Read new_tumbuka_bible Yeremiya 38 Bible Online

Yeremiya 38 - new_tumbuka_bible bible

Yeremiya 38

¹Sono Shefatiya mwana wa Matani, Gedaliya mwana wa Pashuru, Yukala mwana wa Shelemiya, na Pashuru mwana wa Malikiya ŵakapulika mazgu agho Yeremiya wakaphaliranga ŵanthu apo wakati,

²“FUMU yikuti, ‘Munthu uyo wakharenge mu msumba uwu wati wafwenge na nkhondo, na njara ndiposo na nthenda yakofya. Kweni uyo wati wafume kuruta ku ŵaBabuloni wati waŵenge wamoyo. Wati waŵe wamoyo nga ndi chakuskogha ku nkhondo.’

³FUMU yikutiso, ‘Nadi msumba uwu uti uperekekenge mu mawoko gha ŵasilikari ŵa karonga wa charu cha Babuloni ndipo ŵati ŵawupoke.’ ”

⁴Ntheura nduna zira zikati kwa karonga, “Munthu uyu wakwenera kukomeka. Iyo wakugongoweska ŵasilikari awo ŵakharako mu msumba uwu, ndiposo na ŵanthu wose awo chifukwa cha mazgu agho wakuyowoya kwa iwo. Munthu uyu kuti wakuŵakhumbira uweme ŵanthu aŵa chara, kweni uheni pera.”

⁵Penepapo Karonga Zedekiya wakati, “Munthu uyu wali mu mawoko ghinu. Karonga kuti wangachita kalikose chara kakususkana namwe.”

⁶Ntheura ŵakamutora Yeremiya na kumuponya mu chisimi cha Malikiya, mwana wa karonga, icho chikaŵa mu baraza la ŵalinda mu nyumba ya ufumu. Yeremiya ŵakamukhizgira mwenemumo na chingwe. Mu chisimi chira mukaŵavye maji, kweni mathipa pera. Ntheura Yeremiya wakabira mu mathipa ghara.

⁷Kweni Ebedimeleki, muEtiyopiya, yumoza wa nthunguli uyo wakakharanga mu nyumba ya ufumu, wakapulika kuti Yeremiya ŵamuponya mu chisimi. Pa nyengo yira karonga wakakhara pa Chipata cha Benjamini.

⁸Ebedimeleki wakafuma mu nyumba ya ufumu ndipo wakaya kamuphalira karonga wakati,

⁹“Karonga, sekuru wane, ŵanthu aŵa ŵachita chithu chiheni mu vyose ivyo ŵakachitira nchimi Yeremiya. Iwo ŵamuponya mu chisimi, umo wati wafwenge na njara pakuti mu msumba mulije na chakurya.”

¹⁰Ntheura karonga wakamulangula Ebedimeleki, muEtiyopiya yura kuti, “Tora ŵasilikari ŵatatu[6] kufuma pano, mukafumiske nchimi Yeremiya mu chisimi pambere wandafwe.”

¹¹Penepapo Ebedimeleki wakaruta na ŵanthu ŵara ku nyumba ya ufumu ndipo wakanjira mu chipinda cha kusungiramo vinthu. Mwenemura wakatora vizwazwa na vyakuvwara vyakumara ivyo wakakhizgira na vingwe kwa Yeremiya mu chisimi.

¹²Ndipo Ebedimeleki muEtiyopiya yura wakati kwa Yeremiya, “Ŵika vizwazwa na vyakuvwara vyakuparuka ivyo mu nkhwapa zako kuti vingwe vireke kukupweteka.” Yeremiya wakachita ntheura.

¹³Ŵakamuguzira muchanya Yeremiya na vingwe na kumufumyamo mu chisimi chira. Iyo wakaya kakharaso mwenemura mu baraza la ŵalinda mu nyumba ya ufumu.

¹⁴Karonga Zedekiya wakatuma ŵanthu kuya kachema nchimi Yeremiya ndipo ŵakiza nayo ku chipata cha chitatu cha Nyumba ya FUMU. Karonga wakamufumba Yeremiya wakati, “Ine nkhukhumba kukufumba, ndipo undizgore kwambula kundibisa kalikose.”

