Read new_tumbuka_bible Yeremiya 40 Bible Online

Yeremiya 40 - new_tumbuka_bible bible

Yeremiya 40

¹Mazgu ghakiza kwa Yeremiya kufuma kwa FUMU, Nebuzaradani murara wa chivikiriro wati wamusutula ku Rama. Wakamusanga kuti ngwa kukakika na maunyoro pamoza na ŵakayidi ŵanyakhe ŵa ku Yerusalemu na ŵa mu charu cha Yuda awo ŵakatorekeranga ku umikori ku Babuloni.

²Murara wa chivikiriro yura wakamutora Yeremiya na kumuphalira kuti, “FUMU, Chiuta wako, wakayowoya vya chinthu chiheni ichi kuwira malo agha.

³Ndipo sono FUMU yafiska ichi nga ndi umo yikayowoyera. Chinthu ichi chamuwirani chifukwa mukanangira FUMU na kureka kupulikira mazgu ghakhe.

⁴Kweni muhanya uno nkhukusutula maunyoro agho ghali mu mawoko ghako. Usange ukukhumba tiye ku Babuloni. Ine ndamkukusungilira makora. Kweni usange nchiweme chara kuruta nane ku Babuloni, ureke kuruta nane. Wona charu chose ichi chili panthazi pako. Ungaruta kulikose uko ukughanaghana kuti nkhuweme na kwakwenerera.”

⁵Pambere Yeremiya wandazgore, Nebuzaradani wakarutilira kuyowoya kuti, “Werera kwa Gedaliya mwana wa Ahikamu, muzukuru wa Shafani, mweneuyo karonga wa charu cha Babuloni wakamwimika kuŵa nduna mu misumba ya charu cha Yuda. Ukakharenge na iyo na kuŵa mukati mu ŵanthu, panji urute kulikose uko ukukhumba.” Ntheura murara wa chivikiriro wakamupa Yeremiya chakurya na chawanangwa, ndipo wakaruta.

⁶Ntheura Yeremiya wakaruta kwa Gedaliya, mwana wa Ahikamu mu msumba wa Mizipa. Wakakhara nayo ndipo wakaŵa mukati mu ŵanthu awo ŵakakhalira mu charu.

⁷Ŵarongozgi ŵa ŵasilikari na ŵasilikari ŵawo awo ŵakaŵa ku malo ghakupambanapambana, ŵakapulika kuti karonga wa charu cha Babuloni wamwimika Gedaliya, mwana wa Ahikamu, kuŵa mukuru wa charu. Wakamwimika kuŵa murara wa ŵanarume, ŵanakazi na ŵana, awo ŵakaŵa ŵakavu chomene ŵa mu charu. Ŵeneaŵa kuti ŵakatorekera ku umikori mu charu cha Babuloni chara.

⁸Ntheura Ishimaele mwana wa Netaniya, Yohanani, Yonatani mwana wa Kareya, Seraya mwana wa Tanihumeti, ŵana ŵa Efayi wa ku Netofa, Yezaniya mwana wa Maaka, iwo pamoza na ŵanthu ŵawo ŵakiza kwa Gedaliya mu msumba wa Mizipa.

⁹Gedaliya mwana wa Ahikamu, muzukuru wa Shafani, wakarapa kwa iwo na ku ŵasilikari ŵawo, wakati, “Mungopanga kuŵateŵetera ŵaBabuloni chara. Kharaninge mu charu, teŵeteraninge karonga wa charu cha Babuloni, ndipo kuti kumuŵirani makora.

¹⁰Ine ndikharenge ku msumba wa Mizipa, kumwimilirani imwe panthazi pa ŵaBabuloni awo ŵati ŵizenge kwa ise. Kweni imwe vunaninge vinyo na vipambi vya mu chihanya ndiposo na mafuta, muŵike mu viteŵetero vyinu, mukharenge mu misumba yinu iyo mwasankha.”

¹¹ŴaYuda wose awo ŵakaŵa mu charu cha Mowabu, mu ŵaAmoni, mu ŵaEdomu, ndiposo na mu vyaru vinyakhe, ŵakapulika kuti karonga wa charu cha Babuloni wazomerezga kuti ŵaYuda ŵanyakhe ŵakhare mu charu cha Yuda, ndiposo wamwimika Gedaliya mwana wa Ahikamu, muzukuru wa Shafani kuŵa mukuru wa chigaŵa.

¹²Ntheura wose ŵakawerako kufuma kose uko ŵakachimbizgikira na kwiza ku charu cha Yuda, kwa Gedaliya ku msumba wa Mizipa. Ŵakakorora vinyo linandi na vipambi vya pa chihanya navyo vinandi waka.

¹³Sono Yohanani mwana wa Kareya na ŵarongozgi ŵa ŵasilikari awo ŵakaŵa mu malo ghakupambanapambana, ŵakiza kwa Gedaliya ku Mizipa.

¹⁴Iwo ŵakamufumba ŵakati, “Kasi ukumanya kuti Baalisi karonga wa ŵaAmoni watuma Ishimaele mwana wa Netaniya kuti wakukome?” Kweni Gedaliya mwana wa Ahikamu kuti wakaŵagomezga chara.

¹⁵Penepapo Yohanani mwana wa Kareya wakayowoya ku udesi na Gedaliya ku Mizipa wakati, “Ndizomerezge ndirute nkhakome Ishimaele mwana wa Netaniya, ndipo na yumoza kuti wamanye chara. Kasi wakukokomezgerachi kuti ŵaYuda wose awo ŵakawungana pa iwe ŵambininike, na kuti ŵakukharako ŵa mu charu cha Yuda nawo ŵamarenge?”

¹⁶Kweni Gedaliya mwana wa Ahikamu wakati kwa Yohanani mwana wa Kareya, “Ungachitanga chinthu ichi chara. Ivyo ukuyowoya vya Ishimaele ndi vya utesi.”