Read new_tumbuka_bible Yeremiya 36 Bible Online

Yeremiya 36 - new_tumbuka_bible bible

Yeremiya 36

¹Mu chirimika cha chinayi cha kuwusa kwa Yehoyiyakimu, karonga wa charu cha Yuda, mwana wa Yosiya, mazgu agha ghakiza kwa Yeremiya kufumira kwa FUMU:

²“Tora buku ndipo ulembepo mazgu ghose agho ndayowoya kwa iwe ghakususkana na charu cha Israele, cha Yuda, na mafuko ghose, kufuma zuŵa ilo nkhayowoya nawe, pa nyengo ya kuwusa kwa Yosiya mpaka muhanya uno.

³Panyakhe ŵaYuda ŵati ŵapulike viheni vyose ivyo nditi ndiŵachitire, mwakuti ŵawereko ku mendero ghawo ghaheni. Ntheura nditi ndiŵagowokere maubendezi ghawo na kwananga kwawo.”

⁴Penepapo Yeremiya wakachema Baruki, mwana wa Neriya, ndipo Baruki wakalemba mu buku mazgu ghose agho Yeremiya wakamuphaliranga, ndiko kuti mazgu ghose agho FUMU yikayowoya kwa iyo.

⁵Yeremiya wakati kwa Baruki, “Ine ndakanizgika kuruta ku Nyumba ya FUMU.

⁶Ntheura iwe urute ku Nyumba ya Chiuta pa zuŵa lakuziŵizgira kurya. Ukaŵazge panthazi pa ŵanthu wose mu Nyumba ya Chiuta, mazgu gha FUMU kufuma mu buku agho ukalembanga para nkhakuphaliranga. Ukaŵazgeso panthazi pa ŵanthu wose ŵa charu cha Yuda awo ŵakwiza kufuma ku misumba yawo.

⁷Panyakhe ŵanthu ŵamkuŵeya kwa FUMU na kuwerako ku mendero ghawo ghaheni, pakuti FUMU yachenjezga ŵanthu ŵakhe na ukari ukuru ndiposo na kutukutwa uko yayowoya kususkana na ŵanthu aŵa.”

⁸Sono Baruki, mwana wa Neriya wakaya kachita vyose ivyo Yeremiya wakamulangula. Wakaŵazga mu Nyumba ya Chiuta mazgu gha FUMU agho ghakalembeka mu buku lira.

⁹Mu mwezi wa chinkhonde na chinayi wa chirimika cha chinkhonde cha kuwusa kwa Yehoyiyakimu, karonga wa charu cha Yuda, mwana wa Yosiya, ŵanthu wose ŵa mu Yerusalemu na wose awo ŵakafuma mu misumba ya charu cha Yuda, ŵakawungana kuti ŵaziŵizge kurya panthazi pa FUMU.

¹⁰Ndipo mu Nyumba ya FUMU mura, mu chipinda cha mulembi Gemariya mwana wa Shafani, Baruki wakaŵazga panthazi pa ŵanthu wose kuti ŵapulike mazgu gha Yeremiya kufuma mu buku lira. Chipinda chira chikaŵa pa baraza la pachanya, ku muryango wa Chipata Chiphya cha Nyumba ya FUMU.

¹¹Para Mikaya, mwana wa Gemariya, muzukuru wa Shafani, wakapulika mazgu ghose gha FUMU kufuma mu buku lira,

¹²wakakhilira ku nyumba ya ufumu, na kunjira mu chipinda cha mulembi, uko nduna zose zikakhara. Pakaŵa mulembi Elishama, Delayila mwana wa Shemaya, Elinatani mwana wa Akibori, Gemariya mwana wa Shafani, Zedekiya mwana wa Hananiya, ndiposo na nduna zinyakhe zose.

¹³Mikaya wakaŵandulira mazgu ghose agho wakapulika agho Baruki wakaŵazga kufuma mu buku panthazi pa ŵanthu.

¹⁴Penepapo nduna zose zikatuma Yehudi mwana wa Netaniya, mwana wa Shelemiya, mwana wa Kushi, kuya kamuphalira Baruki kuti ŵize na buku ilo wakaŵazga panthazi pa ŵanthu. Ntheura Baruki mwana wa Neriya, wakatora buku na kwiza nalo kwa iwo.

¹⁵Sono ŵakamuphalira ŵakati, “Khara pasi na kutiŵazgira.” Sono Baruki wakaŵaŵazgira.

