Read new_tumbuka_bible Yeremiya 52 Bible Online

Yeremiya 52 - new_tumbuka_bible bible

Yeremiya 52

¹Zedekiya wakaŵa na virimika 21 para wakambanga kuwusa charu cha Yuda. Iyo wakaŵa karonga mu Yerusalemu pa virimika 11. Zina la ŵanyina likaŵa Hamutali mwana wa Yeremiya wa ku Libina.

²Zedekiya wakachita ivyo vikaŵa viheni panthazi pa FUMU nga ndi umo wakachitira Karonga Yehoyiyakimu.

³Nadi, chifukwa cha ukari wa FUMU, vinthu ivi vikaŵawira ŵa mu Yerusalemu na ŵa mu charu cha Yuda, ndipo pa umaliro yikaŵafumyamo panthazi pakhe. Pamanyuma Zedekiya wakamugarukira karonga wa charu cha Babuloni.

⁴Sono mu chirimika cha chinkhonde na chinayi, cha kuwusa kwa Zedekiya, pa zuŵa la khumi la mwezi, Karonga Nebukadinezara wa charu cha Babuloni wakiza na ŵasilikari ŵakhe wose kuti ŵarwe nkhondo na msumba wa Yerusalemu. Ŵakazenga msasa kuwaro kwa msumba na vibumira vyakukwerapo kuzingirizga msumba.

⁵Ndipo msumba ukazingirizgika ntheura kufikira chirimika cha 11 cha kuwusa kwa Zedekiya.

⁶Sono pa zuŵa la chinkhonde na chinayi, mwezi wa chinayi, njara yikafika pakuheni chomene mu msumba wa Yerusalemu mwakuti ŵanthu ŵakaŵavye chilichose kuti ŵarye.

⁷Ntheura wakadolora linga la msumba ndipo mpingo wose wa ŵasilikari pamoza na Karonga Zedekiya ŵakafuma na kuchimbira na usiku. Ŵakenda mu nthowa ya ku munda wa karonga, kusorota pa chipata icho chili pakati na viliŵa viŵiri. Pa nyengo iyi ŵaBabuloni ŵakaŵa ŵachali kuwuzingirizga msumba. Ŵanthu ŵara ŵakachimbilira kurazga ku Dambo la Araba.

⁸Kweni ŵasilikari ŵa charu cha Babuloni ŵakamuchimbilira karonga ndipo ŵakamusanga mu dambo la msumba wa Yeriko. Ŵasilikari ŵakhe ŵakamureka yekha na kumbininikira uku na uku.

⁹Penepapo wakamukora Zedekiya ndipo wakiza nayo kwa karonga wa charu cha Babuloni ku msumba wa Ribula mu charu cha Hamati, kweneuko Nebukadinezara wakaphara chilango chakhe.

¹⁰Karonga wa charu cha Babuloni wakakoma ŵana ŵa Zedekiya uku iyo wiske wakuwona na kukoma nduna zose za mu charu cha Yuda kwenekura ku Ribula.

¹¹Wakamukozombola maso Zedekiya na kumukaka na maunyoro ndipo wakaruta nayo ku charu cha Babuloni. Kwenekura wakamuŵika mu gadi mpaka pa zuŵa ilo wakafwira.

¹²Pa zuŵa la khumi la mwezi wa chinkhonde, mu chirimika cha 19 cha kuwusa kwa Karonga Nebukadinezara wa charu cha Babuloni, Nebuzaradani murara wa chivikiriro, mweneuyo wakateŵeteranga karonga wa charu cha Babuloni, wakanjira mu msumba wa Yerusalemu.

¹³Nebuzaradani wakocha Nyumba ya FUMU, nyumba ya ufumu ndiposo na nyumba zose za mu Yerusalemu. Wakocha na moto nyumba yiliyose yikuru.

¹⁴Ŵasilikari wose ŵa charu cha Babuloni, pasi pa murara wa chivikiriro wa karonga, ŵakawiskira pasi malinga ghose agho ghakazingirizga Yerusalemu.

¹⁵Nebuzaradani, murara wa chivikiriro wakaŵatorera ku umikori ŵanji mwa ŵanthu ŵakavu chomene na ŵanyakheso awo ŵakakharako mu msumba pamoza na ŵanthu awo ŵakagwenthera kwa karonga wa charu cha Babuloni pamoza na nkhwantha zinji.

¹⁶Kweni Nebuzaradani, murara wa chivikiriro yura wakarekako ŵanji mwa ŵanthu ŵakavu chomene mu charu kuti ŵalimenge mu minda ya mpheska na mu minda yinyakhe.

¹⁷Ŵasilikari ŵa charu cha Babuloni ŵakaswa mizati yose ya mkuŵa na vyakwimapo vyakhe vya mkuŵa mu Nyumba ya FUMU pamoza na chiŵiya cha mkuŵa chikuru chakuŵikamo maji ndipo ŵakatora mkuŵa yose na kuruta nayo ku Babuloni.

