Read new_tumbuka_bible Yeremiya 51 Bible Online

Yeremiya 51 - new_tumbuka_bible bible

Yeremiya 51

¹FUMU yikuti, “Nditi ndiwuske mphepo yakukoma, kulimbana na charu cha Babuloni, na awo ŵakukhara mu charu cheneichi.

²Nditi nditume ŵanthu ŵachilendo mu charu cha Babuloni, awo ŵati ŵachipete charu na kuchiparanya Ŵati ŵakulimbana nacho kufumira kosekose, mu zuŵa lakhe lakuparanyikira.

³Mungazomerezganga wa mauta kupinda uta wakhe, nanga nkhumurekerera kuvwara ngunya yakhe. Ŵawukirano ŵakhe mungaŵarekanga ŵamoyo chara, ŵasilikari ŵakhe wose muŵamare petu.

⁴Ŵati ŵagonerane ŵakufwa mu charu cha Babuloni, na ŵakupwetekeka mu misewu ya mu misumba yakhe.

⁵Pakuti ŵa charu cha Israele, na cha Yuda kuti ŵajowoleka chara, na Chiuta wawo, FUMU Mwenenkhongono zose. Kweni charu chawo chazura na majuvyo ghanandi, pakwimikana na Mutuŵa Yura wa Israele.”

⁶“Chimbiranimo mu charu cha Babuloni, waliyose wathaske umoyo wakhe, mureke kufwa chifukwa cha kwananga kwakhe. Pakuti iyi ndi nyengo ya FUMU yakuwezgera nduzga, nyengo ya njombe iyo yikupereka.

⁷Charu cha Babuloni chikaŵa nkhombo ya golide, mu woko la FUMU, chikaloŵezganga charu chose cha pasi. Mafuko ghakamwanga vinyo lakhe. Ntheura ghakafunthanga.

⁸Mwa mabuchibuchi charu cha Babuloni, chawa na kubwanganduka. Muchitengerere charu ichi. Muchitorere munkhwara wakuchizga vyakuŵinya vyakhe, panji chingachizgika.

⁹Ŵanji ŵakati, ‘Tikayezga kuchizga charu cha Babuloni, kweni kuti chikachizgika chara. Muchireke waka, tiyeni tirutenge, waliyose ku charu chakhe. Pakuti chilango chakhe chafika na kuchanya, chakwera kuya kafika na ku mlengalenga.’ ”

¹⁰FUMU ndiyo yatidapilira, tiyeni tikapharazge ku msumba wa Ziyoni, milimo ya FUMU, Chiuta withu.

¹¹“Norani mivwi! Torani nguru zinu!” FUMU yakhuŵirizga ŵakaronga ŵa ku Mediya, chifukwa dazgo lakhe ndakumara charu cha Babuloni. Pakuti iyi ndiyo nduzga ya FUMU, nduzga ya Nyumba yakhe.

¹²Tumphuskani ndembera, yakwimikana na malinga gha Babuloni. Khozgani awo ŵakulinda, muŵike ŵasilikari, munozgekere ŵanthu ŵakukhazga, pakuti FUMU yikanozgera na kuchita, ivyo yikayowoya pa awo ŵakukhara, mu charu cha Babuloni.

¹³Imwe mukukhara pafupi na maji ghanandi, mwaŵeneimwe muli ŵakuzara na mausambazi, umaliro winu wafika, ka mtima ka umoyo winu kamara.

¹⁴FUMU Mwenenkhongono zose yajirapizga yati, “Nadi, ndikutumire ŵanthu ŵanandi nga ndi zombe, iwo ŵizamkuchemerezga mphomo yakuvivya pa iwe.”

¹⁵“FUMU ndiyo yikalenga charu na nkhongono zakhe, ndiyo yikimika vinthu vyose na vinjeru vyakhe, ndipo yikatandazga mitambo na umanyi wakhe.

¹⁶Para yikuyowoya, maji ya ku mlengalenga ghakududumira, ndiyo yikukwezga nyathutwe, kufuma ku mphererekezgo za charu. Yikumwetuska ŵaleza ŵa vura, yikuputiska mphepo kufuma uko yikuyisunga.

