Read new_tumbuka_bible Yeremiya 37 Bible Online

Yeremiya 37 - new_tumbuka_bible bible

Yeremiya 37

¹Zedekiya mwana wa Yosiya, mweneuyo Nebukadinezara karonga wa charu cha Babuloni wakamwimika kuŵa karonga mu charu cha Yuda, ndiyo wakamba kuwusa mu malo gha Yehoyakini, mwana wa Yehoyiyakimu.

²Nanga wakaŵa iyo panji ŵateŵeti ŵakhe kuti ŵakapulikira mazgu gha FUMU agho yikayowoya mwa Yeremiya chara.

³Karonga Zedekiya wakatuma Yehukala, mwana wa Shelemiya, na musofi Zefaniya, mwana wa Maaseya, kwa Yeremiya na uthenga wakuti, “Utirombere kwa FUMU, Chiuta withu.”

⁴Pa nyengo iyi, Yeremiya wakaŵa wachali kwendendeka mukati mu ŵanthu, pakuti wakaŵa wandajalirike mu gadi.

⁵Ŵasilikari ŵa Faro ŵakiza kufuma ku charu cha Eguputo. Ntheura ŵasilikari ŵa charu cha Babuloni awo ŵakazingirizga msumba wa Yerusalemu ŵakati ŵapulika vya ŵasilikari ŵa Faro, ŵakafumako ku Yerusalemu.

⁶Penepapo mazgu gha FUMU ghakiza kwa nchimi Yeremiya ghakati,

⁷“FUMU, Chiuta wa Israele wakuti: Umuphalire karonga wa charu cha Yuda uyo wakakutuma kwa ine kuti, ‘Ŵasilikari ŵa Faro awo ŵakiza kuti ŵakovwire, ŵati ŵawerere ku Eguputo, ku charu chawo.

⁸Ŵasilikari ŵa charu cha Babuloni ŵati ŵizeso na kurwa na msumba uwu. Iwo ŵati ŵawuthereske na kuwuwocha na moto.’

⁹Ntheura FUMU yikuti, ‘Mungajipusikanga chara na kughanaghana kuti ŵasilikari ŵa charu cha Babuloni ŵati ŵafumeko nadi kwa ise.’ Kumuphalirani kuti ŵati ŵafumeko kwa chara.

¹⁰Nanga mungathereska ŵasilikari ŵa charu cha Babuloni ŵeneawo ŵakwiza kuti ŵarwe namwe nkhondo, ndipo ŵakhareko ŵakupwetekeka pera mu hema lawo, ŵati ŵawukenge na kocha na moto msumba uwu.”

¹¹Ŵasilikari ŵa charu cha Babuloni ŵakafumako ku Yerusalemu chifukwa cha kopa ŵasilikari ŵa Faro awo ŵakizanga.

¹²Ntheura Yeremiya wakawuka kufuma ku Yerusalemu na kuruta ku charu cha Benjamini kuya kapoka chigaŵa cha chiharo chakhe kufuma mu mbumba yakhe.

¹³Para wakaŵa pa Chipata cha Benjamini, mulinda wa pa chipata, zina lakhe Iriya, mwana wa Shelemiya, muzukuru wa Hananiya, wakakora Yeremiya wakati, “Iwe ukugwentha ku ŵasilikari ŵa charu cha Babuloni.”

¹⁴Yeremiya wakati, “Uwu mbutesi. Ine kuti nkhugwentha ku ŵasilikari ŵa charu cha Babuloni chara.” Kweni Iriya kuti wakamupulika chara. Ntheura wakamukora na kwiza nayo ku nduna.

¹⁵Nduna zira zikamukwiyira chomene Yeremiya zikamutimba, na kumujalira mu nyumba ya mulembi Yonatani yeneiyo ŵakayizgora kuŵa gadi.

¹⁶Yeremiya wakaŵikika mu gadi la mdima ndipo wakakhara mwenemura mazuŵa ghanandi.

¹⁷Sono Karonga Zedekiya wakatuma ŵanthu kuya kamuchema Yeremiya, ndipo wakiza mu nyumba yakhe. Karonga wakamufumba ku udesi wakati, “Kasi pali mazgu ghakufumira kwa FUMU?” Yeremiya wakazgora wakati, “Inya ghalipo.” Wakarutilira kuyowoya wakati, “Iwe uti uperekeke mu mawoko gha karonga wa charu cha Babuloni.”

¹⁸Yeremiya wakafumba Karonga Zedekiya wakati, “Kasi ndamunangiranichi imwe, panji nduna zinu, panji ŵanthu aŵa, kuti mundiŵike mu gadi?

¹⁹Kasi nchimi zinu zili nkhu izo zikamuchimiraninge kuti, ‘Karonga wa charu cha Babuloni kuti wizenge kwiza karwa namwe na charu ichi chara?’

²⁰Sono nkhumurombani imwe sekuru wane, karonga wane kuti mupokerere kuŵeya kwane apo nkhujiyuyura panthazi pinu. Mureke kundiwezgeraso ku nyumba ya mulembi Yonatani, mzire ndikafwire kwenekura.”

²¹Ntheura Karonga Zedekiya wakalangula kuti Yeremiya wajarilike mu baraza la ŵalinda mu nyumba ya ufumu. Zuŵa lirilose ŵakamupanga chingwa chimoza icho ŵakagulanga ku ŵakuphika vingwa mpaka vingwa vyose vikamara mu msumba. Ntheura Yeremiya wakakhara mwenemumo mu baraza la ŵalinda mu nyumba ya ufumu.