Read new_tumbuka_bible Yeremiya 34 Bible Online

Yeremiya 34 - new_tumbuka_bible bible

Yeremiya 34

¹Agha ndi mazgu gha FUMU agho ghakiza kwa Yeremiya para Nebukadinezara, karonga wa charu cha Babuloni na ŵasilikari ŵakhe wose, maufumu ghose gha charu cha pasi agho iyo wakawusanga, ndiposo na ŵamitundu yose, ŵakarwanga nkhondo na Yerusalemu na misumba yakhe yose.

²FUMU, Chiuta wa Israele wakuti, “Ruta kwa Zedekiya, karonga wa charu cha Yuda, ndipo ukati kwa iyo, ‘FUMU yikuti: Msumba uwu nditi ndiwupereke mu mawoko gha karonga wa charu cha Babuloni ndipo iyo wati wawuwoche pa moto.

³Iwe kuti uponenge kwa iyo chara. Uti ukoreke na kuperekeka mu mawoko ghakhe. Wamkumuwona karonga wa charu cha Babuloni maso na maso ndipo wamkuyowoyeskana nayo. Pamanyuma iwe wizamkutorekera ku Babuloni.’

⁴Kweni pulika mazgu gha FUMU, iwe Zedekiya, karonga wa charu cha Yuda. Pa vya iwe, FUMU yikuti: Iwe kuti wizamkufwa na nkhondo chara.

⁵Kweni iwe wizamkufwa mu mutende. Nga ndi umo ŵanthu ŵakochera vyakununkhira ku ŵasekuru ŵako, awo ŵakaŵa ŵakaronga pambere iwe, mwa ntheura pera, ŵizamkukochera vyakununkhira na kukutengerera pakuyowoya kuti, ‘Okwe mwe, sekuru withu!’ Ine ndine nkhuyowoya mazgu agha.” Ntheura ndimo FUMU yikuyowoyera.

⁶Penepapo nchimi Yeremiya wakaya kaphara mazgu ghose agha kwa Zedekiya karonga wa charu cha Yuda ku Yerusalemu.

⁷Pa nyengo iyi ndipo ŵasilikari ŵa karonga wa charu cha Babuloni ŵakarwanga na Yerusalemu na misumba yose ya mu charu cha Yuda iyo yikakharako, nga ndi msumba wa Lakishi na wa Azeka. Iyi ndiyo yekha iyo yikaŵa na malinga mu charu cha Yuda yeneiyo yikakharapo.

⁸Mazgu ghakiza kwa Yeremiya kufuma kwa FUMU, Karonga Zedekiya wati wachita phangano na ŵanthu wose ŵa mu Yerusalemu kuphara za wanangwa uwo wakati waperekenge.

⁹Wakalangula kuti wose awo ŵakaŵa na ŵazga awo mbaHebere, ŵanarume na ŵanakazi, ŵaŵasutule. Kuŵavyeso na yumoza wamuŵike mu uzga mwana munyakhe uyo ndi muYuda.

¹⁰Ŵanthu wose na nduna wuwo ŵakapulikira, ndipo ŵakapangana kuti waliyose wasutule muzga wakhe, mwanarume panji mwanakazi, na kuti ŵareke kwiza kaŵaŵikaso mu uzga. Iwo ŵakapulikira ndipo ŵakaŵasutula.

¹¹Kweni pamanyuma ŵakasintha maghanoghano ghawo. Ŵakatoraso ŵazga ŵara ŵanarume na ŵanakazi, ŵeneawo ŵakaŵasutula, na kuŵaŵikaso mu uzga.

¹²Penepapo mazgu gha FUMU agho ghakiza kwa Yeremiya ghakati

¹³FUMU, Chiuta wa Israele wakuti, “Ine nkhachita phangano na ŵasekuru ŵinu para nkhaŵafumyanga mu charu cha Eguputo, charu cha uzga chira, nkhati,

¹⁴‘Pa umaliro wa virimika vinkhonde na viŵiri vilivyose, waliyose wa imwe wakwenera kumusutula muHebere munyakhe uyo wakaguliskika kwa iyo. Para wamara kukuteŵetera virimika vinkhonde na chimoza, umusutule ku nchito zakhe. Ndipouli ŵasekuru ŵinu kuti ŵakandipulikira ine chara, nesi kutegherezgako kwa ine.

¹⁵Kweni sonosono apa mwazgoka ndipo mwachita icho nchiweme panthazi pa ine. Waliyose wa imwe wapharazga kupereka wanangwa kwa munyakhe. Mwachita phangano panthazi pa ine mu nyumba iyo yikuchemeka na zina lane.

¹⁶Kweni imwe mwazgokaso na kukazuzga zina lane. Waliyose wa imwe watoraso ŵazga ŵakhe ŵanarume na ŵanakazi, awo mukamusutula kuti ŵarute kose uko ŵakakhumbanga. Mwaŵachichizga kuti ŵaŵeso ŵazga ŵinu.’ ”

¹⁷Ntheura FUMU yikuti, “Imwe mukandipulikira chara pakuti mukareka kupharazga wanangwa kuti musutule ŵana ŵanyinu na ŵazengezgani ŵinu.” Sono FUMU yikuti, “Nditi ndipharazge wanangwa kwa imwe, wanangwa kuti mukomeke na lupanga, na nthenda yakofya ndiposo na njara. Nditi ndimuzgorani kuŵa chinthu chakuseruska ku maufumu ghose gha mu charu cha pasi.

¹⁸Ŵanthu awo ŵakaswa phangano lane, ŵeneawo kuti ŵakafiska machitiro gha phangano ilo ŵakapangana panthazi pane chara, nditi ndiŵazgore kuŵa nga ndi kankhambako ako ŵadumula paŵiri ndipo iwo ŵakajumphanga pakati pa vipikita vyakhe.

¹⁹Awo ŵakajumphanga pakati pa vipikita vira ŵakaŵa nduna za mu charu cha Yuda na ŵa mu msumba wa Yerusalemu, zinthunguli, ŵasofi na ŵanthu wose ŵa mu charu awo ŵakachita phangano na ine.

²⁰Wose nditi ndiŵapereke mu mawoko gha ŵarwani ŵawo awo ŵakupenja umoyo wawo. Vitanda vyawo vyamkuŵa chakurya cha viyuni vya mudera na vikoko vya mu thengere.

²¹Ndamkumupereka Zedekiya, karonga wa charu cha Yuda pamoza na nduna zakhe, mu mawoko gha ŵarwani ŵawo awo ŵakupenja umoyo wawo, ndiposo na mu mawoko gha ŵasilikari ŵa karonga wa charu cha Babuloni, iwo ŵareka danga kurwa namwe.”

²²FUMU yikuti, “Nditi ndiŵalangure kuti ŵawerereso mu msumba uwu. Ŵati ŵarwe nkhondo na kuwupoka, na kuwuwocha pa moto. Ntheura misumba ya mu charu cha Yuda yizamkuzgoka kuŵa mapopa na yambula kukharamo ŵanthu.”