¹⁵Yeremiya wakazgora wakati, “Usange ndakuphalira, kasi undikomenge chara? Usange ndingakupani urongozgi, iwe kuti uwupulikenge chara.”

¹⁶Penepapo Karonga Zedekiya wakachita chirapo kwa Yeremiya mu udesi wakati, “Nkhurapira mwa FUMU yamoyo, yeneiyo yikatipa umoyo, kuti ndikukomenge chara, nanga nkhukupereka mu mawoko gha awo ŵakukhumba kukukoma.”

¹⁷Ntheura Yeremiya wakamuphalira Zedekiya wakati, “FUMU, Chiuta Mwenenkhongono zose, mweneuyo ndi Chiuta wa Israele, wakuti, ‘Usange ungathera ku nduna za karonga wa charu cha Babuloni, uti uthaskikenge ndipo msumba uwu kuti uwochekenge pa moto chara. Iwe pamoza na mbumba yako muti muŵenge na umoyo.

¹⁸Kweni usange ukureka kuthera ku nduna za karonga wa charu cha Babuloni, msumba uwu uti uperekeke mu mawoko gha ŵaBabuloni. Iwo ŵizamkuwuwocha pa moto ndipo iwe kuti wizamkupona chara.’ ”

¹⁹Karonga Zedekiya wakati kwa Yeremiya, “Nkhopa ŵaYuda awo ŵali kuruta kale ku charu cha Babuloni, mzire ŵaBabuloni ŵandipereke kwa iwo ndipo ŵandichitire iwo nkhaza.”

²⁰Yeremiya wakati, “Iwe kuti ŵamkukupereka mu mawoko ghawo chara. Iwe upulikire waka mazgu gha FUMU pa ivyo nkhukuyowoyera. Para wachita ntheura, viti vikuŵirenge makora, ndipo uti uthaskikenge.

²¹Kweni usange ukukana kuthera, ichi ndicho FUMU yachivumbula kwa ine.

²²Ŵanakazi wose awo ŵakakharako mu nyumba ya ufumu wa charu cha Yuda, ŵakarongozgekanga kuya ku nduna za karonga wa charu cha Babuloni ndipo ŵakayowoyanga kuti, ‘Ŵabwezi ŵako ŵakugomezgeka ŵakakupusika, ndipo ŵakakuthereska. Malundi ghako ghanjira mu mathipa, ŵabwezi ŵako ŵakureka.’

²³“Ŵawoli ŵako wose pamoza na ŵana ŵako ŵati ŵaperekeke ku ŵaBabuloni. Iwe mwaŵene kuti uti uponenge chara ku mu mawoko ghawo, kweni uti ukoreke na karonga wa charu cha Babuloni, ndipo msumba uwu uti uwocheke na moto.”

²⁴Penepapo Zedekiya wakati kwa Yeremiya, “Ureke kuphalirapo munthu waliyose makani agha. Usange ungachita uti ukomekenge.

²⁵Usange nduna zapulika kuti ine ndayowoyanga na iwe, zamkwiza kwa iwe na kukufumba kuti, ‘Utiphalire ivyo wayowoyanga kwa karonga na ivyo karonga wayowoyanga kwa iwe, ungatibisanga kanthu chara, ndiposo kuti titi tikukomenge chara.’

²⁶Sono wizakaŵaphalire kuti, ‘Ndaŵeyereranga kwa karonga kuti wareke kundiwezgera ku nyumba ya Yonatani kuti nkhafwire kwenekuko.’ ”

²⁷Nduna zose zikiza nadi kwa Yeremiya na kumufumba ndipo Yeremiya wakazgora nga ndi umo karonga wakamuphalirira. Ndipo ŵakareka kuyowoyeskana nayo, pakuti ivyo ŵakayowoyeskana na karonga kuti vikamanyikwa chara.

²⁸Yeremiya wakakhara mu baraza la nyumba ya ŵalinda mu nyumba ya ufumu mpaka pa zuŵa ilo msumba wa Yerusalemu ukatorekera.