Read new_tumbuka_bible Yeremiya 5 Bible Online

Yeremiya 5 - new_tumbuka_bible bible

Yeremiya 5

¹Yendani uku na uku mu misewu ya Yerusalemu, laŵiskani na kupanikizga. Penjani mu maluwugha ghakhe kuti muwone, usange mungasangamo munthu, uyo wakuchita mu urunji na kupenja unenesko, mwakuti ŵanthu ŵa mu Yerusalemu ndiŵagowokere.

²Nangauli ŵakuti, “Nkhurapira mwa FUMU,” kweni ŵakurapa vya utesi.

³Mwe FUMU, asi imwe mukupenja unenesko? Mwaŵatimba, kweni kuti ŵakupulika vyakuŵinya chara. Mwaŵamara kweni ŵakukana kuchenyeka, ŵanonofya mitima yawo kwakuruska jarawe, ŵakana kuzgoka mtima.

⁴Ntheura ine nkhati, “Aŵa mbanthu ŵapasi, ŵalije na mahara! Pakuti ŵakumanya chara nthowa ya FUMU, dango la Chiuta kuti ŵakulimanya chara.

⁵Nditi ndirute ku awo mba mazaza, na kuyowoya nawo. Ŵakumanya nthowa ya FUMU, dango la Chiuta wawo ŵakulimanya nadi.” Kweni nkhawona kuti nawoso ŵali kuphyora goliwoli, ŵali kubanthura vikondo.

⁶Pa chifukwa ichi nkharamu ya ku thengere yizamkuŵakoma, mphumphi ya mu chiparamba yizamkuŵara petu. Nyalubwe nayo wakukhazga pa misumba yawo, ndipo yose uyo wati wafumire kuwaro wizamkuzwaturika. Pakuti kwananga kwawo nkhunandi, kuwerera nyuma kwawo kwandana.

⁷FUMU yikuti, “Kasi ndingamugowokerani uli? Ŵana ŵinu ŵandireka, ndipo ŵarapira mu ŵachiuta awo kuti mbachiuta chara. Ine nkhaŵapa vyose ivyo ŵakakavukanga kweni iwo ŵakachitanga uleŵe. Iwo ŵakarutanga ku nyumba za ŵanakazi ŵazaghali.

⁸Iwo ŵakaŵa nga mbakavalo ŵanarume ŵakututuŵa, awo mbakuhunguka. Waliyose wakudokera muwoli wa muzengezgani wakhe.

⁹Kasi ndingareka uli kuŵalanga chifukwa cha vyeneivi? Kasi ndingareka kuwezgera nduzga, pa fuko lakuŵa nga ndi ili?” Ntheura ndimo FUMU yikuyowoyera.

¹⁰“Kwererani mu minda yakhe ya mpheska na kuyinanga, kweni mungayinangirangathu chara. Muwuskemo minthavi yakhe, chifukwa kuti ndi minthavi ya FUMU chara.

¹¹Pakuti ŵaIsraele na ŵaYuda, ŵaŵa ŵambula kugomezgeka kwa ine.” Ntheura ndimo FUMU yikuyowoyera.

¹²Ŵanthu aŵa ŵayowoya vya utesi vyakukhwaska FUMU. Iwo ŵakati, “Kuti yichitengepo kanthu chara. Palije na kaheni ako kati katiwonekere, kuti tiwonenge nkhondo nesi njara chara.

¹³Nchimi ziŵenge nga ndi viphwafu vya waka, mazgu gha Chiuta kuti ghalimo mwa izo chara. Ntheura ivyo zikuyowoya vichitikire izo.”

¹⁴Ntheura FUMU, Chiuta Mwenenkhongono zose wakuti, “Pakuti ŵanthu aŵa ŵayowoya mazgu agha, nditi ndizgore mazgu ghane kuŵa moto mu mlomo wako, ndipo ŵanthu aŵa kuŵa nkhuni za moto weneuwu.”

¹⁵“Imwe ŵaIsraele, nditi ndize na fuko la ŵanthu, lakufumira kutali kwiza kalimbana nawe. Ili ndi fuko lankhongono chomene, fuko la kale na kale. Ndi fuko ilo kuti chiyowoyero chakhe ukuchimanya chara, nesi kupulika ivyo ŵakuyowoya.” Ntheura ndimo FUMU yikuyowoyera.

