Read new_tumbuka_bible Yeremiya 50 Bible Online

Yeremiya 50 - new_tumbuka_bible bible

Yeremiya 50

¹Agha ndi mazgu agho FUMU yikayowoya mwa Yeremiya kuphara vya msumba wa Babuloni na charu chakhe:

²“Pharazga mukati mu mafuko, thuwuska mukati ŵanthu. Tumphuska ndembera na kuchemerezga, ungabisanga chara, uyowoye kuti, ‘Charu cha Babuloni chiti chitoreke, chiuta Belu wakhozgeka soni, Mariduki wathika lusoko. Vikozgo vyakhe vyakhozgeka soni, Ŵangoza ŵakhe nawo ŵathika lusoko.’

³“Fuko la ku mpoto lamkwiza na kurwa na msumba wa Babuloni. Lizamkuzgora charu chakhe kuŵa mapopa, chambula na munthu wakukharamo. Ŵanthu pamoza na vinyama vizamkuchimbiramo.”

⁴FUMU yikuti, “Mu mazuŵa gheneagho na mu nyengo yeneiyo, ŵaIsraele na ŵaYuda ŵamkuŵa pamoza, ŵakulira, na kupenja FUMU, Chiuta wawo.

⁵Ŵamkufumbilira nthowa yakuya ku msumba wa Ziyoni, na kwamba ulendo wa kuruta kwenekuko. Ŵamkwiza na kubatikana na FUMU, tichite phangano la muyirayira na iyo, ilo kuti lamkuruwikapo chara.”

⁶“Ŵanthu ŵane ŵaŵa nga ndi mberere zakuzgeŵa. Ŵarongozgi ŵawo ndiwo ŵaŵapuruskanga, ndipo ŵaŵachitiska kuti ŵayingeyingenge waka mu mapiri. Ŵaŵayingiska kufuma ku phiri kuya kafika ku tumapiri ndipo ŵali kuruwa uko kuli muzi wawo.

⁷Wose awo ŵakaŵasanganga ŵanthu ŵane ŵakaŵamaranga petu. Ŵarwani ŵawo ŵakatenge, ‘Ise kuti tili na mrandu chara. Iwo ndiwo ŵanangira FUMU, uyo ndi chikhazi chawo chenecho, FUMU yeneiyo ŵawiskewokuru ŵakagomezganga.’ ”

⁸“Chimbiranimo mukati mu ŵaBabuloni. Fumanimo mu charu chawo. Muŵe nga mbapepe, ŵakurongozga mskambo.

⁹Pakuti wonani, nkhukhuŵirizga wumba wa mafuko ghakuru kufuma ku charu cha ku mpoto, kwiza kalimbana na charu cha Babuloni. Kufuma penepapo ŵanthu ŵa mwenemumo ŵati ŵakoreke. Mivwi yawo iyo ŵakulasa, yili nga ndi chinkhara icho kuti chikuwera waka chara.

¹⁰Ŵati ŵachiskoghe charu cha Babuloni. Wose awo ŵakuchiskogha ŵati ŵakhute.” Ntheura ndimo FUMU yikuyowoyera.

¹¹“Imwe ŵaskoghi ŵa chiharo chane, nanga mukukondwa na kusekerera, nanga mukudukaduka mwakukondwa, nga ndi mwana wa ng'ombe wakubula tirigu, nanga mukulira nga ŵakavalo ŵanarume,

¹²nyinamwe wati waŵe na soni chomene, uyo wakamubabani wati walengeskeke. Wonani, wati waŵenge wa umaliro mu mafuko, wati wazgoke mapopa, chinkhamwa, na chiparamba.

¹³Chifukwa cha ukari wa FUMU, ŵanthu kuti ŵakharengemo chara, chose chiti chiŵenge mayiyi. Wose awo wakujumphamo mu charu cha Babuloni, ŵamkulwahama na kuzukuma, chifukwa cha kupwetekeka kwakhe kose.

¹⁴Nozgekerani kuti murwe na charu cha Babuloni, muchizingirizge charu chose, mose imwe mukupinda mauta. Chilasani, mungarekangako muvwi chara, pakuti chanangira FUMU.

¹⁵Muchipomere kufuma kosekose, pakuti chathera. Malinga ghakhe ghawa, viliŵa vyakhe vyagumuka. Pakuti iyi ndi nduzga yakufumira kwa FUMU, yakuti, ‘Muchiwezgere nduzga, muchichitire nga ndi umo icho chikachitira ŵanyakhe.

