Read new_tumbuka_bible Yeremiya 32 Bible Online

Yeremiya 32 - new_tumbuka_bible bible

Yeremiya 32

¹Mazgu agho ghakiza kwa Yeremiya kufumira kwa FUMU mu chirimika cha khumi cha kuwusa kwa Zedekiya, karonga wa charu cha Yuda. Ichi chikaŵa chirimika cha 18 cha kuwusa kwa Nebukadinezara, karonga wa ku Babuloni.

²Pa nyengo yira ŵasilikari ŵa Karonga Nebukadinezara ŵakazingirizga msumba wa Yerusalemu. Nchimi Yeremiya nayo wakaŵa kuti ŵamujalira mu baraza la ŵalinda mu nyumba ya ufumu ya charu cha Yuda.

³Pakuti Karonga Zedekiya wakamujalira Yeremiya mu gadi. Zedekiya wakati, “Chifukwa uli iwe ukuchima pakuyowoya kuti, FUMU yikuti, ‘Msumba uwu ndiwuperekenge mu mawoko gha karonga wa charu cha Babuloni, ndipo iyo wizamkuwupoka.

⁴Zedekiya kuti wizamkupona ku mawoko gha ŵaBabuloni chara. Iyo wizamkuperekeka nadi mu mawoko gha karonga wa charu cha Babuloni. Wizamkuwonana nayo maso na maso na kuyowoyeskana.

⁵Zedekiya wizamkutorekera ku Babuloni. Wamkukhara kwenekura ndisuke ndimulange. Nanga wangarwa na ŵaBabuloni, iyo kuti wamkuŵathereska chara. Ntheura ndimo FUMU yikuyowoyera.’ ”

⁶Yeremiya wakati, “Mazgu gha FUMU ghakiza kwa ine ghakati:

⁷Hanamele, mwana wa Shalumu, sibweni wako, wati wize kwa iwe na kuyowoya kuti, ‘Gula munda wane uwo uli ku Anatoti, pakuti mazaza gha kugula na kuwombola munda uwu ghali na iwe.’

⁸Penepapo Hanamele, muvyara wane wakiza mu baraza la ŵalinda ku nyumba ya ufumu kwakuyana na umo FUMU yikayowoyera. Iyo wakati kwa ine, ‘Gula munda wane uwo uli ku Anatoti mu charu cha Benjamini, pakuti mazaza ngako gha kuŵira na munda ura ndiposo na gha kuwuwombolera.’ Penepapo nkhamanya kuti gheneagha ghakaŵa mazgu gha FUMU.”

⁹“Ntheura nkhagula munda ura ku Anatoti kufuma kwa Hanamele muvyara wane. Mtengo wakhe ukaŵa ndarama za siliva zakukwana 17.

¹⁰Nkhasayina phangano na kumata pa maso pa ŵakaboni, ndipo nkhapima ndarama zira pa sikelo.

¹¹Pamanyuma nkhatora makarata ghane gha phangano la kugulira munda ura, yumoza wakumatika umo mukaŵa mazgu ghose gha phangano, ndipo munyakhe wambula kumata.

¹²Makarata ghara nkhaghapereka kwa Baruki mwana wa Neriya, muzukuru wa Maaseya, panthazi pa Hanamele muvyara wane, na panthazi pa ŵakaboni awo ŵakasayina makarata gha phangano la kugulira munda ura, ndiposo na panthazi pa ŵaYuda wose awo ŵakakhara mu baraza la ŵalinda, mu nyumba ya ufumu.

¹³Sono nkhamuphalira Baruki panthazi pa iwo wose kuti:

¹⁴FUMU Mwenenkhongono zose, Chiuta wa Israele wakuti, ‘Tora makarata agha gha phangano la kugulira munda, wakumatika na wambula kumatika, ndipo uŵaŵike mu chiŵiya mwakuti ŵasungilirike kwa nyengo yitali.’

¹⁵Pakuti FUMU Mwenenkhongono zose, Chiuta wa Israele, wakuti, ‘Mu charu ichi, ŵanthu ŵizamkuzengaso zinyumba, ŵizamkulima minda ndiposo na kupanda mpheska.’

