Read new_tumbuka_bible Yeremiya 7 Bible Online

Yeremiya 7 - new_tumbuka_bible bible

Yeremiya 7

¹Mazgu gha FUMU ghakiza kwa Yeremiya ghakati,

²“Ruta ukimilire pa chipata cha Nyumba ya Chiuta ndipo ukapharazge kwenekura kuti, ‘Pulikani mazgu gha FUMU, imwe mose mwa ŵaYuda, mwaŵeneimwe mukunjirira pa vipata ivi kwiza kasopa FUMU.

³FUMU Mwenenkhongono zose, Chiuta wa Israele wakuti, nozgani makhaliro ghinu na machitiro ghinu, ndipo nditi ndimuzomerezgani kuti mukhare mu charu ichi.

⁴Mureke kugomezga mazgu gha utesi agho ghakuti, iyi ndi Nyumba ya FUMU, Nyumba ya FUMU, Nyumba ya FUMU!’ ”

⁵“Pakuti usange mukunozga nadi makhaliro na machitiro ghinu na kuchitirana nadi vinthu mu urunji,

⁶usange mukureka kutindiŵizgira pasi ŵalendo, ŵalanda na vyokoro, usange mukureka kukoma munthu wambula kafukwa mu charu ichi, usange mukureka kurondezga ŵachiuta ŵanyakhe awo ŵangamupwetekani mwekha,

⁷nditi ndimuzomerezgani kukhara mu charu ichi, charu icho nkhapereka kale ku ŵasekuru ŵinu kuŵa chawo kwa muyirayira.”

⁸“Kweni, wonani, imwe mukugomezga mazgu gha utesi agho nga wakawaka.

⁹Imwe mukwiba, mukukoma, mukuchita uleŵe, mukuchita virapo vya utesi, mukupereka kwa chiuta Baala sembe ya vyakununkhira na kurondezga ŵachiuta ŵanyakhe awo kale kuti mukaŵamanyanga chara.

¹⁰Imwe mukwiza na kwimilira panthazi pane mu nyumba iyi, yeneiyo yikuchemeka zina lane, na kuti, ‘Tathaskika ise’ ndipouli mukurutilira ndipera kuchita vya ukazuzi ivi.

¹¹Kasi nyumba iyi, yeneiyo yikuchemeka na zina lane, yazgoka malo ghakubisamamo ŵankhungu, umo imwe mukuwonera? Ine ndamwene ndaviwona vyose ivi. Ntheura ndimo FUMU yikuyowoyera.

¹²Sono murute ku malo ghane gha ku Shilo, malo agho pakudanga nkhaghazgora kuŵa chikhazi chakusoperako zina lane. Mukawone icho nkhaghabwangandulira chifukwa cha maubendezi gha ŵanthu ŵane ŵaIsraele.

¹³FUMU yikuti, ‘Sono mukachita maubendezi ghose agha na kukana kundipulikira para nkhayowoyanga namwe kaŵirikaŵiri, ndipo para nkhamuchemani, imwe mukandizgora chara.

¹⁴Ntheura ivyo nkhachita ku Shilo ndivyo ndichitenge na nyumba iyo yikuchemeka na zina lane, malo agho nkhapereka kwa imwe na ku ŵasekuru ŵinu gheneagho imwe mukughagomezga.

¹⁵Nditi ndimufumiskanipo panthazi pane nga ndi umo nkhafumiskira ŵabali ŵinu wose ŵaIsraele, ŵa mphapu ya Efurayimu.’ ”

¹⁶“Ntheura iwe Yeremiya ungaromberanga ŵanthu aŵa chara. Ungaŵaphepiskiranga chara nesi kuŵaŵeyerera, chifukwa ndikupulikenge chara.

¹⁷Kasi ukuwona chara ivyo ŵakuchita mu misumba ya charu cha Yuda na mu misewu ya mu Yerusalemu.

¹⁸Ŵana ŵakuthenya nkhuni, ŵawiskewo ŵakupemba moto, ŵanakazi ŵakukonkha ufu kuti ŵaphikire chiuta uyo wakuchemeka Fumukazi ya Kuchanya vingwa vipapati ndipo iwo ŵakupereka sembe za vyakumwa ku ŵachiuta ŵanyakhe, kundavyira ine ku ukari.”