¹⁷Munthu yose ndi muzereza na wambula mahara, mufuzi yose wakukhozgeka soni na ŵangoza ŵakhe. Vikozgo vyakhe ndi vya utesi, vilije na muvuchi.

¹⁸Ndi vya wakawaka, ndi mlimo wakupusika waka, pa zuŵa la weruzgi vyamkumara petu.

¹⁹Chiuta uyo ndi phande la Yakhobe, kuti wakuyana na ivyo chara. Iyo ndiyo wali kulenga vinthu vyose, Israele ndi fuko ilo iyo wali kusankha, zina lakhe ndi FUMU Mwenenkhongono zose.”

²⁰FUMU yikuti, “Iwe Babuloni, ndiwe nyondo yane, na homwa lane la nkhondo. Na iwe nkhuswa mafuko kuŵa ghachokoghachoko, na iwe nkhupankhura maufumu.

²¹Na iwe nkhuswa hachi na wakugarapo, na iwe nkhuswa gareta na wakukwerapo.

²²Na iwe nkhuswa ŵanarume na ŵanakazi, na iwe nkhuswa ŵachekuru na ŵawukirano, na iwe nkhuswa ŵanyamata na ŵamwali.

²³Na iwe nkhuswa ŵaliska na mberere, na iwe nkhuswa mulimi na ng'ombe zakhe zakulima, na iwe nkhuswa nduna na ŵarongozgi.”

²⁴FUMU yikuti, “Nditi ndiwezgere charu cha Babuloni na ŵanthu awo ŵakukhara mwenemumo uheni wose uwo ŵali kuchita mu Ziyoni, panthazi pinu.”

²⁵FUMU yikuti “Wona, nkhwimikana nawe, iwe phiri lakukoma, wamweneiwe ukukoma wose ŵa mu charu. Nditi ndinyoroske woko lane, na kukukunkhuzga iwe kufuma pa majarawe, na kukuzgora iwe kuŵa phiri lakocheka.” Ntheura ndimo FUMU yikuyowoyera.

²⁶“Palije libwe ilo litorekenge kuŵa la pa chingodya, kufuma kwa iwe, nanga ndi lakuzengera lufura. Kweni uti uŵenge pharaniko kwa muyirayira.” Ntheura ndimo FUMU yikuyowoyera.

²⁷“Tumphuskani ndembera pa charu, lizgani mbata mukati mu mafuko gha ŵanthu. Nozgerani mafuko gha ŵanthu, kurwa nkhondo na charu cha Babuloni. Chemani maufumu gha Ararati, Mini na Ashikenazi kuti ghimikane nacho. Yimikani murongozgi wa ŵasilikari kuti walimbane nacho. Mwize na mahachi ŵanandinandi nga ndi zombe.

²⁸Nozgerani mafuko kuti gharwe nkhondo na charu cha Babuloni, ndiwo ŵakaronga ŵa ku Mediya, pamoza na nduna na ŵa chiŵiri ŵawo, ndiposo na vyaru vyose ivyo vili pasi pa mazaza ghawo.

²⁹Charu chikutenthema na kunyongoroka na vyakuŵinya, pakuti khumbo la FUMU, kulimbana na charu cha Babuloni lichali waka. FUMU yiti yizgore charu cha Babuloni kuŵa mapopa, na chambula kukharamo ŵanthu.

³⁰Vinkhara vya charu cha Babuloni vyareka kurwa, ŵakutandara mu malinga ghawo. Nkhongono zawo zamara, ŵazgoka ŵanakazi. Nyumba zakhe zaphya, mphingirizgo zakhe zasweka.

³¹Thenga likuchimbira kuya kakumana na thenga linyakhe, nthumi nayo kuya kakumana na nthumi yinyakhe. Wose ŵakumuphalira karonga wa charu cha Babuloni kuti, msumba wakhe wose wapokeka.

³²Majambuko ghapokeka, vyakukhozgera linga vyocheka na moto, ndipo ŵasilikari ŵakoreka na chitenthe.”

³³FUMU Mwenenkhongono zose, Chiuta wa Israele wakuti, “ŴaBabuloni ŵali nga ndi luwugha, pa nyengo iyo ŵakubulirapo. Ndipouli pakhara pachoko waka, apo nyengo ya kuvunira yikwanirenge.”

