Read new_tumbuka_bible Yeremiya 42 Bible Online

Yeremiya 42 - new_tumbuka_bible bible

Yeremiya 42

¹Penepapo ŵarongozgi wose ŵa ŵasilikari, pamoza na Yohanani mwana wa Kareya, na Yezaniya mwana wa Hoshaya, na ŵanthu wose ŵachoko na ŵarara, ŵakiza pafupi,

²ndipo ŵakati kwa nchimi Yeremiya, “Tikuromba kuti mupulike kuŵeyerera kwithu ndipo mutirombere kwa FUMU, Chiuta winu, chifukwa cha ŵanthu wose awo ŵakharako. Pakuti nga ndi umo mukuwonera, ise takhara ŵachoko waka apo tikaŵa ŵanandi.

³Mutirombere kuti FUMU, Chiuta winu watirongore nthowa iyo tingendamo na icho tikwenera kuchita.”

⁴Penepapo Yeremiya wakati kwa iwo, “Ndapulika ivyo mwayowoya. Nditi ndirombe kwa FUMU, Chiuta winu, kwakuyana na pempho linu. Chose icho FUMU yiti yimuzgorani, ndimuphaliraninge ndipo nditi ndimubisirani kanthu chara.”

⁵Ntheura ŵakamuzgora Yeremiya ŵakati, “FUMU yiŵe kaboni wa unenesko na wa kugomezgeka pakati pa ise, usange tikureka kuchita kwakuyana na mazgu ghose agho FUMU, Chiuta winu, wakumutumani kuti mutiphalire.

⁶Manyi zgoro ndiweme panji ndiheni, ise tizamkupulikira mazgu gha FUMU, Chiuta withu, mweneuyo tamutumaniko. Titi tipulikire mazgu gha FUMU, Chiuta withu, mwakuti vinthu vitikhalirenge makora.”

⁷Pa umaliro wa mazuŵa khumi, mazgu gha FUMU ghakiza kwa Yeremiya.

⁸Ntheura wakachema Yohanani mwana wa Kareya na ŵarongozgi wose ŵa ŵasilikari awo ŵakaŵa nayo, na ŵanthu wose ŵachoko na ŵarara.

⁹Iyo wakati kwa iwo, “FUMU, Chiuta wa Israele mweneuyo mukanditumako kuti nkhapereke kuŵeyerera kwinu panthazi pakhe, wakuti,

¹⁰‘Usange mukharenge mu charu chino, ine nditi ndimuzengani, kuti nditi ndimubwangandulani chara. Nditi ndimupandani, kuti nditi ndimuzgurani chara. Pakuti ndili na chitima pa chiheni icho nkhamuchitirani.’ ”

¹¹FUMU yikuti, “Mureke kopa karonga wa charu cha Babuloni, uyo mukutenthema nayo. Mureke kumopa pakuti ine ndili namwe. Nditi ndimuthaskani na kumuponoskani ku woko lakhe.

¹²Nditi ndimuchitirani lusungu, mwakuti karonga yura waŵe na lusungu na imwe na kumurekani kuti mukhare mu charu chinu.

¹³“Kweni para mukuti, ‘Ise kuti tikharenge mu charu ichi chara’, kureka kupulikira mazgu gha FUMU, Chiuta winu,

¹⁴na kuyowoya kuti, ‘Chara, ise tirutenge ku charu cha Eguputo uko tamkukhara, kweneuko kuti tamkuwona nkhondo chara, nanga nkhupulika kulira kwa mbata ya nkhondo, panji kufwa na njara ndipo tamkukhara kwenekura’

¹⁵ntheura pulikani mazgu gha FUMU imwe mwakharako ŵa mu charu cha Yuda. FUMU Mwenenkhongono zose, Chiuta wa Israele wakuti, ‘Usange mwakhumba nadi kuruta ku charu cha Eguputo kuti ndiko mukapanjweko,

¹⁶penepapo nkhondo iyo mukopa yamkumusangani kwenekura ku charu cha Eguputo. Njara iyo mukopa, nayo yamkumurondezgani mu manyuma mpaka ku charu cha Eguputo, ndipo mwamkufwira kwenekura.

¹⁷Ŵanthu wose awo ŵakhumba kuruta ku charu cha Eguputo kuti ŵakakhare kwenekura, ŵamkufwa na nkhondo, njara na nthenda yakofya. Kwamkuŵavye na ŵamkuponapo panji kuchimbira ku chiheni icho nditi ndiŵachitire.’ ”

¹⁸“FUMU Mwenenkhongono zose, Chiuta wa Israele, wakuti, ‘Nga ndi umo ukari wane na kukwiya kwane vikaŵa pa ŵanthu awo ŵakakharanga mu Yerusalemu, ndimo ukari wane uti uŵirengeso pa imwe para mukuruta ku charu cha Eguputo. Mwamkuŵa chinthu chakuseruska, chakofya, chakutembeka, na chakusunjizgika. Malo agha kuti mwamkughawonaso chara.’ ”

¹⁹FUMU yati kwa ine, “Imwe mwa ŵakukharako ŵa mu charu cha Yuda, mureke kuruta ku charu cha Eguputo. Manyani nadi ichi kuti ndamuchenjezgani muhanya uno.

²⁰Manyani kuti mwapuruka ndipo mungataya umoyo winu. Imwe mukandituma kuti ndirute kwa FUMU chiuta winu apo mukati, ‘Utirombere kwa FUMU, Chiuta withu, ndipo chose icho FUMU, Chiuta withu wamkuyowoya, wiza katiphalira, ndipo tamkuchita.’

²¹Ndipo muhanya uno ndamuphalirani, ndipouli kuti mwapulikira mazgu gha FUMU, Chiuta winu mu vyose ivyo wakandituma kumuphalirani chara.

²²Ntheura sono manyani nadi ichi kuti mwamkufwa na nkhondo, na njara na nthenda yakofya mu malo agho mukukhumba kuya kakharamo.”