¹⁸Ndipo ŵakatoraso viŵiya, mafosholo ghakuyorera vyoto, vyakuzimyira nyali, mabeseni, ŵadira ŵa kocherapo vyakununkhira na viteŵetero vyose vya mkuŵa ivyo ŵakateŵeteskeranga mu Nyumba ya Chiuta.

¹⁹Murara wa chivikiriro yura wakatoraso mabakule ghachokoghachoko, zimbawura, mbale, viŵiya, vyakukharikapo nyali, ŵadira ŵakocherapo vyakununkhira, ndiposo na ŵabakule ŵakupungulira sembe ya vyakumwa. Murara wa chivikiriro yura wakatora vyose ivyo vikaŵa vya golide na ivyo vikaŵa vya siliva.

²⁰Mizati yiŵiri yira, nyanja yimoza yira ndiposo na nkhambako za mkuŵa zira 12 izo zikakorerera ndiposo na vyakwimapo, vyeneivyo Karonga Solomoni wakapanga kuti viŵenge vya mu Nyumba ya FUMU, mkuŵa wa vyose ivi uzitu wakhe ukaŵa wambula mapimiko.

²¹Mzati uliwose ukaŵa mamita ghankhonde pachanya ghatatu mu utali, kuzingirizga kwakhe kukaŵa mamita ghankhonde na hafu. Mu ukomi wakhe ukaŵa minwe yinayi ndipo ukaŵa na mphako mukati.

²²Pachanya pakhe pakaŵa mutu wa mkuŵa, utali wakhe ukaŵa pakunji mamita ghaŵiri. Pakuzingirizga mutu ura pakaŵa ukonde na magalagadeya, vyose vya mkuŵa. Mzati wa chiŵiri nawo ukaŵa na magalagadeya ndiposo yikayana waka na yinyakhe yira mu vyose.

²³Mu mphepete mukaŵa magalagadeya 96. Kweni magalagadeya ghose pamoza ghakaŵa 100 pa ukonde ura zingirizge.

²⁴Murara wa chivikiriro yura wakamutora Seraya musofi mukuru na Zefaniya, wa chiŵiri kwa mukuru wa ŵasofi, na ŵanthu ŵatatu awo ŵakalondanga pa muryango.

²⁵Mu msumba ura wakatoramo murongozgi uyo wakaŵa pachanya pa ŵasilikari, ndiposo na ŵanthu ŵankhonde na ŵaŵiri awo ŵakaperekanga urongozgi kwa karonga. Ŵakakoraso mulembi wa murongozgi wa ŵasilikari yura uyo wakaŵa na nchito yakuwunganya ŵasilikari ndiposo na ŵararaŵarara 60 awo ŵakaŵa mu msumba ura.

²⁶Nebuzaradani, murara wa chivikiriro yura, wakaŵatorera kwa karonga wa charu cha Babuloni uyo wakaŵa ku msumba wa Ribula.

²⁷Karonga wa charu cha Babuloni wakalangula kuti ŵakomekere kwenekura ku Ribula mu charu cha Hamati. Ntheura ndimo ŵaYuda ŵakatorekera ku umikori kufuma ku charu chawo.

²⁸Uwu ndiwo unandi wa ŵaYuda awo Nebukadinezara wakaŵayeghera ku umikori: Mu chirimika cha chinkhonde na chiŵiri cha kuwusa kwakhe wakayora ŵaYuda 3,023.

²⁹Mu chirimika cha 18 cha kuwusa kwakhe, Nebukadinezara wakayorera ku umikori ŵaYuda 832 kufuma ku Yerusalemu.

³⁰Mu chirimika cha 23 cha kuwusa kwakhe Nebukadinezara, Nebuzaradani murara wa chivikiriro wakayorera ku umikori ŵanthu 745 ŵa mu charu cha Yuda. Ŵanthu wose pamoza ŵakaŵa 4,666.

³¹Mu chirimika cha 37 icho wakatorekera ku umikori Yehoyiyakini karonga wa charu cha Yuda, pa zuŵa la 25 la mwezi wa 12, Chiheni Merodaki, karonga wa charu cha Babuloni, mu chirimika icho wakimikikira kuŵa karonga, wakaŵa na chiwuravi na Yehoyiyakini, ndipo wakamufumya mu gadi.

³²Chiheni Merodaki wakayowoya na mtima uweme kwa Yehoyiyakini, wakamuŵika pa chizumbe cha nchindi kuruska ŵakaronga wose ŵanyakhe awo ŵakaŵa nayo mu charu cha Babuloni.

³³Ntheura Yehoyiyakini wakavura malaya gha mu gadi. Ndipo mu umoyo wakhe wose zuŵa na zuŵa wakaryanga na karonga.

³⁴Zuŵa na zuŵa karonga wa charu cha Babuloni wakamupanga Yehoyiyakini malipiro ghakhe gha ufumu kwakuyana na umo wakakhumbiranga mu umoyo wakhe wose, kufikira pa zuŵa ilo wakafwira.