Read new_tumbuka_bible Yeremiya 39 Bible Online

Yeremiya 39 - new_tumbuka_bible bible

Yeremiya 39

¹Mu mwezi wa khumi wa chirimika cha chinkhonde na chinayi cha kuwusa kwa Zedekiya, karonga wa charu cha Yuda, Karonga Nebukadinezara wa charu cha Babuloni, na ŵasilikari ŵakhe wakarotokera msumba wa Yerusalemu na kuwuzingirizga.

²Pa zuŵa la chinkhonde na chinayi la mwezi wa chinayi, mu chirimika cha 11 cha kuwusa kwa Zedekiya, malinga gha msumba ghakagumurika.

³Penepapo nduna zose za mu charu cha Babuloni zikiza na kukhara pa chipata cha pakati. Izo zikaŵapo ndi izi: Nerigala Sharezara, Samugara Nebo, Sarisekimu murara wa nduna, na Nerigala Sharezara murongozgi wa ŵasilikari, ndiposo na nduna zinyakhe wose ŵa karonga wa charu cha Babuloni.

⁴Para Zedekiya karonga wa charu cha Yuda na ŵasilikari wose ŵakati ŵaŵawona, ŵakachimbira. Ŵakafumamo mu msumba na usiku, pakwendera nthowa ya ku munda wa karonga, kusorota pa chipata icho chili pakati na viliŵa viŵiri. Ŵakachimbira pakurazga ku dambo la Araba.[7]

⁵Kweni ŵasilikari ŵa charu cha Babuloni ŵakaŵarondora ndipo ŵakamukora Zedekiya mu madambo gha ku Yeriko. Ŵakati ŵamukora, ŵakaruta nayo kwa Nebukadinezara, karonga wa charu cha Babuloni, ku Ribula mu charu cha Hamati. Kwenekura karonga wa charu cha Babuloni wakamweruzga na kumupa mrandu.

⁶Kwenekura ku Ribula karonga wa charu cha Babuloni wakakoma ŵana ŵa Zedekiya wiskewo wakulaŵiska, ndiposo ŵarongozgi wose ŵa charu cha Yuda.

⁷Pamanyuma wakamukozombola maso Zedekiya, wakamukaka na unyoro na kumutumizga ku charu cha Babuloni.

⁸ŴaBabuloni ŵakocha na moto nyumba ya ufumu na nyumba za ŵanthu waka wuwo na kubwangandula linga la Yerusalemu.

⁹Penepapo Nebuzaradani, murara wa chivikiriro, wakaŵakora umikori na kuruta nawo ku charu cha Babuloni, ŵanthu wose awo ŵakakharapo mu msumba, awo ŵakagwenthera kwa iyo, ndiposo na awo ŵakakhalira.

¹⁰Nebuzaradani, murara wa chivikiriro yura wakaŵareka mu charu cha Yuda ŵanyakhe ŵa awo ŵakaŵa ŵakavu chomene, ŵambula na kalikose. Pa nyengo iyo wakaŵapa minda ya mpheska na minda yinyakhe.

¹¹Nebukadinezara karonga wa charu cha Babuloni wakalangula Nebuzaradani, murara wa chivikiriro wakhe pa vya Yeremiya kuti,

¹²“Umutore ndipo umusungilire makora, ungamuchitiranga kaheni kalikose chara, kweni umuchitire ivyo iyo wakukhumba.”

¹³Ntheura Nebuzaradani, murara wa chivikiriro, Nebushazibani, murongozgi wa ŵateŵeti, Nerigala Sharezara murongozgi wa ŵasilikari ŵanyakhe pamoza na ŵarongozgi wose ŵapachanya ŵa karonga wa charu cha Babuloni,

¹⁴ŵakatuma ŵanthu kuya kamutora Yeremiya kufuma mu baraza la ŵalinda mu nyumba ya ufumu. Ŵakamupereka mu mawoko gha Gedaliya, mwana wa Ahikamu, muzukuru wa Shafani, kuti warute nayo ku nyumba yakhe. Ntheura Yeremiya wakakhara mukati mu ŵanthu ŵa ku kwakhe.

¹⁵Mazgu gha FUMU ghakiza kwa Yeremiya apo wakajalirika mu baraza la ŵalinda mu nyumba ya ufumu ghakati:

¹⁶“Ruta ukamuphalire Ebedimeleki, muEtiyopiya yura kuti, ‘FUMU Mwenenkhongono zose, Chiuta wa Israele wakuti: Wona, nga ndi umo nkhayowoyera zuŵa lira, nditi nditorere chinthu chiheni pa msumba uwu, chiweme chara. Pa nyengo iyo mazgu agha ghizamkufiskika iwe ukuwona.’ ”

¹⁷FUMU yikuti, “Kweni iwe ndizamkukuthaska pa zuŵa ilo, ndipo kuti wamkuperekeka chara mu mawoko gha awo ukuŵawopa.

¹⁸Nadi ine ndizamkukuthaska, ndipo iwe kuti wizamkukomeka na nkhondo chara. Kweni uti uthaske umoyo wakhe uŵenge nga ndi chakuskogha ku nkhondo, chifukwa iwe ukugomezga mwa ine.” Ntheura ndimo FUMU yikuyowoyera.