³⁴“Nebukadinezara, karonga wa charu cha Babuloni, watipweteka na kutiphwanya ise. Wandizgora ine kuŵa chithu chambula kanthu, wandimirimitizga nga ndi chikoko chakofya cha mu nyanja. Wazuzga nthumbo yakhe na mafuta ghane, ndiposo wandiwukura.

³⁵Ŵanthu ŵa mu msumba wa Ziyoni ŵayowoye kuti, ‘Nkhaza izo ŵandichitira ine na ŵabali ŵane, ziŵe pa charu cha Babuloni.’ Ŵanthu ŵa mu msumba wa Yerusalemu ŵayowoye kuti, ‘Ndopa zithu izo ŵakathiska, ziŵe pa awo ŵakukhara mu charu cha Babuloni.’ ”

³⁶Ntheura FUMU yikuti, “Wona nditi ndikwimire pa mrandu wako, nditi ndiŵawezgere nduzga mu malo ghako. Nditi ndikamuske mronga wa charu cha Babuloni, icho nchitopoko cha maji gha ŵanthu ŵakhe.

³⁷Charu cha Babuloni chiti chizgoke kuŵa mulu wa mahami, malo ghakukharamo ŵakambwe. Chiti chiŵe chinthu chakuseruska na chakuzukumiska, charu chambula kukharamo na ŵanthu.

³⁸Wose ŵati ŵabangure pamoza nga ndi nkharamu, ŵati ŵakorome nga ŵana ŵa nkharamu.

³⁹Para ŵali na chiryoko, nditi ndiŵanozgere chiphikiro, na kuŵaloŵezga ŵasuke ŵafwe lunkhuŵa. Ŵamkugona tulo twakufwa nato twa mutatakuya, kwambula kuwukaso.” Ntheura ndimo FUMU yikuyowoyera.

⁴⁰“Nditi ndirute nawo kuti ŵakakomeke, nga ndi ŵana-mberere, nga ndi mberere zanarume na ŵapepe.”

⁴¹“Nadi, charu cha Babuloni chathereskeka, charu icho chikurumbika na vyaru vyose chapokeka. Nadi, charu cha Babuloni chira, chazgoka chinthu chakuseruska, mukati mu mafuko gha ŵanthu.

⁴²Nyanja yawukira pa Babuloni, majigha ghakhe ghakupoma ghachibenekerera.

⁴³Misumba yakhe yaŵa malo ghakuseruska, charu cha chinkhamwa na chiparamba, charu icho na yumoza wakukharamo, mwenemumo munthu na yumoza wakujumphamo.

⁴⁴Nditi ndimulange Belu, chiuta wa Babuloni, na kubokora icho wamira. Mafuko kuti ghamkundonderaso kwa iyo chara, malinga gha Babuloni ghawa.”

⁴⁵Mwa ŵanthu ŵane, fumanimo mukati mwakhe. Munthu yose wathaske umoyo wakhe, ku ukari wakofya wa FUMU.

⁴⁶Mureke kugongowa nesi kopa, para lumbiri lwapulikikwa mu charu. Lumbiri lumoza lukuŵako chirimika ichi, lunyakhe chirimika chinyakhe, lumbiri lwa chivulupi mu charu, ndiposo lwa karonga kwimikana na karonga munyakhe.

⁴⁷“Ntheura wonani, mazuŵa ghakwiza, apo ndizamkulanga vikozgo vya mu charu cha Babuloni. Charu chakhe chose chizamkukhozgeka soni, ŵanthu ŵakhe wose awo ŵakomeka, ŵizamkuŵa waka gonegone mukati mwawo.

⁴⁸Penepapo mtambo na charu cha pasi, na vyose ivyo vili mwenemumo, vyamkwimba na chimwemwe, pakulangika kwa charu cha Babuloni. Pakuti ŵanthu ŵakuparanya ŵamkwiza na kwimikana nacho kufumira ku mpoto.” Ntheura ndimo FUMU yikuyowoyera.

⁴⁹“Charu cha Babuloni chikwenera kupankhuka, chifukwa cha kukomeka kwa ŵaIsraele, nga ndi umo ŵanthu wose ŵa mu charu cha pasi ŵakafwira chifukwa cha Babuloni.”