¹⁶Mumuwuskemo mu charu cha Babuloni uyo ŵakuseŵa, na uyo wakorera chigeru mu nyengo ya vuna. Chifukwa cha nkhondo ya wakuyuzga, waliyose wati wawerere ku ŵanthu ŵakwakhe, ndipo waliyose wati wachimbilire ku charu cha kwawo.’ ”

¹⁷“ŴaIsraele ndi mberere zakuparanyika izo nkharamu zazichimbizgira kutali. Karonga wa charu cha Asiriya ndiyo wakadanga kuŵakoma, ndipo sono wa umaliro ndi Nebukadinezara, karonga wa charu cha Babuloni uyo wamemena na viwangwa vyawo wuwo.”

¹⁸Ntheura FUMU Mwenenkhongono zose, Chiuta wa Israele wakuti, “Ndizamkulanga karonga wa charu cha Babuloni pamoza na charu chakhe, nga ndi umo nkhalangira karonga wa charu cha Asiriya.

¹⁹Nditi ndiŵawezgere ŵa Israele mu chikhazi chawo ndipo ŵati ŵaryenge pa Phiri la Karimele ndiposo na mu chigaŵa cha Bashani. Khumbiro lawo lamkukhorweskeka pa mapiri gha Efurayimu na mu chigaŵa cha Gileyadi.

²⁰Mu mazuŵa gheneagho na mu nyengo yeneiyo, ŵamkupenjerezga ubendezi mwa Israele, kweni kuti wamkuŵako chara. Ŵamkupenjerezga uheni mu charu cha Yuda, kweni kuti ŵamkuwusanga chara. Chifukwa awo ŵakharako kuŵa ŵamoyo ndizamkuŵagowokera.” Ntheura ndimo FUMU yikuyowoyera.

²¹“Rutani mukarwe na ŵanthu ŵa chigaŵa cha Meratayimu, mukarweso na ŵa ku Pekodi. Mukaŵakome na kuŵamara petu, mukachite chose icho ndamulangulani.” Ntheura ndimo FUMU yikuyowoyera.

²²“Kamphomezi ka nkhondo kali mu charu, kali na kupankhuka kukuru.

²³Mwe! Uyo ŵakaŵa nga ndi nyondo ya charu chose cha pasi, wadumuka na kusweka. Wonani umo charu cha Babuloni chazgokera, kuŵa chakuseruska mukati mu mafuko gha ŵanthu.

²⁴Iwe charu cha Babuloni, nkhakuthyera chipingo ndipo ukawiramo, ndipo kuti ukamanya chara. Ukasangika ndipo ukakoreka, chifukwa ukalimbananga na FUMU.

²⁵FUMU yajula nyumba yakusungiramo mahomwa ghakhe, ndipo yafumyamo mahomwa gha ukari wakhe. Pakuti FUMU, Chiuta Mwenenkhongono zose, wali na mlimo wakuchita mu charu cha Babuloni.

²⁶Zaninge muchizinge kufumira kosekose, julani nthamba zakhe. Muŵawunjike nga ndi mulu wa vyakurya, muŵamare, mungarekanga na yumoza wakukharako.

²⁷Mukome nkhambako zakhe zose, zose zikhilire kuya kakomeka. Soka kwa iwo, pakuti zuŵa lawo lafika, nyengo ya kulangikira kwawo.”

²⁸“Pulikani! Ŵakuchimbira awo ŵaphokwa mu charu cha Babuloni, kuya kapharazga mu msumba wa Ziyoni, nduzga za FUMU, Chiuta withu, nduzga ya nyumba yakhe.

²⁹Chemani awo ŵakuponya mivwi kuti ŵarwe na ŵaBabuloni, wose awo ŵakupinda mauta, ndipo zengani msasa na kuŵazingirizga. Paŵavye na wakuchimbira. Muŵawezgere kwakuyana na milimo yawo, ndipo muŵachitire kwakuyana na vyose ivyo ŵali kuchita. Pakuti mu kujikuzga kwawo ŵakayuyura FUMU, Mutuŵa Yura wa Israele.

³⁰Ntheura ŵanyamata ŵati ŵafwirenge mu maluwugha ghakhe, ndipo ŵasilikari ŵakhe wose ŵati ŵakomeke mu zuŵa leneilo.” Ntheura ndimo FUMU yikuyowoyera.

³¹FUMU, Chiuta Mwenenkhongono zose wakuti, “Wona, ine nditi ndimikane nawe iwe munthu wakujikuzga. Pakuti zuŵa lako lafika, nyengo iyo nditi ndikulangire.

