Read new_tumbuka_bible Yeremiya 48 Bible Online

Yeremiya 48 - new_tumbuka_bible bible

Yeremiya 48

¹Pa vya charu cha Mowabu, FUMU Mwenenkhongono zose, Chiuta wa Israele, wakuti, “Soka ku msumba wa Nebo, pakuti wazgoka mahami! Msumba wa Kiriyatayimu wakhozgeka soni, na kutoreka. Linga lakhe lakhozgeka soni na kubwangandukira pasi.

²Uchindami wa charu cha Mowabu wamara, mu msumba wa Heshiboni ndimo ŵakanozgera, vya kuŵachitira chinthu chiheni. Iwo ŵakati, ‘Zaninge, tiyeni tiŵamare petu, ŵareke kuŵaso fuko.’ Na iwe msumba wa Madimeni, uti uchetamiskike, nkhondo yiti yikurondezge.

³Pulikani, kulira kwa ŵanthu ŵa ku Horonayimu, kulira kwa chitimbaheti na phasulo likuru!

⁴Charu cha Mowabu chapankhuka, ŵana ŵachoko[8] ŵizamkulira nadi.

⁵Pakuti pa chikwera cha ku Luhiti, ŵakukwera uku ŵakulira. Pa wikho wa ku msumba wa Horonayimu, kulira kwa pharaniko kukupulikikwa.

⁶Chimbirani, mujithaske, chimbirani nga ndi boli mu chiparamba.

⁷Pakuti imwe mukagomezga mu milimo na usambazi winu, na imwe wuwo muti mutorekenge. Chiuta winu Kemoshi, wati warute ku umikori pamoza na ŵasofi na nduna zakhe.

⁸Wakukoma yura wati wize ku msumba uliwose, kuŵavyenge msumba wakuponapo. Dambo liti linangike, charu cha chidika chiti chiparanyike, pakuti FUMU yayowoya.

⁹Muchinozgere dindi charu cha Mowabu, pakuti chiti chipankhukenge. Misumba yakhe yiti yizgokenge mapopa, yambula na munthu wakukharamo.”

¹⁰“Ngwakutembeka uyo wakuchita mlimo wa FUMU mwakutomboroka. Ngwakutembeka uyo wakureka kukoma na lupanga lwakhe.”

¹¹“Charu cha Mowabu chaŵa mu mutende kufuma papo kale, ndipo chaŵa nga ndi vinyo ilo layenjama pa visika vyakhe. Chaŵa chambula kupungulikapo, kufuma mu chiŵiya ichi kuya mu chinyakhe, nanga nkhuyako ku umikori. Ndicho chifukwa kunowa kwakhe kuchali waka, ndipo sungu lakhe lindasinthike.”

¹²FUMU yikuti, “Wonani mazuŵa ghakwiza apo ndamkutuma ŵanthu kuti ŵasendeke charu cha Mowabu nga ndi chiŵiya icho chili na vinyo. Iwo ŵizamkupungura vinyo mu viŵiya na kuswa viŵiya vyakhe tuchokotuchoko.

¹³Penepapo charu cha Mowabu chizamkukhozgeka soni na chiuta wakhe Kemoshi, nga ndi ŵaIsraele ŵakakhozgekera soni na Betele, Chiuta uyo ŵakagomezganga.”

¹⁴“Kasi imwe mukuyowoya uli kuti, ‘Ise ndise vinkhara, ŵanarume ŵakukhwima mu nkhondo?’

¹⁵Wakwiza uyo wizamkuparanya, charu cha Mowabu na misumba yakhe, ŵawukirano ŵakhe ŵaweme ŵakuruta kuya kakomeka. Ndimo wakuyowoyera Karonga, uyo zina lakhe ndi FUMU Mwenenkhongono zose.

¹⁶Kupankhuka kwa charu cha Mowabu kwaneng'enera, visuzgo vyakhe vikwiza maluŵiro.

¹⁷Chitengererani mose imwe mwachizingirizga, mose imwe mukumanya lumbiri lwakhe. Muyowoye kuti, ‘Mbaya mwe, ndodo yakukhora ya ufumu yaphyoka! Ndodo yira ya uchindami yaphyoka nadi.’ ”

¹⁸“Imwe mwa ŵa mu msumba wa Diboni, khirani kufuma pa uchindami winu, mukhare pa malo gha chinkhamwa. Pakuti uyo wizamkuparanya charu cha Mowabu, wizenge kwiza karwa namwe, na kupankhura malinga ghinu.

¹⁹Imwe mwa ŵa mu msumba wa Aroyere, yimilirani mu mphepete mwa nthowa muwone. Mufumbe mwanarume uyo wakuchimbira, na mwanakazi uyo wapona, muti, ‘Kasi kwawachi?’

²⁰Iwo ŵati ŵazgore kuti, ‘Charu cha Mowabu chakhozgeka soni, pakuti chapankhuka, tengerani na kulira! Mukaphare ku mronga wa Arinoni, kuti charu cha Mowabu chapankhuka.’ ”

²¹“Weruzgi wiza pa charu cha mapiri, iyo ndi misumba ya Holoni, Yaza na Mefaati,

²²wa Diboni, wa Nebo, wa Beti Dibilatayimu,

²³wa Kiriyatayimu, wa Beti Gamulu, wa Beti Meyoni,

²⁴wa Keriyoti, wa Bozira, na misumba yose ya mu charu cha Mowabu, pafupi na patali.

²⁵Nkhongono za Mowabu zawuskikako, mankharo ghakhe nagho ghamara.” Ntheura ndimo FUMU yikuyowoyera.

