Read new_tumbuka_bible Yeremiya 46 Bible Online

Yeremiya 46 - new_tumbuka_bible bible

Yeremiya 46

¹Mazgu gha FUMU agho ghakiza kwa Yeremiya kuphara vya mafuko ghakupambanapambana.

²Vya charu cha Eguputo: Uwu ndi uthenga wakuphara vya ŵasilikari ŵa Faro Neko, karonga wa charu cha Eguputo. Iwo ŵakathereskeka na Nebukadinezara, karonga wa charu cha Babuloni ku Karikemishi pa mronga wa Yufurate, mu chirimika cha chinayi cha kuwusa kwa Yehoyiyakimu, mwana wa Yosiya, karonga wa charu cha Yuda:

³“Nozgekera chakuŵekera na nguru, rutani mukarwenge nkhondo.

⁴Kakani viskaro pa mahachi, ŵakukwera mahachi ŵakwerepo. Kharani mu malo ghinu, uko mwavwara vipewa. Norani mikondo yinu, muvware ngunya yinu.

⁵Kasi sono nkhuwona vichi? Ŵanthu ŵakuthika lusoko, ndipo ŵakuwerera nyuma. Ŵasilikari ŵawo ŵathereskeka, ndipo ŵakuchimbira luŵiroluŵiro. Kuti ŵakulaŵiska kunyuma chara, ŵakoreka na wofi kosekose.” Ntheura ndimo FUMU yikuyowoyera.

⁶“Ŵaluŵiro kuti ŵangachimbira chara, nanga nchinkhara kupona. Ku mpoto kwa mronga wa Yufurate, ŵakukhuŵara na kuwa.

⁷“Kasi ndi njani uyu, wakuwuka nga ndi Nayelo, nga ndi mironga iyo maji ghakhe ghatura?

⁸Eguputo wakuwukira muchanya nga ndi Nayelo, nga ndi mironga iyo maji ghakhe ghatura. Iyo wakuti, ‘Nditi ndiwukire muchanya, na kuzura charu cha pasi, nditi ndiparanye misumba na ŵanthu ŵakhe.’

⁹Chimbirani, imwe mahachi, pomani, imwe magareta. Vinkhara virutenge, imwe mwa ŵaEtiyopiya na ŵaPuti, mwaŵeneimwe mukukorera nguru. Imwe ŵanthu ŵa ku Ludi, nkhwantha pakuponya mauta.

¹⁰Kweni zuŵa lenelira nda FUMU, Chiuta Mwenenkhongono zose, ndi zuŵa la kuwezgera nduzga, kuwezgera nduzga pa ŵarwani ŵakhe. Lupanga luzamkuŵasakaza na kukhuta, lusuke luzakakhorwe na ndopa zawo. Pakuti FUMU, Chiuta Mwenenkhongono zose, wakupereka sembe, ku charu cha ku mpoto, pafupi na mronga wa Yufurate.

¹¹Imwe ŵa Eguputo, rutani ku Gileyadi, mukatore munkhwara wakuphaka. Nangauli mwayezga minkhwara yinandi, kweni mwatondeka kuchira.

¹²Ŵamitundu ŵapulike kukhozgekera soni kwinu, charu chose chazura na kulira kwinu. Pakuti vinkhara vyabwanyana, vyose vyawira pamoza.”

¹³Agha ndi mazgu agho FUMU yikayowoya kwa Yeremiya pa vya kwiza kwa Nebukadinezara karonga wa charu cha Babuloni kwiza karwa nkhondo na charu cha Eguputo:

¹⁴Pharazga mu charu cha Eguputo, ndipo thuwuska ku Migidoli. Uŵaphalire ŵa Memufisi na ŵa ku Tapanesi. Uti kwa iwo, “Khazgani ndipo munozgeke, pakuti nkhondo yiti yimumarani mose zingirizge.”

¹⁵Kasi nchifukwa uli Apisi, chiuta winu, wachimbira? Kasi Apisi, nkhambako yinu yira, warekerachi kumurwerani? Chifukwa FUMU yikamuwiskira pasi.

