Read new_tumbuka_bible Yeremiya 6 Bible Online

Yeremiya 6 - new_tumbuka_bible bible

Yeremiya 6

¹“Imwe ŵanthu ŵa charu cha Benjamini, chimbirani kuti mukabisame, fumanimo mu Yerusalemu. Lizgani mbata ku Tekowa, mwimike chimanyikwiro pa Beti Hakeremu. Pakuti chinthu chiheni na kupankhura kukuru, kuti kumuwonekerani kufuma ku mpoto.

²Msumba wa Ziyoni wakuwoneka makora na wakutowa, nditi ndiwubwangandulire pasi.

³Ŵakaronga ŵizenge pamoza na ŵasilikari ŵawo, ŵizamkujintha mahema ghawo kuzingirizga Yerusalemu. Iwo ŵizamkukhazikika pa malo ghawo nga mbaliska.”

⁴Ŵakaronga ŵakuti, “Nozgekerani kurwa nawo nkhondo, tiyeni tirwe nawo na muhanya pakati! Kweni soka kwa ise, dazi lasendemuka, mizgezge ya mise yamba kuŵa yitali.

⁵Wukani, tiyeni tirwe nawo usiku, ndipo tipankhure malinga ghawo.”

⁶Pakuti FUMU Mwenenkhongono zose yikuti, “Temerani pasi makuni ghawo, zengani chibumira pakurwa nkhondo na Yerusalemu. Ŵanthu ŵa msumba uwu ŵakwenera kulangika, pakuti mukati mwakhe mwazura kuyuzga pera.

⁷Nga ndi umo mbwiwi yikusungira maji ghakhe kuŵa ghaweme, ndimo msumba ukusungira ubendezi kuŵa uphya mukati mwakhe. Nkhaza na pharaniko vikupulikikwa mukati mwakhe, nkhuwonamo ŵakurwara na ŵakupwetekeka nyengo zose.

⁸Muchenjere imwe ŵa mu Yerusalemu, mzire ine ndimurekani, na kuzgora msumba kuŵa wa mayiyi, ndipo charu kuŵa chambula kukharamo ŵanthu.”

⁹FUMU Mwenenkhongono zose yikuti, “Muŵavurure awo ŵakharako mu ŵaIsraele, nga ndi umo munthu wakuchitira na mpheska. Ŵapururani mu mawoko ghinu, kufuma mu minthavi yakhe.”

¹⁰Kasi nkhwa njani uko ndingayowoya na kuchenjezga, mwakuti ŵapulike? Wonani makutu ghawo nga kujarika, kuti ŵangapulika chara. Mazgu gha FUMU ŵakughanyoza, ndipo ŵakucha nagho chara.

¹¹Pa chifukwa ichi ndazura na ukari wa FUMU, ndipo vyalema kuzizipizga. FUMU yikuti, “Ukari uwu ukawupungulire pa ŵana, awo ŵakwenda mu misewu ya mu misumba, na pa ŵawukirano pose apo ŵawungana, mufumu na muwoli wakhe ŵizamkutoreka, nanga ndi ŵarara na ŵachekuru chomene.

¹²Nyumba zawo zizamkuperekeka ku ŵanyakhe, pamoza na minda yawo na ŵawoli ŵawo. Pakuti nditi ndinyoroske woko lane, kwimikana na ŵanthu awo ŵakukhara mu charu. Ntheura ndimo FUMU yikuyowoyera.

¹³Pakuti kwamba ku ŵapasi mpaka ku ŵapachanya, wose ŵakudokera chandulo cha mu ubendezi. Nchimi pamoza na ŵasofi, wose mbapusikizgi.

¹⁴Iwo ŵakupozga vilonda vya ŵanthu ŵane, pachanyapachanya waka. Ŵakuyowoya kuti, ‘Kuli mutende, kuli mutende’ apo kulije na mutende.