¹⁶Para ŵakapulika mazgu ghose, ŵakazgokera ku yumoza na munyakhe mu wofi ukuru. Ntheura ŵakati kwa Baruki, “Tikwenera kuphara mazgu ghose agha kwa karonga.”

¹⁷Penepapo ŵakamufumba Baruki ŵakati, “Utiphalire, kasi ukalemba uli mazgu ghose agha? Kasi ndi Yeremiya uyo wakakuphaliranga mazgu apo ukalembanga?”

¹⁸Baruki wakazgora wakati, “Inya, ndi Yeremiya uyo wakandiphaliranga mazgu agha, apo ine nkhalembanga mu buku.”

¹⁹Penepapo nduna zira zikati kwa Baruki, “Iwe na Yeremiya murute mukabisame, paŵavye munthu wakumanya uko imwe muli.”

²⁰Ŵakati ŵaŵika buku mu chipinda cha mulembi Elishama, ŵakanjira mu baraza na kuruta kwa karonga, ndipo ŵakaphara mazgu ghose agha kwa karonga.

²¹Ntheura karonga wakatuma Yehudi kuya katora buku lira. Wakati watora kufuma mu chipinda cha mulembi Elishama, Yehudi wakaŵazga panthazi pa karonga na panthazi pa nduna izo zikimilira kuzingirizga karonga.

²²Ukaŵa mwezi wa chinkhonde na chinayi, ndipo karonga wakakharanga mu nyumba yakhe ya ufumu ya mu nyengo ya mphepo, wakawothanga moto kufuma mu mbawura iyo yikaŵa panthazi pakhe.

²³Pa nyengo yose iyo Yehudi waŵazga vigaŵa vitatu panji vinayi vya malembo gha buku lira, karonga wakavitoranga, wakavicheketa na chimayi na kuviponya pa moto wa mbawura, likasuka buku lose likaphya na kumara.

²⁴Karonga na ŵateŵeti ŵakhe wose awo ŵakapulika mazgu ghose agha, kuti ŵakopa chara, nesi kuparura vyakuvwara vyawo.

²⁵Nangauli Elinatani, Delayila na Gemariya ŵakamuchiska karonga kuti wareke kocha buku, kuti wakaŵapulikira chara.

²⁶Karonga wakalangula Yerameyele mwana wakhe, Seraya mwana wa Aziriyele, na Shelemiya mwana wa Abideyele kuti ŵakamuke mulembi Baruki na nchimi Yeremiya. Kweni FUMU yikaŵabisa.

²⁷Mazgu gha FUMU ghakiza kwa Yeremiya, karonga wakati wocha buku lira la mazgu agho Baruki wakalemba apo Yeremiya wakamuphaliranga. Mazgu ghara ghakaŵa ghakuti:

²⁸“Tora buku linyakhe, ulembeso mazgu ghose ghara ghakaŵa mu buku lakudanga lira leneilo Yehoyiyakimu, karonga wa charu cha Yuda wali kocha.

²⁹FUMU yikuti, pa vya Yehoyiyakimu karonga wa charu cha Yuda, umuphalire uti, ‘Wawocha buku ili na kufumba kuti: Kasi walemberachi kuti karonga wa charu cha Babuloni wati wizenge nadi na kupankhura charu ichi na kumaramo ŵanthu wose na vinyama?’

³⁰Ntheura pakuyowoya vya Yehoyiyakimu, karonga wa charu cha Yuda, FUMU yikuti, ‘Kuti wati waŵenge na yumoza wakuhalira pa chizumbe cha Davide chara. Para wafwa chitanda chakhe chizamkuponyeka kuwaro ku chithukivu pa nyengo ya muhanya, ndiposo mu chiwuvi pa nyengo ya usiku.’

³¹Ndizamkumulanga iyo na ŵana ŵakhe ndiposo na ŵateŵeti ŵakhe, chifukwa cha ubendezi wawo. Ndizamkuŵatorera iwo na ŵanthu awo ŵakukhara mu Yerusalemu, na ŵa mu charu cha Yuda chinthu chiheni icho nkhayowoya kususkana nawo, chifukwa kuti ŵali kundipulika ine chara.”

³²Penepapo Yeremiya wakatora buku linyakhe na kumupa mulembi Baruki, mwana wa Neriya. Iyo wakalembangamo para Yeremiya wakamuchemeranga mazgu ghose agho ghakaŵa mu buku ilo Yehoyiyakimu, karonga wa charu cha Yuda wakocha pa moto. Mazgu ghanandi ghakuyanayana waka ghakasazgikirako.