Read new_tumbuka_bible Yeremiya 43 Bible Online

Yeremiya 43 - new_tumbuka_bible bible

Yeremiya 43

¹Para Yeremiya wakamara kuyowoyera ŵanthu mazgu ghose agho FUMU, Chiuta wawo, wakamutuma kuti waŵaphalire,

²Azariya mwana wa Hoshaya, Yohanani mwana wa Kareya na ŵanthu wose ŵa mutafu ŵakati kwa Yeremiya, “Iwe ukuteta. FUMU, Chiuta withu walije kukutuma kutiphalira ise kuti, ‘Mureke kuruta ku charu cha Eguputo kuya kakhara kwenekura.’

³Kweni Baruki mwana wa Neriya ndiyo wakuchichizga kuti ulimbanenge nase, mwakuti watipereke mu mawoko gha ŵanthu ŵa ku Babuloni, kuti ŵatikome panji kuti ŵatitorere ku umikori ku charu chawo.”

⁴Ntheura Yohanani mwana wa Kareya na ŵarongozgi wose ŵa ŵasilikari, ndiposo na ŵanthu wose ŵakakana kupulikira mazgu gha FUMU, kuti ŵakhare mu charu cha Yuda.

⁵Penepapo Yohanani mwana wa Kareya na ŵarongozgi wose ŵa ŵasilikari, ŵakatora ŵanthu wose awo ŵakakharako ŵa mu charu cha Yuda, ŵeneawo ŵakawerera kwiza kakhara mu charu cha Yuda kufuma ku mafuko ghose uko ŵakachimbizgikira.

⁶Ŵanthu aŵa ŵakaŵa ŵanarume, ŵanakazi na ŵana, ŵana ŵanakazi ŵa karonga na yose uyo Nebuzaradani murara wa chivikiriro wakaŵareka mu mawoko gha Gedaliya mwana wa Ahikamu, muzukuru wa Shafani. Ŵakatoraso Yeremiya na Baruki.

⁷Ŵanthu ŵara ŵakaruta ku charu cha Eguputo, pakuti ŵakakana kupulikira mazgu gha FUMU, ndipo ŵakafika ku msumba wa Tapanesi.

⁸Mazgu gha FUMU ghakiza kwa Yeremiya ku Tapanesi ghakati,

⁹“Tora mawe ghakuru na kughabisa mu dongo pa luwugha lwakwalikika na njerwa ulo luri pa muryango wa nyumba ya ufumu ya Faro ku Tapanesi. Uchite ichi uku ŵanthu wose ŵa charu cha Yuda ŵakuwona.

¹⁰Uŵaphalire ŵanthu kuti, ‘FUMU Mwenenkhongono zose, Chiuta wa Israele wakuti: Nditi nditume ŵanthu kuya katora muteŵeti wane Nebukadinezara, karonga wa charu cha Babuloni. Iyo wati waŵike chizumbe chakhe pachanya pa mawe gheneagho ndaghabisa. Wati watandazge hema lakhe la ufumu pachanya pa gheneagha.

¹¹Wati wize na kutimbana na charu cha Eguputo. Ŵanji awo ŵali kupimikira ku nthenda yakofya, wizamkuŵakoma na nthenda yakofya, awo ŵali kupimikira kuya ku umikori, wizamkuŵatorea ku umikori ndiposo awo ŵali kupimikira kufwira ku nkhondo, ku nkhondo ndiko ŵizamkufwira.

¹²Wati wabuske moto mu nyumba zakusoperamo za ŵachiuta ŵa charu cha Eguputo. Wati wawoche ŵachiuta ŵanji, ndipo ŵanji wati warute nawo ku umikori. Wati watozge charu cha Eguputo, nga ndi umo muliska wakuwuskiramo nyinda mu chakuvwara chakhe. Iyo wizamkuwukako kwenekura mu mutende.

¹³Wati wawiskire pasi mizati ya nyumba yakusoperamo chiuta wa dazi yeneiyo yili mu charu cha Eguputo. Wizamkocha na moto nyumba zakusoperamo za ŵachiuta ŵa mu charu cha Eguputo.’ ”