¹⁵Kasi ŵakaŵa na soni pakuchita vya ukazuzi? Na pachoko pose, soni ŵakaŵavye. Ŵalije na kumanya kurongora kuti soni zaŵakora. Ntheura ŵizamkuwa mukati mwa awo ŵakomeka. Pa nyengo iyo ndizamkuŵalangira, ŵizamkumara petu.” Ntheura ndimo FUMU yikuyowoyera.

¹⁶FUMU yikuti, “Yimilirani pa mphambano za misewu, mulaŵiske, fumbilirani uko kuli nthowa za mwaka, fumbilirani nthowa yiweme, na kwenda mu nthowa yeneiyo, mwakuti musange kupumula kwa mizimu yinu.” Kweni imwe mukati, “Ise titi tendengemo chara.”

¹⁷Nkhimika ŵalinda pachanya pinu, ndipo nkhati, “Pulikani kulira kwa mbata zawo.” Kweni imwe mukati, “Ise tipulikenge chara.”

¹⁸Ntheura pulikani, imwe mwa mafuko, manyiskani, imwe mwawungana, ivyo viŵachitikirenge ŵanthu ŵara.

¹⁹Pulika, iwe charu cha pasi. Wona, ine nkhwiza na chiheni pa ŵanthu aŵa, icho ndi njombe ya machitiro ghawo. Iwo ŵalije kupulikira mazgu ghane, ndipo ŵakana dango lane.

²⁰Kasi pali chandulo uli kwa ine, para ŵangiza na lubani kufuma ku charu cha Sheba, panji vyakununkhira kufuma ku charu cha kutali? Sembe zinu zako cha mburuma kuti nkhuzipokerera chara, nanga ndi sembe zinu zakukoma kuti nkhukondwa nazo chara.

²¹Ndicho chifukwa FUMU yikuti, “Ŵanthu aŵa ndiŵaŵikirenge vikhuŵazgo, kuti ŵakhuŵarengemo. Ŵawiskewo pamoza na ŵana ŵawo, ŵazengezgani na ŵabwezi ŵawo, wose ŵizamkumara petu.”

²²FUMU yikuti, “Wonani, fuko linyakhe likwiza kufuma ku mpoto, fuko lankhongono layaghayika kufuma ku mphererekezgo za charu.

²³Ŵakorera mauta na mikondo. Iwo ndi ŵanthu ŵa nkhaza na ŵambula lusungu. Mazgu ghawo ghali nga nkhupoma kwa nyanja. Ŵakwera pa mahachi ŵanozgeka nga ndi munthu nkhondo kwiza kimikana nawe, iwe msumba wa Ziyoni.

²⁴Lumbiri lwawo tapulika, nkhongono zithu zamara! Urwirwi watikora nga ndi vyakuŵinya, vya mwanakazi pa nyengo ya kubaba.

²⁵Mungarutanga ku minda chara, nesi kwenda mu misewu, chifukwa ŵarwani ŵakwiza na nkhondo, ndipo ŵanthu ŵakutenthema kosekose.

²⁶Imwe mwa ŵanthu ŵane, vwarani vigudulu, kunkhurani mu vyoto. Lirani na chitengero cha kuŵinyiska mtima, nga ndi munthu uyo wakutengerera mwana wakhe yumoza pera, chifukwa mwa mabuchibuchi wakukoma yura, wizenge pa imwe.

²⁷Iwe Yeremiya, ndakwimika, kuti uŵe mufuzi na wakuyezga mukati mu ŵanthu ŵane, mwakuti umanye umo nkharo yawo yiliri.

²⁸Wose mbanthu ŵachigaruka na ŵambula kupulika, ndipo mbakutemwa kusesa ŵanyawo. Iwo mbanonono nga ndi mkuŵa na chisulo, wose ŵakuchita vinthu vya upusikizgi.

²⁹Thumba lakuvukutira latukumuka chomene, kuti muthovu usongonoke na moto. Kweni mlimo wakutozga ulije chandulo, pakuti ŵaheni kuti ŵakufumiskikamo chara.

³⁰Ŵanthu ŵane ŵakuchemeka siliva lakukanika, pakuti FUMU yaŵakana.”