¹⁶“Nkhati ndapereka karata wa phangano la kugulira kwa Baruki, mwana wa Neriya, nkharomba kwa FUMU, nkhati,

¹⁷“ ‘Okwe FUMU Chiuta, imwe ndimwe muli kulenga mtambo na charu cha pasi na nkhongono zinu zikuru ndiposo na woko linu lakutambazuka. Palije kanthu ako nkhanonono kwa imwe.

¹⁸Imwe mukurongora chisungusungu ku ŵanthu vikwivikwi, kweni mukulanga ŵana chifukwa cha zakwananga za ŵawiskewokuru. Imwe Chiuta mukuru na wankhongono, mwaŵeneimwe zina linu ndimwe FUMU Mwenenkhongono zose.

¹⁹Ndimwe mukuru mu urongozgi na wa nkhongono mu milimo. Maso ghinu ghakuwona mendero ghose gha ŵanthu ndipo munthu yose mukumupa njombe yakuyana na mendero ghakhe na vipambi vya milimo yakhe.

²⁰Imwe mukarongora vimanyikwiro na vyakuzizwiska mu charu cha Eguputo, ndipo mpaka sono muchali kuvichita mu charu cha Israele na mukati mu mafuko ghose gha ŵanthu. Ntheura mwathuwuska zina linu nga ndi umo kuliri muhanya uno.

²¹Imwe mukafumiska ŵanthu ŵinu ŵaIsraele mu charu cha Eguputo kwizira mu vimanyikwiro na vyakuzizwiska, ndiposo na woko linu lankhongono, na la kutambazuka.

²²Ndimwe mukaŵapa charu ichi, charu cha mkaka na uchi, icho mukarapa kuŵapa ŵawiskewokuru.

²³Ndipo iwo ŵanjiramo na kuchipoka kuŵa chiharo chawo. Kweni kuti ŵakamupulikirani imwe chara, nesi kusunga marango ghinu. Iwo ŵalije kuchitapo kalikose pa ivyo mukaŵalangula. Pa chifukwa ichi ndimo mwachitira kuti uheni wose uwu wize pa iwo.

²⁴“ ‘Wonani ŵarwani ŵazingirizga msumba na vibumira vya nkhondo kuti ŵawupoke. Ndipo chifukwa cha nkhondo, njara, na nthenda yakofya msumba uwu uti uperekeke mu mawoko gha ŵaBabuloni, ŵeneawo ŵakulimbana nawo. Ivyo mukayowoya vyafiskika, nga ndi umo imwe mukuviwonera.

²⁵Ndipouli imwe, Mwe FUMU Chiuta mwandilangula kuti ndigule munda uwu ndipo ndiŵe na ŵakaboni, nangauli msumba uwu uti uperekeke mu mawoko gha ŵaBabuloni.’ ”

²⁶Mazgu gha FUMU yikiza kwa Yeremiya ghakati,

²⁷“Ine ndine FUMU, Chiuta wa ŵanthu wose. Kasi pali kanthu ako nkhanonono chomene kwa ine?

²⁸Ntheura FUMU yikuti, ‘Ine nkhupereka msumba uwu mu mawoko gha ŵanthu ŵa ku Babuloni na mu mawoko gha Nebukadinezara, karonga wa charu cha Babuloni. Iyo wizamkuwupoka.

²⁹ŴaBabuloni awo ŵakurwa nkhondo na msumba uwu ŵizamkunjiramo na kuwuwocha na moto. Ŵizamkochaso na nyumba zose izo pa mitenje pakhe ŵanthu wocherangapo vyakununkhira kwa chiuta Baala ndiposo na kuperekerapo sembe ya vyakumwa ku ŵachiuta ŵanyakhe, mwakuti ŵandavyire ku ukari.

³⁰Pakuti ŵa mphapu ya Israele na ya Yuda ŵakuchita kanthu kanyakhe chara, kweni vinthu viheni panthazi pane kufuma ku wanichi wawo. ŴaIsraele ŵakuchita kanthu kanyakhe chara, kweni kundavyira ku ukari na milimo yawo.’ ” Ntheura ndimo FUMU yikuyowoyera.

