Read new_tumbuka_bible Yeremiya 41 Bible Online

Yeremiya 41 - new_tumbuka_bible bible

Yeremiya 41

¹Mu mwezi wa chinkhonde na chiŵiri, Ishimaele mwana wa Netaniya, muzukuru wa Elishama, wa mphapu ya ufumu, yumoza wa nduna za pachanya za karonga, wakiza na ŵanthu khumi kwa Gedaliya mwana wa Ahikamu mu msumba wa Mizipa. Apo ŵakaryanga pamoza kwenekura ku Mizipa,

²Ishimaele mwana wa Netaniya pamoza na ŵanthu khumi ŵara, ŵakawuka na kumuheta na lupanga Gedaliya, mwana wa Ahikamu, mwana wa Shafani, ndipo ŵakafwa. Munthu uyu ndiyo karonga wa charu cha Babuloni wakamwimika kuŵa nduna ya charu.

³Ishimaele wakakomaso ŵaYuda wose awo ŵakaŵa na Gedaliya mu msumba wa Mizipa ndiposo na ŵasilikari ŵa charu cha Babuloni awo ŵakasangika penepara.

⁴Na machero ghakhe apo kukomeka kwa Gedaliya kukaŵa kuchali kundamanyikwe,

⁵ŵanthu 80 ŵakiza kufuma ku msumba wa Shekemu, ku Shilo na ku Samariya. Ŵanthu aŵa ŵakameta mwembe wawo, ŵakaparura vyakuvwara vyawo ndipo ŵakajichekacheka mathupi ghawo. Iwo ŵakiza na vyakupereka ivi, tirigu na vyakununkhira, kuya kapereka ku Nyumba ya FUMU.

⁶Ishimaele mwana wa Netaniya wakaruta uku wakulira kufuma ku Mizipa kuya kakumana nawo. Wachali kukumana nawo, wakati kwa iwo, “Zaninge kwa Gedaliya mwana wa Ahikamu.”

⁷Para wakati ŵanjira mu msumba, Ishimaele mwana wa Netaniya na ŵanthu awo wakaŵa nawo, ŵakaŵakoma ŵanthu ŵara na kuponya mathupi ghawo mu chisimi.

⁸Kweni ŵakaŵapo khumi wa ŵanthu ŵara awo ŵakati kwa Ishimaele, “Ureke kutikoma, pakuti tili na nthamba za tirigu, za nyauti ndiposo na mafuta na uchi ivyo tili kubisa mu minda.” Ntheura wakaŵareka waka kwambula kuŵakoma pamoza na ŵanyakhe.

⁹Chisimi icho Ishimaele wakaponyamo vitanda vya ŵanthu awo wakakomamanga iyo pamoza na Gedaliya, chikaŵa chikuru chomene. Ichi ndicho Karonga Asa wakajima kuŵa chivikiriro pakurwa nkhondo na Baasha, karonga wa charu cha Israele. Ishimaele, mwana wa Netaniya wakazuzga chisimi ichi na vitanda.

¹⁰Pamanyuma Ishimaele wakaŵakora kuŵa ŵazga ŵanthu wose awo ŵakakharako mu msumba wa Mizipa. Ŵanthu aŵa ŵakaŵa ŵana ŵanakazi ŵa karonga na ŵanthu awo wakakhalira mu msumba ura, awo Nebuzaradani murara wa chivikiriro, wakaŵapereka mu mawoko gha Gedaliya mwana wa Ahikamu. Ishimaele mwana wa Netaniya wakaŵakora kuŵa ŵazga ndipo wakaruta nawo ku charu cha ŵaAmoni.

¹¹Kweni Yohanani mwana wa Kareya na wose ŵarongozgi ŵa ŵasilikari awo ŵakaŵa nayo ŵakati ŵapulika mauheni ghose agho wakachita Ishimaele mwana wa Netaniya,

¹²ŵakatora ŵanthu ŵawo na kuya karwa nkhondo na Ishimaele mwana wa Netaniya. Ŵakaya kamusanga pa chiziŵa chikuru icho chili mu msumba wa Gibeyoni.

¹³Ŵanthu wose awo ŵakaŵa na Ishimaele para ŵakawona Yohanani mwana wa Kareya na ŵarongozgi wose ŵa ŵasilikari awo ŵakaŵa nayo, ŵakasekerera.

¹⁴Ntheura ŵanthu wose awo Ishimaele wakaŵatora mu msumba wa Mizipa, ŵakawerera na kuruta kwa Yohanani mwana wa Kareya.

¹⁵Kweni Ishimaele mwana wa Netaniya pamoza na ŵanthu ŵakhe ŵankhonde na ŵatatu, ŵakapona kwa Yohanani na kuchimbilira ku ŵaAmoni.

¹⁶Penepapo Yohanani mwana wa Kareya pamoza na ŵarongozgi ŵa ŵasilikari awo ŵakaŵa nayo ŵakatora ŵanthu wose awo ŵakakharapo, ŵeneawo Ishimaele mwana wa Netaniya wakaŵakora kuŵa ŵazga kufuma nawo mu msumba wa Mizipa, wakati wamukoma Gedaliya mwana wa Ahikamu. Awo ŵakakorapo ŵakaŵa ŵasilikari, ŵanakazi, ŵana, na zinthunguli. Ŵeneawo Yohanani wakiza nawo kufuma ku msumba wa Gibeyoni.

¹⁷Ŵakaruta ŵakaya kakhara pa chighono cha Kimuhamu pafupi na msumba Betelehemu. Iyo wakhumbanga kuruta ku charu cha Eguputo,

¹⁸chifukwa chakopa ŵaBabuloni. Wakaŵa na wofi chifukwa Ishimaele mwana wa Netaniya wakakoma Gedaliya mwana wa Ahikamu uyo karonga wa charu cha Babuloni wakamwimika kuŵa nduna ya charu.