Read new_tumbuka_bible Yeremiya 44 Bible Online

Yeremiya 44 - new_tumbuka_bible bible

Yeremiya 44

¹Mazgu gha FUMU ghakiza kwa Yeremiya kuphara vya ŵaYuda wose awo ŵakakharanga mu charu cha Eguputo, mu msumba wa Migidoli, wa Tapanesi, wa Memufisi na mu chigaŵa chose cha Patirosi.

²FUMU Mwenenkhongono zose, Chiuta wa Israele wakuti, “Imwe mwawona uheni wose uwo ndachita mu msumba wa Yerusalemu na mu misumba yose ya mu charu cha Yuda. Wonani, muhanya uno ndi malo gha mahami, ghambula ŵanthu ŵakukharamo.

³Nkhachita ntheura chifukwa cha ubendezi uwo ŵakachita. Iwo ŵakandikaripiska ine pakocha vyakununkhira na kuteŵetera ŵachiuta ŵanyakhe awo iwo panji imwe, nesi ŵawiskemwekuru kuti ŵakaŵamanya chara.

⁴Ndipouli kaŵirikaŵiri nkhamutumirani nchimi, ŵateŵeti ŵane, izo zikati kwa imwe, ‘Mungachitanga chara chinthu cha ukazuzi icho ine nkhuchitinkha.’

⁵Kweni kuti ŵakapulikira chara nanga nkhutegherezga. Kuti wakawerako ku uheni wawo na kureka kocha vyakununkhira ku ŵachiuta ŵanyakhe chara.

⁶Ntheura kutukutwa kwa ukari wane kukapungulikira na kugolera pa misumba ya charu cha Yuda na mu misewu ya Yerusalemu. Misumba yira yikazgoka kuŵa mahami, yakupasuka nga ndi umo yiliri muhanya uno.”

⁷Sono FUMU Chiuta Mwenenkhongono zose, mweneuyo ndi Chiuta wa Israele wakuti, “Kasi mukuchitirachi uheni ukuru nga ndi uwu, kujinangira mwaŵene, kuwuskamo mwa imwe ŵanarume na ŵanakazi, ŵana na ŵabonda mu charu cha Yuda, kwambula kujisidirako nanga ngwa kukharako?

⁸Kasi mukundavyirachi ku ukari na milimo ya mawoko ghinu, pa kochera vyakununkhira ŵachiuta ŵanyakhe, mu charu cha Eguputo umo muli kwiza, kuti ndimo mukakharenge? Imwe mujimarenge mwekha ndipo mujizgorenge kuŵa ŵakutembeka, na ŵakusunjizgika mukati mu mafuko ghose gha mu charu.

⁹Kasi mwaruwa ubendezi uwo ŵakachita ŵawiskemwekuru, ŵakaronga ŵa mu charu cha Yuda na wa ŵawoli ŵawo, ubendezi winu na winu na wa ŵawoli ŵinu, uwo ŵakachita mu charu cha Yuda, na mu misewu ya mu msumba wa Yerusalemu?

¹⁰Mpaka sono ŵandajiyuyure, nanga nkhopa, nesi kwenda mu marango ghane na mu malangulo ghane agho nkhimika panthazi pinu na pa ŵawiskemwekuru chara.”

¹¹Ntheura FUMU Mwenenkhongono zose, uyo ndi Chiuta wa Israele wakuti, “Sono ndanozgeka kumuchitirani chinthu chiheni na kumumarani mose mwa ŵaYuda.

¹²Nditi ndiŵatore wose ŵakukharako ŵa mu charu cha Yuda, ŵeneawo ŵakanozgekera kuruta ku charu cha Eguputo kuti ndiko ŵakakharenge. Wose ŵati ŵamarire kwenekura ku Eguputo. Ŵizamkumara na nkhondo na njara, kwamba ŵachoko mpaka na ŵarara. Ŵizamkuŵa chinthu chakuseruska, chakofya, chakutembeka, na chakusunjizgika.

¹³Nditi ndiŵalange na nkhondo, na njara ndiposo na nthenda yakofya awo ŵakukhara mu charu cha Eguputo, nga ndi umo nkhaŵalangira ŵa mu msumba wa Yerusalemu.

¹⁴Na yumoza wa ŵakukharako ŵa mu charu cha Yuda awo ŵali kuruta kuya kukhara mu charu cha Eguputo, uyo wati wachimbire panji wapone kuti wawerere ku charu cha Yuda, kwenekuko ŵakunwekera kuya kakharako. Palije uyo wamkuwerako, kweni ŵachoko waka awo ŵamkuchimbira.”

¹⁵Ntheura ŵanarume wose awo ŵakamanya kuti ŵawoli ŵawo ŵakochanga vyakununkhira ku ŵachiuta ŵanyakhe, na wumba ukuru wa ŵanakazi awo ŵakimilira pafupi, pamoza na ŵanthu wose awo ŵakakharanga ku msumba wa Patirosi, mu charu cha Eguputo, ŵakamuzgora Yeremiya ŵakati,

¹⁶“Mazgu agho wayowoya kwa ise mu zina la FUMU, ise kuti tighapulikenge chara.