²⁶FUMU yikati, “Muloŵezgani Mowabu chifukwa wakajikuzga pakwimikana na FUMU. Charu cha Mowabu chiti chikunkhure mu mawukuzi ghakhe, ndiposo chiti chiŵe chimuhoyere.

²⁷Asi Israele wakaŵa chimuhoyere kwa iwe? Asi wakaŵa mukati mu ŵankhungu, kuti nyengo zose para mukayowoyanga na vya iyo mukapukunyanga mitu yinu?

²⁸Imwe mukukhara mu charu cha Mowabu, yirekeni misumba yinu, mukakhare mu jarawe. Muŵe nga ndi njiŵa iyo yikuzenga chivimbo chakhe, mu mphepete mwa mlomo wa mphanji.

²⁹Tapulika kujikuzga kwa ŵaMowabu, mba kujikuzga chomene. Tapulika kujitukumura, kujikuzga na ŵakujikwezga kwawo, ndiposo na kujitunthumura kwa mitima yawo.

³⁰Nkhumanya kujikuzga kwawo. Kujitukumura kwawo nkhwa utesi ndipo milimo yawo nayo nja upusikizgi.

³¹Ntheura nditi ndibangulire charu cha Mowabu, ndiŵalirire wose ŵa mu charu cha Mowabu, ndiŵatengere ŵa mu msumba wa Kiri Heresi.

³²Imwe ŵanthu ŵa ku Sibima, muli nga ndi mpheska ine nkhumulirirani kuruska ŵa mu Yazere. Minthavi yinu yikatandazga mpaka ku nyanja, yikaya kafika mu msumba wa Yazere. Wakukoma wavwandamirapo pa vipambi vya mu chifuku na mpheska yako.

³³Kusekerera na kukondwa vyafumamo, kufuma mu mpheska na minda ya Mowabu, Ndakanizga kuti vinyo lifume mu chakukamiramo, palije uyo wakuponda mpheska na chimwemwe, kuchemerezga uko kulipo, kuti nkhwa chimwemwe chara.

³⁴“Ŵa mu msumba wa Heshiboni na wa Eleyale ŵakulira. Mazgu ghawo ghakuya kafika ku msumba wa Yahazi, kufuma ku msumba wa Zowara kuya kafika ku msumba wa Horonayimu na wa Egilati Shelishiya. Pakuti maji gha ku Nimirimu nagho ghakamuka.

³⁵Nditi ndiŵakome ŵaMowabu wose awo ŵakupereka sembe mu malo gha pachanya ghakusoperako na kocha vyakununkhira ku ŵachiuta ŵawo.” Ntheura ndimo FUMU yikuyowoyera.

³⁶“Ntheura nkhuŵalirira ŵa mu charu cha Mowabu nga ndi fyoliro. Nkhuŵalirira nga ndi fyoliro ŵanthu ŵa mu msumba wa Kiri Heresi, pakuti usambazi uwo ŵakawunjika wamara.

³⁷Pakuti munthu waliyose wameta mupara, mwembe nawo ngwa kumeta. Mu mawoko ghose ŵajichekacheka ndipo mu viwuno ŵavwara vigudulu.

³⁸Pachanya pa zinyumba zose na maluwugha gha mu charu cha Mowabu mukupulikikwa kanthu kanyakhe chara kweni kutengera pera. Pakuti ndaswa Mowabu nga ndi chiŵiya icho na yumoza wakupwererako chara.

³⁹Wonani umo waswekera! Wonani umo ŵanthu ŵakhe ŵakutengerera! Wonani umo Mowabu wakhozgekera soni! Mowabu wazgoka chimuhoyere na chinthu chakuseruska ku wose awo ŵakumuzingirizga.” Ntheura ndimo FUMU yikuyowoyera.

⁴⁰FUMU yikuti, “Yumoza wati wawuruke luŵiroluŵiro nga ndi nombo, wati watandaurire mapapindo ghakhe, pachanya pa charu cha Mowabu.

⁴¹Misumba yizamkutoreka, malinga ghizamkupokeka. Pa zuŵa ilo vinkhara vya mu charu cha Mowabu, vizamkuŵa na wofi nga ndi vya mwanakazi pa nyengo ya kubabira.

⁴²Charu cha Mowabu chizamkumara petu, kuti chizamkuŵaso fuko la ŵanthu chara, chifukwa chajikuzga kwakhe na kwimikana na FUMU.

⁴³Imwe ŵaMowabu, wofi, khururu na chipingo vikumulindirirani.” Ntheura ndimo FUMU yikuyowoyera.

⁴⁴“Uyo wakuchimbira ku wofi, wati wawire mu khururu, uyo wakufuma mu khururu, wati wawire mu chipingo. Pakuti nditi ndize na chirimika cha chilango, pa charu cha Mowabu.” Ntheura ndimo FUMU yikuyowoyera.

⁴⁵“Awo ŵakuchimbira ŵambula nkhongono, ŵakupumula mu mufwiri wa msumba Heshiboni, Pakuti moto wabuka kufuma mu Heshiboni, dimi la moto kufuma mu nyumba ya Sihoni. Wocha mapiri gha mu charu cha Mowabu, charu cha ŵanthu ŵa viwawa.

⁴⁶Soka kwa imwe ŵa mu charu cha Mowabu! Ŵanthu ŵakusopa chiuta Kemoshi ŵamara. Ŵana ŵinu ŵanarume ŵatoreka kuŵa ŵamikori, ŵana ŵinu ŵanakazi nawo ŵatorekera ku umikori.

⁴⁷Ndipouli mu mazuŵa gha kunthazi ndizamkuŵawezgera mauweme ŵa mu charu cha Mowabu.” Ntheura ndimo FUMU yikuyowoyera. Weruzgi pa charu cha Mowabu ukumalira apa.