Read new_tumbuka_bible Yeremiya 4 Bible Online

Yeremiya 4 - new_tumbuka_bible bible

Yeremiya 4

¹“Usange ukukhumba kuwerera, We Israele, werera kwa ine.” Ntheura ndimo FUMU yikuyowoyera. “Usange ukuwuskapo vikozgo vyako vya ukazuzi panthazi pane, ndipo ukureka kupuruka,

²usange ukurapa kuti, ‘Nkhurapira mwa FUMU,’ mu unenesko, mu urunji na mu kunyoroka, penepapo mafuko ghati ghatumbikikire mwa iwe, ndipo ghati ghachindamiskike mwa iwe.”

³FUMU yikuti ku ŵaYuda na awo ŵakukhara mu Yerusalemu. “Popotani minda yinu, mungaseŵanga mu minga chara.

⁴Muŵe ŵakugomezgeka kwa FUMU, ndipo muteŵetere iyo pera na mtima winu wose, imwe ŵaYuda, na imwe mukukhara mu Yerusalemu, mzire ukari wane ugolere nga ndi moto uwo kukuŵavye na yumoza wakuwuzimya, chifukwa cha uheni uwo mwachita.”

⁵FUMU yikuti, “Pharazgani mu charu cha Yuda, thuwuskani mu Yerusalemu, lizgani mbata mu charu chose, muchemerezge kuti, ‘Wunganani, tiyeni tirute ku misumba ya malinga!’

⁶Kwezgani ndembera kurazga ku Ziyoni, chimbirani kwambula kuchedwa kuti mukabisame, pakuti nkhwiza na chiheni kufuma ku mpoto, ndipo kwizamkuŵa kuparanyika kukuru.

⁷Nga ndi umo nkharamu yikufumira mu matundu ghakhe, ndimo wakukoma ŵamitundu wawukira. Wafumako ku malo ghakhe, na kwiza kazgora charu chinu kuŵa mapopa. Misumba yinu yiti yizgokenge mahami, yambula kukharamo ŵanthu.

⁸Pa chifukwa ichi vwarani vigudulu, tengerani na kulira chomene. Pakuti ukari wakofya wa FUMU, ulije kufumako kwa ise.”

⁹FUMU yikuti, “Mu zuŵa leneilo, mtima wa karonga na wa nduna wamkumara. Ŵasofi ŵamkuzukuma, ndipo nchimi nazo zamkuzizikika.”

¹⁰Ntheura ine nkhati, “Awe, FUMU Chiuta, nadi mwaŵapusika chomene ŵanthu ŵa mu Yerusalemu na ŵa mu charu chose. Imwe mukuti, ‘Vinthu viŵenge makora kwa imwe’, kweni nkhondo yafika kale.”

¹¹Pa nyengo yeneiyo FUMU yamkuyowoya ku ŵanthu aŵa na ŵa mu Yerusalemu kuti, “Mphepo yakocha yamkwiza kufuma ku mapiri ghambula kanthu gha mu chiparamba, kurazga ku charu cha ŵanthu ŵane. Iyi kuti ndi mphepo ya kupetera na kutozgera chara,

¹²kweni ndi mphepo iyo nja nkhongono chomene pa nchito iyi. Yiti yimwiziraninge kufuma kwa ine para ndayilangula. Ine ndine nkhuyowoya kupereka weruzgi kwa iwo.”

¹³Wonani, murwani wakwiza nga ndi maŵingu, magareta ghakhe ghali nga ndi kavuruvuru. Mahachi ghakhe ghakwenda luŵiro kuruska nombo. Mbaya mwe, pakuti tamara!

¹⁴Iwe Yerusalemu, tozga mtima wako ku ubendezi, mwakuti umanye kuponoskeka. Kasi maghanoghano ghaheni uŵenge nagho mpaka pauli?

¹⁵Pakuti nthumi yikupharazga kufuma mu charu cha Dani, yikughapharazga za pharaniko kufuma ku mapiri gha Efurayimu.