¹⁷Kweni ise tichite kalikose ako tili kurapa kuchita. Tocha sembe ya vyakununkhira kwa Fumukazi ya Kuchanya, na kuyipereka sembe ya vyakumwa, nga ndi umo tikachitira, ise na ŵasekuru ŵithu, ŵakaronga na nduna zithu, mu misumba ya mu charu cha Yuda na misewu ya mu Yerusalemu. Nyengo yira tikaŵanga na vyakurya vinandi ndipo tikakharanga makora ghene, kwambula kuwona na kaheni kalikose.

¹⁸Kweni umo tili kurekera kocha sembe ya vyakununkhira kwa Fumukazi ya Kuchanya, na kupereka sembe ya vyakumwa kwa iyo, takavuka vinandi, ndipo tamara na nkhondo na njara.”

¹⁹Ndipo ŵanakazi ŵakati, “Para tikochanga vyakununkhira kwa Fumukazi ya Kuchanya na kupereka sembe ya vyakumwa kwa iyo, ŵafumu ŵithu ŵakatizomerezganga kuti tiyiphikirenge vingwa vipapati ivyo vikaŵa na chikozgo chakhe, na kupereka kwa iyo sembe ya vyakumwa?”

²⁰Ntheura Yeremiya wakati ku ŵanthu wose, ŵanarume na ŵanakazi, awo ŵakamuzgoranga,

²¹“Asi FUMU yikukumbuka vyakununkhira ivyo mukochanga imwe na ŵawiskemwekuru, ŵakaronga ŵinu, nduna zinu, ndiposo na ŵanthu ŵa mu charu, mu misumba ya mu charu cha Yuda, mu misewu ŵa mu msumba wa Yerusalemu? Asi ndicho FUMU yikachighanaghananga?

²²FUMU kuti yikamanya kuzizipizga machitiro ghinu ghaheni na maukazuzi agho mukachita chara. Ntheura charu chinu chikazgoka kuŵa chakutembeka, cha mahami, chambula ŵanthu ŵakukharamo, nga ndi umo kuliri sono.

²³Chiheni ichi chamuwirani muhanya uno chifukwa mukochanga vyakununkhira, ndipo mukanangira FUMU pakureka kupulikira mazgu ghakhe, nanga nkhwenda mu marango ghakhe, panji malangulo ghakhe, na vilayizgo vyakhe.”

²⁴Yeremiya wakati ku ŵanthu wose pamoza na ŵanakazi wose, “Pulikani mazgu gha FUMU imwe mwa ŵaYuda, mwaŵeneimwe mukukhara mu charu cha Eguputo.”

²⁵FUMU Mwenenkhongono zose, Chiuta wa Israele, wakuti, “Imwe na ŵawoli ŵinu mwarongora mwekha ndipo mwachifiska na machitiro ghinu. Imwe mukati, ‘Ise tifiskenge nadi virapo ivyo tikachita. Tizamkocha vyakununkhira ku Fumukazi ya Kuchanya na kupereka sembe ya vyakumwa kwa iyo.’ Ipo khozgani virapo ivi na kuvichita.”

²⁶FUMU yikuti, “Imwe mwa ŵaYuda mose mwaŵeneimwe mukukhara mu charu cha Eguputo, pulikani mazgu gha FUMU. Ine nkhurapira mu zina lane likuru, kuti zina lane lireke kuzunurikaso na muYuda waliyose uyo wali mu charu chose cha Eguputo, nesi kurapa kuti, ‘Nkhurapira mwa FUMU, Chiuta wamoyo.’

²⁷Pakuti wonani ine sono nkhukhazga kuti ndiŵachitire chinthu chiheni, chiweme chara. ŴaYuda wose awo ŵakukhara mu charu cha Eguputo ŵati ŵakomeke na nkhondo, na njara, ŵasuke ŵamare petu.

²⁸Ŵakuponapo ku nkhondo, na kuwerako ku charu cha Eguputo kuruta ku charu cha Yuda, ŵaŵenge ŵachoko waka. Sono ŵaYuda wose awo ŵakharako, ŵeneawo ŵakiza mu charu cha Eguputo, kuti ndimo ŵakharenge, ŵati ŵamanye mazgu gha uyo ngwa kuneneska, mazgu ghane panji ghawo.”

²⁹FUMU yikuti, “Ichi ndicho chiŵenge chimanyikwiro kwa imwe chakuti nditi ndimulangani mu malo agha, mwakuti mumanye kuti nadi mazgu ghane ghakuti ndimulangani mu charu ichi chifukwa cha uheni uwu, nga unenesko.”

³⁰FUMU yikuti, “Nditi ndipereke Faro Hofira, karonga wa charu cha Eguputo ku ŵarwani ŵakhe, ku awo ŵakupenja umoyo wakhe, nga ndi umo nkhaperekera Zedekiya karonga wa charu cha Yuda kwa Nebukadinezara, karonga wa charu cha Babuloni, murwani wakhe uyo wakapenjanga umoyo wakhe.”