Read new_tumbuka_bible Yeremiya 49 Bible Online

Yeremiya 49 - new_tumbuka_bible bible

Yeremiya 49

¹Pakuyowoya vya ŵaAmoni, FUMU yikuti, “Kasi charu cha Israele chilije ŵana ŵanarume? Kasi chilije muhaliri? Nchifukwa uli chiuta ngoza Milikomu wapoka charu cha Gadi, ndipo ŵanthu ŵakhe ŵakukhara mu misumba yakhe?”

²FUMU yikuti, “Mazuŵa ghakwiza, apo nditi ndichitiske kuti kamphomezi ka nkhondo kapulikikwe, pakwimikana na Raba, msumba wa ŵaAmoni. Msumba wizamkuzgoka mahami, vikaya vyakhe vizamkocheka pa moto. ŴaIsraele ŵizamkutora charu icho ŵakapokeka.” Ntheura ndimo FUMU yikuyowoyera.

³“Tengerani, imwe ŵa mu msumba wa Heshiboni, pakuti msumba wa Ayi wazgoka mapopa. Lirani, imwe ŵa mu msumba wa Raba, mujiphinye na chigudulu. Tengerani, muchimbilire uku na uku, mukati mu maluŵigho. Pakuti Moleki wati warute ku umikori, pamoza na ŵasofi ŵakhe na nduna zakhe.

⁴Kasi nchifukwa uli mukujikuzga na madambo ghinu gha nyata, imwe ŵanthu ŵambula kugomezgeka? Imwe mukugomezga mu mausambazi ghakhe, pakuyowoya kuti, ‘Ndi njani wati walimbane nase?’

⁵Wonani, nditi ndize na chofyo kwa imwe, kufuma ku awo ŵamuzingirizgani. Waliyose wa imwe wati wachimbizgikire kuwaro na kubaralika, kwambula na yumoza wakuwunganya awo ŵachimbizgika.

⁶Kweni pamanyuma, ndizamkuŵawezgera mauweme gha ŵaAmoni.” Ntheura ndimo FUMU yikuyowoyera.

⁷Pakuyowoya vya charu cha Edomu, FUMU Mwenenkhongono zose, Chiuta wa Israele, wakuti, “Kasi vinjeru vyamara mu charu cha Temani? Kasi urongozgi wamalirathu mu ŵakuchenjera? Kasi vinjeru vyawo vyamwalirikira?

⁸Imwe mukukhara mu charu cha Dedani, chimbirani, weraniko, mubisame mu zimphanji. Pakuti ine nditi ndize na pharaniko pa Esau, pa nyengo iyo nditi ndimulangire.

⁹Usange ŵakuponthora mpheska ŵangiza kwa iwe, kasi ŵangarekamo vulura chara? Usange ŵankhungu ŵangiza na usiku, kasi ŵangatora chara vyakukwanira, ivyo iwo ŵakukhumba?

¹⁰Kweni nditi ndimuvure Esau, nditi ndibenure malo ghakhe ghakubisamamo, mwakuti ŵangajibisaso chara. Ŵana ŵakhe, ŵana ŵanyakhe, na ŵazengezgani ŵakhe ŵamara tetete, palije na yumoza uyo wakharako.

¹¹Ŵareke ŵana ŵako ŵalanda, ine ndine ndiŵalerenge, vyokoro vyako vigomezgenge mwa ine.”

¹²FUMU yikuti, “Usange awo ŵakenerera kumwa nkhombo ya chilango chara, ndiwo ŵakumwa ndipera, kasi iwe uti uŵe wambula kulangika? Iwe kuti urekenge kulangika chara, kweni umwenge ndipera nkhombo iyi.

¹³FUMU yikuti, Chifukwa ndajirapizga kuti, msumba wa Bozira wizamkuŵa chinthu chakuseruska, na chimuhoyere, nthombozgo, phasulo, na nthembo. Ndipo misumba yakhe yose yizamkuŵa mapopa kwa muyirayira.”

¹⁴Ndapulika uthenga kufumira kwa FUMU, thenga latumika mu mafuko kuphara kuti, “Wunganani pamoza mulimbane nayo, wukani murwe nkhondo.

¹⁵Pakuti, wona, nditi ndikuzgore muchoko mukati mu mafuko, na ŵakuyuyurika mukati mu ŵanthu.

¹⁶Kofya kwako kwakupusika, kujikuzga kwako kwakupuruska. Iwe ukukhara mu zimphanji za majarawe, wa mweneiwe ukudemerera pachanya pa phiri. Nanga ungaŵika chikhazi chako pachanya, nga ndi chivimbo cha nombo, ndizamkukukhizgira pasi kufuma apo uli.” Ntheura ndimo FUMU yikuyowoyera.

¹⁷FUMU yikuti, “Charu cha Edomu chizamkuŵa chinthu chakuseruska. Yose uyo wakujumphapo wizamkujuma na kufyonya chifukwa cha kupankhuka kwakhe kose.

¹⁸Nga ndi umo Sodomu na Gomora wakabwangandukira, pamoza na misumba iyo yikapakana nayo, ndimo kuŵirenge na Edomu. Kwamkuŵavye na yumoza wakukharako, nanga ndi yumoza uyo wizamkupanjwamo.

¹⁹Wonani, nga ndi nkharamu iyo yikwiza kufuma mu matundu gha mronga wa Yorodani kwiza kalimbana na chitupa cha mberere, icho nchakukhora, ntheura ndimo ndizamkuchimbizgira ŵaBabuloni mwa mabuchibuchi. Pamanyuma ndizamkuŵamikira wakuŵawusa uyo ndamusankha. Pakuti ndi njani uyo wakuyana nane? Ndi njani uyo wizamkundichemera pa mphara ya mrandu? Ndi murongozgi nju uyo wangalimbana nane?

