Read new_tumbuka_bible Yeremiya 35 Bible Online

Yeremiya 35 - new_tumbuka_bible bible

Yeremiya 35

¹Mazgu agho ghakiza kwa Yeremiya kufuma kwa FUMU pa nyengo iyo Yehoyiyakimu, karonga wa charu cha Yuda, mwana wa Yosiya, ghakaŵa agha:

²“Ruta ku mbumba ya ŵaRekabu, ukayowoye nawo. Pamanyuma ukaŵachemere mu chipinda chimoza cha Nyumba ya FUMU na kuŵapa vinyo kuti ŵamwe.”

³Penepapo nkhatora mbumba yose ya ŵaRekabu, Yaazaniya, mwana wa Yeremiya munyakhe, mwana wa Habaziniya, na ŵana ŵanyakhe, ndiposo na ŵana ŵakhe wose ŵanarume.

⁴Ndipo nkhiza nawo mu Nyumba ya FUMU, mu chipinda cha ŵana ŵa Hanani, mwana ŵa Igidaliya, munthu wa Chiuta. Chipinda ichi chikaŵa pafupi na chipinda cha nduna, pachanya pa chipinda cha Maaseya, mwana wa Shalumu, mulinda wa pa muryango.

⁵Penepapo nkhaŵakharikira ŵaRekabu viŵiya vyakuzura na vinyo ndiposo na nkhombo za ku mwera. Nkhati kwa iwo, “Vinyo uyu, mwaninge.”

⁶Kweni iwo ŵakazgora ŵakati, “Ise kuti tikumwa vinyo chara pakuti Yehonadabu, sekuru withu, mwana wa Rekabu, wakatilangula wakati, ‘Mungamwanga vinyo, imwe panji ŵana ŵinu kwa muyirayira.

⁷Mungazenganga nyumba, nesi kuseŵa mbuto, nanga nkhupanda mpheska. Kweni mukharenge waka mu mahema ghinu mazuŵa ghose gha umoyo winu, mwakuti mazuŵa ghinu ghaŵenge ghanandi mu charu icho mukukharamo.’

⁸Ise tili kupulikira mazgu gha Yehonadabu, sekuru withu, mwana wa Rekabu, mu vyose ivyo wali kutilangula, kuti tireke kumwa vinyo mu umoyo withu wose, ise, ŵawoli withu, ndipo na ŵana ŵithu ŵanarume na ŵanakazi.

⁹Wali kutilangula kuti tireke kuzenga nyumba zakukharamo, tireke kulima minda ya mpheska, nesi kuŵa na munda uliwose, nesi mbuto pera.

¹⁰Ise tikukhara mu mahema pera, ndipo taŵa ŵakupulikira na kuchita vyose ivyo sekuru withu Yehonadabu wakatilangula.

¹¹Kweni para Nebukadinezara, karonga wa charu cha Babuloni wakiza kuti warwe nkhondo na charu ichi, ise tikati, ‘Tiyeni tirute ku Yerusalemu, chifukwa tikopa ŵasilikari ŵa ku Babuloni na ŵaSiriya.’ Ichi ndicho chifukwa ise tikukhalira mu Yerusalemu.”

¹²Penepapo mazgu gha FUMU ghakiza kwa Yeremiya, ghakati,

¹³“FUMU Mwenenkhongono zose, Chiuta wa Israele wakuti: Ruta ukayowoye na ŵaYuda na awo ŵakukhara mu Yerusalemu kuti, ‘Kasi mukukhumba kusambira chisambizgo na kutegherezga ku mazgu ghane chara?’ ” Ntheura ndimo FUMU yikuyowoyera.

¹⁴“Languro ilo Yehonadabu, mwana wa Rekabu, wakaŵapa ŵana ŵakhe kuti ŵareke kumwa vinyo, liri kusungilirika. Nanga ndi sono kuti ŵakumwa vinyo chara, pakuti ŵali kupulikira dango la ŵawiskewokuru. Ine ndayowoya namwe kaŵirikaŵiri, kweni mulije kundipulikira.

¹⁵Kaŵirikaŵiri ndamutumizgiraninge nchimi, ŵateŵeti ŵane wose. Iwo ŵamuphaliraninge kuti, ‘Waliyose wa imwe wawereko ku mendero ghakhe ghaheni, wanozge machitiro ghakhe. Mureke kusopa ŵachiuta ŵanyakhe nesi kuŵateŵetera.’ Penepapo ndipo mwamkukhara mu charu icho nkhamupani imwe na ŵawiskemwekuru. Kweni kuti mukategherezga makutu ghinu chara, nesi kundipulikira ine.

¹⁶Ŵana ŵa Yehonadabu, mwana wa Rekabu, ŵasungilira languro ilo wiskewokuru ŵakaŵapa, kweni ŵanthu aŵa kuti ŵali kundipulikira ine chara.

¹⁷Pa chifukwa ichi, FUMU, Chiuta Mwenenkhongono zose, Chiuta wa Israele wakuti, ‘Wonani, nditi ndikhizgire viheni vyose ivyo ndili kuyowoya kususkana nawo pa charu cha Yuda na pa wose awo ŵakukhara mu Yerusalemu, pakuti iwo kuti ŵali kundipulikira ine chara. Ine nkhaŵachema, kweni kuti ŵakazgora chara.’ ”

¹⁸Penepapo Yeremiya wakati ku ŵa mbumba ya Rekabu, “FUMU Mwenenkhongono zose, Chiuta wa Israele wakuti, ‘Pakuti mwapulikira wiskemwe Yehonadabu na kusunga languro lakhe lose, ndipo mwachita vyose ivyo wakamulangulani.’

¹⁹Ntheura FUMU Mwenenkhongono zose, Chiuta wa Israele wakuti, ‘Yehonadabu, mwana wa Rekabu kuti wakavukenge munthu chara wakunditeŵetera ine.’ ”