¹⁶Ŵasilikari ŵakakhuŵara na kuwa, ndipo ŵakati ku yumoza na munyakhe, “Wukani, tiyeni tiwerere ku kwithu, ku ŵanthu ŵakwithu na charu chithu, kuti tireke kukomeka na ŵarwani ŵithu.”

¹⁷Faro, karonga wa charu cha Eguputo, mumuthye kuti, “Wachiwawa, uyo wataya mwaŵi wakhe.”

¹⁸Karonga, uyo zina lakhe ndi FUMU Mwenenkhongono zose, wakuti, “Nkhurapa nadi! Munthu munyakhe wankhongono wizenge, nga ndi Taboro, phiri lakuruska mapiri ghanyakhe, nga ndi Phiri la Karimele mu mphepete mwa nyanja.

¹⁹Nozgerani katundu wakuruta nayo ku umikori, mwaŵeneimwe mukukhara mu charu cha Eguputo, pakuti msumba wa Memufisi uti uzgokenge mapopa, uti uŵe mahami ghambula ŵanthu.”

²⁰“Charu cha Eguputo chili nga ndi ng'ombe yanakazi yakutowa. Kweni murwani uyo wali nga ndi kaskembe, wakufumira ku mpoto wiza na kudeka pa iyo.

²¹Ŵasilikari ŵa ganyu awo ŵali mukati mwawo, ŵali nga ndi ŵana ŵa ng'ombe ŵakututuŵa. Inya, ŵawerako ndipo ŵachimbira pamoza, kuti ŵakachintha chara. Pakuti zuŵa lawo la soka laŵafikira, ndiyo nyengo yakuti ŵalangikire.”

²²“ŴaEguputo ŵakupanga chiwawa nga ncha njoka iyo yikuchimbira, pakuti ŵarwani ŵawo ŵakwenda na nkhongono. Ŵakuŵarotokera na zimbavi, nga ndi ŵanthu awo ŵakutema makuni.

²³Ŵati ŵateme nkhorongo yakhe, nangauli ndakukhora na lambula kuporotamo, chifukwa iwo mbanandi kuruska zombe, kuti ŵangapendeka chara.” Ntheura ndimo FUMU yikuyowoyera.

²⁴“Ŵa mu charu cha Eguputo ŵati ŵakhozgeke soni, ŵati ŵaperekeke ku ŵanthu ŵa ku mpoto.”

²⁵FUMU Mwenenkhongono zose, Chiuta wa Israele wakuti, “Nditi ndilange Amoni, chiuta wa msumba wa Tebesi. Ndizamkulangaso Faro na charu cha Eguputo pamoza na ŵachiuta ŵakhe ndiposo na ŵakaronga ŵakhe. Ndizamkumulanga nadi Faro pamoza na wose awo ŵakumugomezga.

²⁶Ndizamkuŵapereka kwa Nebukadinezara karonga wa charu cha Babuloni na kwa ŵarongozgi ŵakhe ŵa nkhondo awo ŵakupenja umoyo wawo. Pamanyuma charu cha Eguputo chizamkuŵaso na ŵanthu, nga ndi umo kukaŵira kale.” Ntheura ndimo FUMU yikuyowoyera.

²⁷Kweni iwe Yakhobe muteŵeti wane, ureke kopa, iwe Israele ureke kuthika lusoko. Wona nditi ndikuponoske kufuma kutali, nditi ndiponoske mphapu yako kufuma ku umikori wako. Yakhobe wati wawereko, ndipo wizamkukhara mu mutende na mu kufwasa, paŵavyenge na yumoza wakukuwofya.

²⁸“Iwe Yakhobe, muteŵeti wane, ureke kopa, pakuti ine ndili nawe. Nditi ndighamare petu mafuko ghose, ku vyaru ivyo nkhakuchimbizgirako, kweni iwe kuti ndizamkukumara petu chara. Nditi ndikulange mu urunji, nditi ndikureke waka chara kwambula kukulanga.” Ntheura ndimo FUMU yikuyowoyera.