¹⁶Iwo ŵakuti, “Chenjezgani mafuko kuti murwani wakwiza. Pharazgani mu Yerusalemu, kuti ŵarwani ŵasilikari ŵakwiza kufumira ku charu cha kutali. Iwo ŵakupomera misumba ya mu charu cha Yuda.

¹⁷Ŵakuzinga msumba wa Yerusalemu nga mbalinda ŵa munda, pakuti ŵanthu ŵandigarukira ine.” Ntheura ndimo FUMU yikuyowoyera.

¹⁸“Ivi vyamuchitikirani imwe ŵaYuda, chifukwa cha mendero na machitiro ghinu. Ichi ndi chilango chinu, chakuŵaŵa chomene, chakulasa mpaka ku mtima.”

¹⁹Kuŵinya mwe, kuŵinya mwe! Ine nkhunyongozeka na vyakuŵinya. Mwe kuŵinya kwa mu mtima wane! Mtima wane ukunyongozeka mukati mwane! Nkhutondeka na kukhara chete wuwo, pakuti nkhupulika kulira kwa mbata, na kumema kwa nkhondo.

²⁰Pharaniko likurondezgana na pharaniko, charu chose chazgoka mapopa. Mwa mabuchibuchi misasa yithu yapankhuka, salu zakuchinga zakerukakeruka, mu kanyengo kachoko waka.

²¹Kasi nkhwenera kuwona ndembera, na kupulika kulira kwa mbata mpaka pauli?

²²FUMU yikuti, “Ŵanthu ŵane mbakupusa, kuti ŵakundimanya chara. Iwo nvindere, kuti vikumanyiska chara. Iwo ndi nkhwantha pakuchita uheni, kweni kuchita uweme, kuti ŵakumanya chara.”

²³Nkhalaŵiska pa charu cha pasi, ndipo wonani, chikaŵa cha mapopa na chambula kanthu. Nkhalaŵiskaso ku mitambo, ndipo yikaŵavye ungweru.

²⁴Nkhalaŵiska pa mapiri, ndipo wonani, nkhawona kuti ghakusunkhunyika, tumapiri nato tukasunkhunyikira uku na uko.

²⁵Nkhalaŵiska, ndipo wonani, nkhawona kuti kulije na munthu waliyose. Viyuni vyose vya mudera vikaduka.

²⁶Nkhalaŵiska, ndipo wonani, nkhawona charu cha nyata yiweme, chikazgoka chiparamba. Misumba yakhe yikazgoka mahami chifukwa cha ukari wakofya wa FUMU.

²⁷Pakuti FUMU yikuti, “Charu chose chiti chiŵenge mayiyi, ndipouli kuti nditi ndichimarizge nkhanira chara.

²⁸Pa chifukwa ichi charu chizamkutengera, mitambo kuchanya yizamkufipa bii! Chifukwa ine ndayowoya ndipo ndili na chakurata. Nditi ndigowoke chara nesi kuwerera nyuma.”

²⁹Ŵanthu ŵa mu msumba uliwose ŵakuchimbira, pakupulika chiwawa cha ŵakukwera mahachi na ŵamauta, Ŵanji ŵakunjira mu matundu, ndipo ŵanji ŵakukwera mu majarawe. Misumba yose yasidika, ndipo palije munthu na yumoza uyo wakukharamo.

³⁰Sono iwe Yerusalemu, msumba wakusokwa iwe, kasi ukung'anamulachi apo ukuvwara malaya ghaswesi, apo ukujitozga na vitoweskero vya golide, apo ukughazgora maso ghako kuŵa ghakuru pakugharoŵa? Ukujitozga kwambula na chandulo. Vibwezi vyako vikukupepura, ndipo vikukhumba kukukoma.

³¹Nkhapulika kulira nga nkhwa mwanakazi, uyo wali mu vyakuŵinya vya pa kubaba, uyo wali mu vyakuŵinya vya kubaba mwana wa uŵere. Uku kukaŵa kulira kwa ŵanthu ŵa mu Ziyoni, awo ŵakuti waka ŵefuŵefu chifukwa muvuchi nguchoko. Ŵanyoroska mawoko ghawo na kuyowoya kuti, “Soka kwa ise! Wonani, tikufwa lunkhuŵa panthazi pa vikozi.”