²⁶Penepapo nkhawuka na kulaŵiska, ndipo nkhawona kuti ndagona tulo tuweme.

²⁷FUMU yikuti, “Mazuŵa ghakwiza apo ndizamkwandaniska ŵanthu na viŵeto mu ŵaIsraele na ŵaYuda.

²⁸Ndipo nga ndi umo nkhapimira kuŵazgura, kuŵabwangandula, kuŵawiskira pasi na kuŵaparanya, kuŵakoma na kuŵachitira uheni, ntheuraso ndimo nditi ndiŵazengere na kuŵapandaso.” Ntheura ndimo FUMU yikuyowoyera.

²⁹“Mu mazuŵa gheneghara ŵamkuyowoyaso chara kuti, ‘Ŵadada ŵarya mpheska zakunchanchamira, ndipo mino gha ŵana ghakunyenyera.’

³⁰Kweni munthu yose wafwenge chifukwa cha zakwananga zakhe na zakhe. Munthu uyo wakurya mpheska zakunchanchamira, mino ghakhe ndigho ghati ghanyenyerenge.”

³¹FUMU yikuti, “Mazuŵa ghakwiza apo ndizamkuchita phangano liphya na ŵaIsraele na ŵaYuda.

³²Phangano leneili kuti lizamkuyana na ilo nkhachita na ŵawiskewokuru chara para nkhaŵakora pa woko pakuŵafumiska mu charu cha Eguputo. Iwo ŵakaswa phangano lira nangauli nkhaŵa nga ndi mufumu wawo.” Ntheura ndimo FUMU yikuyowoyera.

³³FUMU yikuti, “Kweni phangano ilo ndamkuchita na ŵaIsraele pamanyuma pa mazuŵa gheneghara, ndakuti, ‘Ndamkuŵika dango lane mukati mwawo, ndipo ndamkulilemba mu mitima yawo. Ine ndamkuŵa Chiuta wawo, ndipo iwo nawo ŵamkuŵa ŵanthu ŵane.’

³⁴Kwizamkuŵavye munthu wakusambizga muzengezgani wakhe nanga ndi munthu kuti wasambizge mubali wakhe kuti, ‘Uyimanye FUMU.’ Pakuti wose ŵamkundimanya ine, kufuma pa ŵachoko chomene mpaka pa ŵarara chomene. Pakuti ndamkuŵagowokera maubendezi ghawo, ndipo kuti ndamkumbukaso zakwananga zawo chara.” Ntheura ndimo FUMU yikuyowoyera.

³⁵Icho FUMU yikuyowoya, yeneiyo yikupereka dazi, kuti liŵalenge na muhanya, yeneiyo yikulangula mwezi na nyenyezi kuti viŵalenge na usiku, yeneiyo yikuwuska nyanja kuti majigha ghakhe ghakupoma, FUMU Mwenenkhongono zose ndilo zina lakhe, yikuti:

³⁶“Mphapu ya Israele kuti yimarengepo chara kuŵa fuko panthazi pane. Ichi chingachitika pekhapekha usange ndondomeko ya kaŵiro iyi, yikuwuskikako panthazi pane muyirayira.” Ntheura ndimo FUMU yikuyowoyera.

³⁷FUMU yikuti, “Ine kuti nditayengepo mphapu yose ya Israele chara, chifukwa cha vyose ivyo ŵali kuchita. Ichi chingachitika pekhapekha, usange mtambo kuchanya ungapimika, ndipo malufura gha charu cha pasi ghangamanyikwa.” Ntheura ndimo FUMU yikuyowoyera.

³⁸FUMU yikuti, “Mazuŵa ghakwiza apo ŵizamkuzengaso msumba FUMU, kufuma ku Chigongwe cha Hananele mpaka ku Chipata cha pa Chingodya.

³⁹Mzere wa mphaka wizamkujumphirako kuya kafika ku Phiri la Garebu, ndipo wamkuzgoka kurazga ku Gowa.

⁴⁰Dambo lose umo ŵakutaya vitanda na vyoto, ndiposo na minda yose kufuma ku kamronga ka Kidironi mpaka ku Chingodya cha Chipata cha mahachi, cha ku mafumiro gha dazi, vyose vyamkuŵa vyakupatulikira FUMU. Kuti ghamkuzgurikaso chara nanga nkhubwanganduka kwa muyirayira.”