Read new_tumbuka_bible Yeremiya 33 Bible Online

Yeremiya 33 - new_tumbuka_bible bible

Yeremiya 33

¹Mazgu gha FUMU ghakiza kwa Yeremiya kachiŵiri apo wakaŵa wachali kujalirika mu baraza la ŵalinda mu nyumba ya ufumu, ghakati,

²“FUMU iyo yikalenga charu cha pasi, FUMU iyo yikachiwumba na kuchikhozga, yeneiyo zina lakhe ndi FUMU, yikuti,

³‘Romba kwa ine ndipo nditi ndikuzgorenge. Nditi ndikuphalire vinthu vikuru na vyakubisika, vyeneivyo undavimanye.’

⁴FUMU, Chiuta wa Israele wakuti pa vya nyumba za mu msumba uwu, na nyumba za ufumu za mu charu cha Yuda izo ŵakabwangandula pasi kuti ŵazengere vibumira vya msumba pa nyengo ya nkhondo:

⁵ŴaBabuloni ŵakwiza kuti ŵarwe nawo nkhondo ndipo nyumba zakhe zamkuzura na vitanda vya ŵanthu ŵeneawo nditi ndiŵakomere mu ukari wane na mu kucheruka kwane. Ndajibisa ku msumba uwu chifukwa cha maubendezi gha ŵanthu ŵakhe.

⁶Ndipouli, nditi ndiwuzgore msumba kuŵa wa msuma na wakuchizga. Ŵanthu ŵakhe ndizamkuŵachizga na kuŵapa viweme vyakuzara na chivikiriro.

⁷Ndizamkuwezgeramo mauweme mu charu cha Yuda na cha Israele, ndipo ndizamkuŵazenga kuti ŵaŵe nga ndi umo ŵakaŵira pakudanga.

⁸Ndizamkuŵatozga ku ubendezi wawo na kwananga kwawo kose uko ŵakandichitira. Ndizamkuŵagowokera ubendezi wawo uwo ŵakandinangira pakundigarukira ine.

⁹Msumba uwu uti unditorere zina la chimwemwe, marumbo na uchindami ku mafuko ghose gha mu charu cha pasi, gheneagho ghamkupulika viweme vyose ivyo ndamkuŵachitira. Mafuko ghamkuwopa na kutenthema chifukwa cha mauweme na mutende wakuzara uwo ndamkuwutorera msumba uwu.”

¹⁰FUMU yikuti, “Imwe mukuti vya malo agha, ‘Ndi malo gha mapopa, ghambula ŵanthu na vinyama vyakukharamo’. Ndipouli mu misumba ya charu cha Yuda na mu misewu ya mu msumba wa Yerusalemu, umo mwakhara mayiyi kwambula ŵanthu na vinyama vyakukharamo, mwenemumo ndimo mwamkupulikikwaso,

¹¹mazgu gha kukondwa na gha kusekerera, mazgu gha mwene-nthengwa na gha mutengwa, mazgu gha awo ŵakwimba para ŵakwiza kapereka sembe za kuwonga ku Nyumba ya Chiuta, kuti, ‘Rumbani FUMU Mwenenkhongono zose, pakuti FUMU njiweme, pakuti chisungusungu chakhe chikukhalirira kwa muyirayira.’ Ndizamkuwezgeramo mauweme gha charu nga mphakudanga.” Ntheura ndimo FUMU yikuyowoyera.

¹²FUMU Mwenenkhongono zose yikuti, “Mu malo gheneagha gha mapopa, ghambula ŵanthu na vinyama vyakukharamo, mu misumba yakhe yose, mwizamkuŵamo malo ghakukhara ŵaliska na ghakupumuliramo mberere zawo.

¹³Mu misumba ya charu cha mapiri, mu misumba ya mu chidika, mu misumba ya ku mwera, mu charu cha Benjamini, mu mizi kuzingirizga Yerusalemu, na mu charu cha Yuda, ŵaliska ŵizamkupendaso vyakuŵeta vyawo.” Ntheura ndimo FUMU yikuyowoyera.

¹⁴FUMU yikuti, “Wonani, mazuŵa ghakwiza apo ndizamkufiska phangano ilo nkhachita na ŵaIsraele na ŵaYuda.

¹⁵Mu mazuŵa gheneagho, ndiposo na pa nyengo yeneiyo, ndizamkumezga munthavi wa urunji kufuma ku mbumba ya Davide. Iyo wizamkweruzga charu mu kunyoroka na mu urunji.

¹⁶Mu mazuŵa gheneagho, charu cha Yuda chizamkuponoskeka ndipo Yerusalemu wizamkukhara mu mutende. Ndipo zina ilo wizamkuchemeka nalo ndakuti, ‘FUMU ndiyo urunji withu.’ ”

¹⁷Pakuti FUMU yikuti, “Davide kuti wati wakavukepo munthu wakukhara pa chizumbe cha fuko la Israele chara.

¹⁸Ŵasofi ŵa fuko la Levi nawo kuti ŵamkukavukaso chara munthu wakupereka sembe zakocha mburuma panthazi pane, nesi munthu wakocha sembe ya ufu, na wakundichitira sembe zinyakhe kwa muyirayira.”

¹⁹Mazgu gha FUMU ghakiza kwa Yeremiya, ghakati,

²⁰“FUMU yikuti, ‘Usange mungaswa phangano ilo nkhachita na muhanya na phangano ilo nkhachita na usiku, mwakuti muhanya na usiku vireke kwiza pa nyengo yawo yakwimikika,

²¹ntheura phangano lane na Davide, muteŵeti wane lingasweka, mwakuti wareke kuŵa na mwana wakwiza kawusa pa chizumbe chakhe. Phangano lane na ŵasofi ŵa nyumba ya Levi, ŵateŵeti ŵane nalo lingasweka.

²²Ndizamkwandaniska mphapu ya Davide muteŵeti wane, ndiposo na ya ŵasofi ŵa fuko la Levi, awo ŵakunditeŵetera ine, kuŵa ŵanandi, ŵambula kupendeka nga ndi nyenyezi kuchanya, panji nga ndi muchenga wa mu nyanja.’ ”

²³Mazgu gha FUMU ghakizaso kwa Yeremiya ghakati,

²⁴“Kasi undachipulikepo icho ŵanthu aŵa ŵakuyowoya kuti, ‘FUMU yapata Israele na Yuda, mbumba ziŵiri izo yikasora’? Ntheura ŵakuŵayuyura ŵanthu ŵane, mwakuti ŵakuŵapimaso kuŵa fuko panthazi pawo chara.

²⁵FUMU yikuti: Usange ndirekenge kuchita phangano na muhanya na usiku ndiposo na kuŵika marango kuwusa mtambo na charu cha pasi,

²⁶ipo nditi ndiyipate mphapu ya Yakhobe na ya Davide, muteŵeti wane, ndipo kuti nditi ndisankhengepo yumoza wa mphapu yakhe chara kuti wawuse ŵa mu mphapu ya Abrahamu, Yisake na Yakhobe. Ine ndizamkuŵalengera lusungu na kuŵawezgeraso mauweme.”