³²Munthu wakujikuzga wati wakhuŵale na kuwa, kwambula na yumoza wakumuwuskira muchanya. Nditi ndipembe moto mu misumba yakhe, ndipo uti umyangure vyose vyakumuzingirizga.” Ntheura ndimo FUMU yikuyowoyera.

³³FUMU Mwenenkhongono zose yikuti, “ŴaIsraele pamoza na ŵaYuda ŵakuyuzgika. Wose awo ŵakaŵakora umikori kuti ŵakukhumba kuŵarekezga chara, ŵakukana kuŵasutula.

³⁴Muwomboli wawo ngwa nkhongono. Zina lakhe ndi FUMU Mwenenkhongono zose. Nadi iyo wati waŵayimire pa mrandu wawo mwakuti wapereke mutende mu charu, kweni wizamkuŵasuzga awo ŵakukhara mu charu cha Babuloni.”

³⁵FUMU yikuti, “Lupanga lwimikane na ŵanthu ŵa ku Babuloni, awo ŵakukhara mu charu cheneichi, na nduna zakhe na ŵanthu ŵakhe ŵavinjeru.

³⁶Lupanga lwimikane na mbawukwi, mwakuti ŵazgoke vindere, na vinkhara vyakhe kuti vimare petu.

³⁷Lupanga lwimikane na mahachi, na magareta ghakhe, ndiposo na mipingo ya chilendo yose ya nkhondo, iyo yili mukati mwakhe, mwakuti yizgoke nga mbanakazi. Lupanga lwimikane na mausambazi ghakhe ghose, mwakuti ghaskogheke.

³⁸Chilangalanga chiŵe pa maji ghakhe, kuti ghakamuke. Pakuti ichi ndi charu cha vikozgo vyakofya, ndipo ŵanthu ŵafuntha navyo vikozgo.

³⁹“Ntheura vikoko vya mu thengere na ŵachimbwe vizamkukhara mu charu cha Babuloni. Ŵaphururu ŵizamkukhara mwenemumo. Ŵanthu kuti ŵizamkukharamoso chara. Nadi kuti ŵizamkukharamo chara nanga ndi miwiro yose kwa muyirayira.

⁴⁰Nga ndi umo nkhabwangandulira msumba wa Sodomu na wa Gomora pamoza na misumba iyo yikapakana nayo, ntheura palije munthu uyo wizamkukharamo mu msumba wa Babuloni. Palije munthu uyo wizamkupanjwamo.” Ntheura ndimo FUMU yikuyowoyera.

⁴¹“Wonani, fuko linyakhe likwiza kufuma ku mpoto, fuko lankhongono na la ŵakaronga ŵanandi, awo ŵayaghayika kufuma ku mphererekezgo za charu.

⁴²Ŵakorera mauta na mikondo. Iwo ndi ŵanthu ŵa nkhaza na ŵambula lusungu. Mazgu ghawo ghali nga nkhupoma kwa nyanja. Ŵakwera pa mahachi ŵanozgeka nga ndi munthu nkhondo kwiza kimikana nawe, iwe msumba wa Babuloni.

⁴³Karonga wa charu cha Babuloni, wakapulika lumbiri lwawo, ndipo nkhongono zakhe zikamara. Urwirwi ukamukora nga ndi vyakuŵinya, vya mwanakazi pa nyengo ya kubaba.

⁴⁴“Wonani, nga ndi nkharamu iyo yikwiza kufuma mu matundu gha mronga wa Yorodani kwiza kalimbana na chitupa cha mberere, icho nchakukhora, ntheura ndimo ndizamkuchimbizgira ŵaBabuloni mwa mabuchibuchi. Pamanyuma ndizamkuŵamikira wakuŵawusa uyo ndamusankha. Pakuti ndi njani uyo wakuyana nane? Ndi njani uyo wizamkundichemera pa mphara ya mrandu? Ndi murongozgi nju uyo wangalimbana nane?

⁴⁵Ntheura pulikani ivyo FUMU yanozgera pakususkana na charu cha Babuloni, ndiposo na dazgo ilo yili kunozgera pakulimbana na awo ŵakukhara mu charu cha Babuloni. Nadi ŵana-mberere ŵizamkukwekweteka. Chitupa nacho chizamkurwahama waka chifukwa cha ivyo vyaŵawira.

⁴⁶Pa mphomo ya kutoreka kwa charu cha Babuloni kwapulikikwa, charu chizamkusunkhunyika. Kulira kwakhe kwizamkupulikikwa mukati mu mafuko gha ŵanthu.”