¹⁶“Mivwi yawo yili nga ndi madindi gha mwazi, ndipo ŵasilikari wose ndi vinkhara vya nkhondo.

¹⁷Ŵizamkumara vuna yinu na vyakurya vyinu vinyakhe, ŵizamkukoma ŵana ŵinu ŵanarume na ŵanakazi. Ŵizamkukoma mberere na mbuzi zinu na ng'ombe zinu, ŵizamkumara mpheska zinu na vikuyu vyinu. Misumba yinu iyo mukuyigomezga, ŵizamkuyibwangandulira pasi pakwiza na nkhondo.”

¹⁸FUMU yikuti, “Ndipouli nanga ndi mu mazuŵa gheneagho, kuti ndizamkumumarani nkhanira chara.

¹⁹Ndipo para ŵanthu ŵakukufumba kuti, ‘Kasi nchifukwa uli FUMU, Chiuta withu watichitira vyose ivi?’ Iwe wizakaŵazgorenge kuti, ‘Nga ndi umo mwarekera FUMU na kuteŵetera ŵachiuta ŵachilendo mu charu chinu, ndimo mwamkuteŵetera ŵanthu ŵalendo mu charu icho nchinu chara.’ ”

²⁰Pharani ichi ku ŵana ŵa Yakhobe, pharazgani ichi mu charu cha Yuda kuti:

²¹Pulikani ichi, imwe vindere na ŵambula mahara, mwaŵeneimwe muli na maso, kweni kuti mukuwona chara. Mwaŵeneimwe muli na makutu, kweni kuti mukupulika chara.

²²FUMU yikuti, “Kasi mukundopa ine chara? Kasi mungatenthema chara panthazi pane? Ine ndine nkhaŵika muchenga kuŵa mphaka ya nyanja muyirayira, mphaka iyo nyanja kuti yingajumpha chara. Nanga majigha ghangatutuzga, kweni kuti ghangatonda chara, ghangapopoma, kweni kuti ghangajumpha chara.”

²³Kweni ŵanthu aŵa mba mtima unonono na wa chigaruka, ŵapatukako kwa ine na kuruta.

²⁴Iwo ŵalije kuyowoya mu mitima yawo kuti, “Tiyeni tichindike FUMU, Chiuta withu, mweneuyo wakutipa vura mu nyengo yakhe, vura yakudanga na ya kumalira. Iyo wakutondeka chara, kutipa nyengo ya kuvunira.”

²⁵Maubendezi ghinu ghakanizga vyose ivi, ndipo zakwananga zinu zamujalirani viweme.

²⁶Mukati mu ŵanthu ŵane muli ŵanthu ŵanyakhe ŵabendezi. Iwo ŵakukhazga nga ndi awo ŵakuthya tuyuni. Iwo ŵakuthya vipingo na kukora navyo ŵanthu.

²⁷Nyumba zawo zazura na vyuma vyakwiba, nga ndi chitatanga icho chazura na viyuni. Pa chifukwa ichi ŵazgoka ŵakuzirwa na ŵasambazi.

²⁸Iwo ŵatutuŵa ndipo ŵali na mathupi ghakunyiririka, ŵalije mphaka pakuchita milimo ya ubendezi. Mirandu ya ŵalanda ŵakweruzga mu urunji chara, mwakuti yende makora, ndipo kuti wakuvikirira awo mbakavu chara.

²⁹“Kasi ndireke kuŵalanga chifukwa cha vyeneivi? Kasi ndireke kuwezgera nduzga pa fuko nga ndi ili?” Ntheura ndimo FUMU yikuyowoyera.

³⁰Chinthu chakuzukumiska na chakuseruska, chachitika mu charu ichi:

³¹Nchimi zikuchima vya utesi, ŵasofi nawo ŵakusambizga umo ŵakhumbira. Ŵanthu ŵane nawo ŵakutemwa kuti vinthu viŵenge ntheura. Kasi mwizamkuchitachi pa umaliro?