⁵⁰“Imwe mwapona ku nkhondo, rutaninge, mureke kwimilira. Mukumbuke FUMU ku charu cha kutali, Yerusalemu waŵe mu maghanoghano ghinu.

⁵¹Imwe mukuti, ‘Takhozgeka soni, pakuti tapulika chisunjizgo. Visko vyithu vyabwanthuka na kuyuyurika, chifukwa ŵalendo ŵanjira, mu malo ghakupatulika gha Nyumba ya FUMU.’

⁵²FUMU yikuti, Mazuŵa ghakwiza, apo ndizamkweruzgira vikozgo vya charu cha Babuloni. Kutampha kwa ŵakupwetekeka, kwamkupulikikwa mu charu chakhe chose.

⁵³Nanga charu cha Babuloni, chingakwera mpaka kuchanya, nanga chingakhozga malinga ghakhe, kuŵa gha nkhongono na ghatali, ndipouli nditi nditume ŵanthu ŵakuparanya.” Ntheura ndimo FUMU yikuyowoyera.

⁵⁴“Pulikani kulira kufumira mu charu cha Babuloni, na mphomo ya kupankhuka kukuru kufumira mu charu cha Babuloni.

⁵⁵Pakuti FUMU yikuparanya charu cha Babuloni kuŵa mapopa, na kuchetamiska mazgu ghakhe gha nkhongono. Mphomo ya ŵarwani yikupulikikwa, nga ndi majigha gha nkhongono, ndipo chiwawa cha mazgu ghawo chikukura.

⁵⁶Wakukoma wiza, inya wizira charu cha Babuloni. Vinkhara vyakhe vyakoreka, mauta ghawo ghaphyoka tuchokotuchoko. Pakuti FUMU ndi Chiuta wakuwezgera nduzga, nadi wati wawezgere nduzga.

⁵⁷Nditi ndiŵaroŵezge ŵakaronga ŵakhe, na ŵanthu ŵakhe ŵa vinjeru, nduna, ŵarongozgi ŵa ŵasilikari, na vinkhara vyakhe vya nkhondo. Ŵamkugona tulo twakufwa nato twa mutatakuya.” Ntheura ndimo Karonga, uyo ndi FUMU Mwenenkhongono zose yikuyowoyera.

⁵⁸FUMU Mwenenkhongono zose yikuti, “Chiliŵa Chisani cha msumba wa Babuloni, chamkuwiskikira pasi. Vipata vyakhe vitali vyamkocheka pa moto. Ŵanthu ŵamkutokatoka pa waka, mafuko ghamkujivuska waka na ivyo viti vyochekenge pa moto.”

⁵⁹Mazgu agha ndigho Yeremiya wakalayizga kwa Seraya mwana wa Neriya, muzukuru wa Maaseya, para iyo wakaruta ku charu cha Babuloni pamoza na Zedekiya karonga wa charu cha Yuda, mu chirimika cha chinayi cha kuwusa kwakhe.

⁶⁰Yeremiya wakalemba mu buku viheni vyose ivyo vyamkuwira charu cha Babuloni, na mazgu ghose agho ghali kulembekera charu cha Babuloni.

⁶¹Sono Yeremiya wakati kwa Seraya, “Para waya kafika mu charu cha Babuloni, ukawone kuti ukuŵaŵazgira ŵanthu mazgu ghose agha mwa kuchemerezga.

⁶²Ukayowoye kuti, ‘Mwe FUMU muli kuyowoya chakurata chinu cha kukhumba kupankhura malo agha, kwambula kurekako kanthu kalikose, munthu panji chinyama, ndipo ghati ghaŵenge mapopa kwa muyirayira.’

⁶³Para wamara kuŵazga buku ili, ukalikakilire ku libwe, na kuliponya mu mronga wa Yufurate.

⁶⁴Iwe ukayowoye kuti, ‘Ntheura ndimo chamkubilira charu cha Babuloni. Chamkuwukaso chara chifukwa cha uheni uwo nditi nditorerenge pa icho.’ ” Apa ndipo ghamalira mazgu gha Yeremiya.