²⁰Ntheura pulikani ivyo FUMU yanozgera pakususkana na charu cha Edomu, ndiposo na dazgo ilo yili kunozgera pakulimbana na awo ŵakukhara mu charu cha Temani. Nadi ŵana-mberere ŵizamkukwekweteka. Chitupa nacho chizamkurwahama waka chifukwa cha ivyo vyaŵawira.

²¹Pa mphomo ya kuwa kwawo, charu cha pasi chizamkusunkhunyika. Mphomo ya kulira kwawo, yizamkupulikikwa mpaka ku Nyanja ya Matete.

²²Wonani, yumoza wati wakwere na kuwuruka luŵiroluŵiro nga ndi nombo iyo yatandaula mapapindo ghakhe kulimbana na msumba wa Bozira. Pa zuŵa leneilo vinkhara vya charu cha Edomu, vizamkuŵa na wofi, nga ndi mwanakazi pa nyengo ya kubabira.”

²³Pa vya Damaseko FUMU yikuti, “ŴaHamati na ŵaAripadi ŵatimbanizgika, pakuti ŵapulika uthenga uheni. Nkhongono zagururuka chifukwa cha wofi, ŵavunduka nga ndi nyanja, iyo yikutondeka kuŵa bata.

²⁴Ŵa mu msumba wa Damaseko ŵaropwa, ŵakukhumba kuchimbira, chifukwa wofi waŵakora. Vyakuŵinya na vitima vyaŵakora, nga vya mwanakazi pa nyengo ya kubabira.

²⁵Mwe msumba wa lumbiri wasidika, msumba uwo nkhaŵa nawo na chimwemwe!

²⁶Nadi ŵanyamata ŵakhe, ŵizamkufwira mu maluwugha ghakhe, ŵasilikari ŵakhe wose, ŵizamkumara petu mu zuŵa leneilo.” Ntheura ndimo FUMU Mwenenkhongono zose yikuwoyera.

²⁷“Ndizamkubuska moto, mu malinga gha Damaseko, wizamkumyangura nyumba za ufumu za Beni Hadadi.”

²⁸FUMU yikuti pa vya fuko la Kedara na maufumu gha charu cha Hazoro, gheneagho Nebukadinezara, karonga wa charu cha Babuloni wakaghabwangandula: “Wukani, murwe na ŵaKedara, muŵamare petu ŵanthu ŵa ku mafumiro gha dazi.

²⁹Mukapoke mahema ghawo na vyakuŵeta vyawo, salu zawo zakuchinga vipinda na katundu wawo yose. Ŵangamila ŵawo nawo ŵaskogheke, ŵanthu ŵamkuchemerezga kuti, ‘Ŵanthu ŵakutenthema kosekose!’ ”

³⁰“Imwe mukukhara mu charu cha Hazoro, chimbirani, rutani kutali, mukabisame mu zimphanji. Nebukadinezara, karonga wa charu cha Babuloni, wanozgera kurwa namwe, dazgo lakhe ndakwimikana namwe.” Ntheura ndimo FUMU yikuyowoyera.

³¹“Wukani, murwe na fuko la mutende leneilo likukhara mu kufwasa, fuko ilo lilije vipata nesi mphingirizgo, ilo likukhara pa lekha.” Ntheura ndimo FUMU yikuyowoyera.

³²“Ŵangamila ŵawo ŵati ŵaskogheke, vyakuŵeta zawo yipokekenge. Nditi ndiŵambininiskire kosekose, ŵeneawo ŵakumeta masisi ghawo mu mphepete. Nditi nditorere pharaniko pa iwo, kufumira kosekose.” Ntheura ndimo FUMU yikuyowoyera.

³³“Charu cha Hazoro chizamkuŵa mapopa kwa muyirayira, malo ghakukharamo ŵakambwe. Palije munthu uyo wizamkukharamo, na yumoza uyo wizamkupanjwamo.” Ntheura ndimo FUMU yikuyowoyera.

³⁴Mazgu gha FUMU ghakiza kwa Yeremiya kuphara vya ŵaElamu, apo Zedekiya, karonga wa charu cha Yuda, wakambiranga kuwusa.

³⁵FUMU Mwenenkhongono zose yikuti, “Wonani, nditi ndiphyore uta wa charu cha Elamu, uwo nchitopoko cha nkhongono zawo.

³⁶Nditi nditorere charu cha Elamu mphepo zinayi kufumira ku mphepo zinayi za kuchanya na kumbininiskira ŵanthu ŵakhe kosekose. Kwamkuŵavye nanga ndi fuko limoza mu charu umo ŵaElamu ŵamkureka kunjiramo.

³⁷Ndamkuŵazgora ŵaElamu kuti ŵaŵe na wofi ku ŵarwani ŵawo, na awo ŵakupenja umoyo wawo. Nditi ndiŵakhizgire chinthu chiheni pa iwo uwo ndi ukari wane wakofya. Ndamkutuma nkhondo kuŵarondezga ŵasuke ŵamare petu. Ntheura ndimo FUMU yikuyowoyera.

³⁸Ndamkukoma karonga wawo pamoza na nduna zakhe, ndipo ndamkwimika chizumbe chane mu charu cha Elamu.” Ntheura ndimo FUMU yikuyowoyera.

³⁹“Kweni mu mazuŵa agho ghakwiza, ndamkuŵawezgera ŵaElamu mauweme ghawo mu charu cha kwawo kufuma ku umikori.” Ntheura ndimo FUMU yikuyowoyera.