³¹“Msumba uwu wawuska ukari wane na kucheruka kwane kufuma apo ukazengekera mpaka muhanya uno. Ntheura nditi ndiwufumyepo panthazi pane.

³²ŴaIsraele na ŵaYuda, ŵandavyira ine ku ukari chifukwa cha uheni uwo ŵakuchita: Iwo na ŵakaronga ŵawo, nduna zawo, ŵasofi ŵawo na nchimi zawo, ŵeneawo ŵakukhara mu charu cha Yuda na mu msumba wa Yerusalemu.

³³Pakuti ŵandirazgira nkhonyoro, mu malo mwa kurazga visko kwa ine. Nangauli ndili kuŵasambizga kaŵirikaŵiri, kweni ŵalije kupulikira kuti ŵasambirepo kanthu.

³⁴Iwo ŵaŵika vikozgo vyawo vyakuseruska mu nyumba iyo yikuchemeka na zina lane, kuti ŵayikazuzge.

³⁵Ŵakazenga malo gha pachanya ghakusoperako Baala mu Dambo la Hinomu, kuti ŵaperekerengeko ŵana ŵawo ŵanarume na ŵanakazi kwa chiuta ngoza Moleki. Ine kuti nkhaŵalangula chara nesi kughanaghana kuti ŵachite vinthu vya ukazuzi ivi, na kunangiska ŵaYuda.”

³⁶“Ntheura FUMU, Chiuta wa Israele wakuti pa vya msumba uwu, weneuwo imwe mukuti waperekeka mu mawoko gha karonga wa charu cha Babuloni kwizira mu nkhondo, na njara ndiposo na nthenda yakofya,

³⁷‘Wonani, ndamkuŵawunganya wose, kufuma mu vyaru ivyo nkhaŵachimbizgiramo mu ukari wane, mu kucheruka kwane, na mu kukwiya kukuru. Ndamkuŵawezgeraso mu malo gheneagha, ndipo ndamkuŵakharika mu kufwasa.

³⁸Ŵizamkuŵa ŵanthu ŵane ndipo ine nane ndizamkuŵa Chiuta wawo.

³⁹Ndizamkuŵapa mtima umoza na nthowa yimoza, mwakuti ŵachindikenge ine kwa muyirayira, chifukwa cha uweme wawo na wawo na wa ŵana ŵawo pamanyuma pawo.

⁴⁰Ndizamkuchita phangano la muyirayira na iwo mwakuti ndizamkureka kuŵachitira uweme chara. Ndizamkuŵika mwa iwo mtima wakundichindika mwakuti ŵareke kufumako kwa ine.

⁴¹Ndizamkukondwa kuŵachitira uweme. Ndizamkuŵapanda mu charu ichi mwakugomezgeka na mtima wane wose ndiposo na mzimu wane wose.’ ”

⁴²FUMU yikuti, “Nga ndi umo ndatorera suzgo yose yikuru pa ŵanthu aŵa, ntheura ndimo ndizamkutorera pa iwo uweme wose uwo nkhupangana kwa iwo.

⁴³Ŵanthu ŵizamkugula minda mu charu ichi cheneicho mukuchiyowoya kuti ncha mapopa, chambula ŵanthu na vinyama, chifukwa chaperekeka mu mawoko gha ŵaBabuloni.

⁴⁴Ŵanthu ŵizamkugula minda na ndarama. Makarata ŵakugulira minda ŵizamkusayinika na kumatika panthazi pa ŵakaboni wakhe. Ichi chizamkuchitika mu charu chose cha Benjamini, mu mizi pafupi na Yerusalemu, mu misumba ya charu cha Yuda, mu misumba ya charu cha mapiri, mu misumba ya mu dambo, na mu misumba ya ku mwera. Pakuti ine ndizamkuŵawezgera mauweme ghawo.” Ntheura ndimo FUMU yikuyowoyera.