¹⁹FUMU yikuti, “Kasi ndiko kuti ŵakwavya ine? Chara nadi. Ŵakujiyavya ŵekha na kujikhozga waka soni.”

²⁰Ntheura FUMU Chiuta wakuti, “Nditi ndiŵakwiyire na kupungulira ukari wane pa malo agha, pa ŵanthu na pa vinyama, pa makuni gha mu thengere na pa vuna ya mu minda. Ukari wane wizamkugolera nga ndi moto wambula kuzimyika.”

²¹“FUMU Mwenenkhongono zose, Chiuta wa Israele, wakuti, ‘Sembe zinu zakocha mburuma musazge na sembe zinu zakukoma ndipo murye nyama yakhe. Ine kuti nkhuvikhumba chara.

²²Pakuti para nkhamufumiskanimo mu charu cha Eguputo, kuti nkhayowoya ku ŵasekuru ŵinu, nesi kuŵapa languro pa vya sembe yakocha mburuma na sembe zakukoma chara.

²³Kweni nkhaŵapa languro limoza lakuti: Pulikirani ine, ndipo nditi ndiŵenge Chiuta winu, imwe muti muŵenge ŵanthu ŵane. Mwendenge mu nthowa zose izo ndamulangulani kuti vinthu vimuŵirani makora.’

²⁴Kweni ŵasekuru ŵinu kuti ŵakapulikira chara, nanga nkhupwererako mazgu ghane. Ŵakarondezga makhumbiro ghawo na kunonofyeka kwa mitima yawo yiheni. Iwo ŵakawerera nyuma, kuti ŵakasintha chara.

²⁵Kufuma pa zuŵa ilo ŵasekuru ŵinu ŵakafumira mu charu cha Eguputo kufikira sono, zuŵa na zuŵa ndatumanga nchimi, ŵateŵeti ŵane ŵanandinandi kwa imwe.

²⁶Ndipouli kuti ŵakandipulikira ine chara nanga nkhupwererako. Iwo ŵakanonofya mitima yawo ndipo ŵakachita uheni kuruska ŵasekuru ŵawo.”

²⁷“Para iwe Yeremiya wayowoya mazgu ghose agha kwa iwo, kuti ŵati ŵakupulike chara. Para ukuŵachema, kuti ŵati ŵakuzgore chara.

²⁸Ntheura iwe ukati kwa iwo, ‘Ili ndi fuko la ŵanthu leneilo likareka kupulikira mazgu gha FUMU, Chiuta wawo, ndipo likakana kuchenyeka. Unenesko wamara kwa iwo, ŵakuyowoya utesi pera.’ ”

²⁹“Metani sisi linu, imwe ŵa mu Yerusalemu na kulitaya kutali. Mutengere chomene pa mapiri ghambula kanthu, pakuti FUMU yawupata na kuwukana, muwiro uwo yawukaripira.”

³⁰FUMU yikuti, “ŴaYuda ŵachita uheni panthazi pane. Iwo ŵaŵika vikozgo vyawo vyakuseruska mu nyumba iyo yikuchemeka na zina lane kuti ŵayikazuzge.

³¹Ŵazenga majochero pa malo gha pachanya agho ghakathyika Tofeti mu Dambo la Hinomu kuti wocherenge pa moto ŵana ŵawo ŵanarume na ŵanakazi. Ine kuti nkhaŵalangula kuchita ivi chara panji nesi kuvighanaghanako.”

³²Ntheura FUMU yikuti, “Mazuŵa ghakwiza apo malo ghano ghizamkuchemekaso Tofeti chara, nesi Dambo la Hinomu, kweni kuti Dambo la Kukomeramo. Pakuti ŵakufwa ŵizamkuŵasunganga ku Tofeti mpaka kwizakaŵavye malo.

³³Sono vitanda vya ŵanthu aŵa vyamkuŵa chakurya cha viyuni vya mudera na vikoko mu thengere. Pizamkuŵavye munthu wakuvichimbizgapo.

³⁴Ndizamkuwuskamo mazgu gha kukondwa na kusekerera mu misumba ya charu cha Yuda na mu misewu ya mu Yerusalemu. Kwizamkupulikikwaso chara mazgu gha chimwemwe gha mwene-nthengwa na mutengwa. Inya charu chizamkuŵa mahami.”