Read new_tumbuka_bible Yeremiya 8 Bible Online

Yeremiya 8 - new_tumbuka_bible bible

Yeremiya 8

¹FUMU yikuti, “Pa nyengo yeneiyo viwangwa vya ŵakaronga ŵa charu cha Yuda, vya nduna zawo, vya ŵasofi, vya nchimi na vya ŵanthu awo ŵakakharanga mu Yerusalemu, vizamkufumiskika mu madindi.

²Ndipo vizamkutandazgika pakweru pa dazi, pa mwezi na pa nyenyezi zose za kuchanya vyeneivyo ŵanthu aŵa ŵakatemwa kuviteŵetera, kuvirondezga, kuvipenjerezga na kuvilambira. Viwangwa ivi kuti ŵizamkuwunjikikaso chara, nesi kuvisunga mu dindi, kweni vizamkuŵa nga mbulongwe pachanya pa charu.

³Wose awo ŵakharako ŵa fuko liheni ili mu malo ghose mwenemumo ndaŵachimbizgiramo, ŵamkutemwa nyifwa kuruska umoyo.” Ntheura ndimo FUMU yikuyowoyera Yankhongono zose.

⁴Iwe Yeremiya ukwenera kuyowoya ku ŵanthu kuti, “FUMU yikuti ‘Kasi para ŵanthu ŵawa, ŵakuwukaso chara? Kasi para munthu wapuruka, wakuwereko chara?

⁵Kasi nchifukwa uli ŵanthu ŵa mu Yerusalemu ŵakupuruka, na kurutilira kuwerera nyuma? Iwo ŵakukoreska vinthu vya upusikizgi, ndipo ŵakukana kuwerako.

⁶Ndategherezga na kuŵapulikizga, kweni kuti ŵakuyowoya unenesko chara. Palije na yumoza wakung'anamuka ku ubendezi wakhe.’ Iwo ŵakuti, ‘Kasi ine ndachitachi?’ Munthu yose wakurondezga ivyo iyo wakukhumba, nga ndi hachi ilo likuchimbilira ku nkhondo.

⁷Nanga ndi khonongo mu mlengalenga, likumanya apo lingizira na apo lingasamira. Nanga ndi njiŵa, mpheta, na nkhwali navyo vikusungilira apo vingizira. Kweni ŵanthu ŵane ŵakumanya chara, ivyo FUMU yikuŵalangula.

⁸“Kasi mungayowoya uli kuti, ‘Tili na vinjeru, tikusunga dango la FUMU?’ Kweni wonani ŵamanyi-marango, ŵasintha marango pakulemba vya utesi.

⁹Ŵavinjeru ŵati ŵakhozgeke soni, ŵati ŵathike lusoko na kukoreka. Pakuti ŵakana mazgu gha FUMU, kasi vinjeru vya ntheura nvya mtundu uli?

¹⁰Pa chifukwa ichi nditi ndipereke ŵawoli ŵawo, ku ŵanarume ŵanyakhe, minda yawo ku awo ŵaŵathereska. Pakuti waliyose, kwamba ŵachoko mpaka ŵarara, wakudokera chandulo cha mu ubendezi. Nchimi na ŵasofi wuwo, wose mbapusikizgi.

¹¹Ŵakupozga vilonda vya ŵanthu ŵane pachanyapachanya waka. Ŵakuyowoya kuti, ‘Kuli mutende, kuli mutende, apo kulije na mutende.’

¹²Kasi ŵakaŵa na soni pakuchita vya ukazuzi? Na pachoko pose, soni ŵakaŵavye. Ŵalije na kumanya kurongora kuti soni zaŵakora. Ntheura ŵizamkuwa mukati mwa awo ŵakomeka. Pa nyengo iyo ndizamkuŵalangira, ŵizamkumara petu.” Ntheura ndimo FUMU yikuyowoyera.

¹³FUMU yikuti, “Para nkhuti ndiŵawunganye nga ndi vuna, vipambi vya mpheska kuti vikuŵamo mu khuni chara, nanga ndi vikuyu mu khuni la vikuyu. Mahamba ghakhe nagho ngakufota. Vyose ivyo nkhaŵapa, vyafumiskikako kwa iwo.”

¹⁴Ŵanthu ŵa charu cha Yuda ŵakuti, “Kasi tikukhalirachi waka chete? Tiyeni tichimbilire ku misumba ya malinga, ndipo tikafwire kwenekura. Pakuti FUMU, Chiuta withu, wadumula kuti tifwe. Watipa maji ghakukoma kuti timwe, chifukwa tanangira FUMU.

¹⁵Tikagomezganga kuti kuŵenge mutende, kweni kukaŵavye kaweme. Tikagomezga nyengo ya kuchizgikira, kweni kukaŵa vyakofya pera.

¹⁶Kukonona kwa mahachi gha ŵarwani, kukupulikikwa kufuma ku msumba wa Dani. Kamphomezi ka kulira kwa mahachi ghawo kapulikikwa, charu chose chikutenthema. Ŵarwani ŵakwiza kuti ŵapankhure charu chose, pamoza na vyose ivyo vilimo mwenemumo, msumba na wose awo ŵakukhara mwenemumo.”

¹⁷“Wonani, nditi nditume njoka mukati mwinu, vipiri ivyo kuti vingazomera munkhwara chara, ndipo zizamkumulumani.” Ntheura ndimo FUMU yikuyowoyera.

¹⁸Chitima icho chili mwa ine, kuti chingamara chara, mtima wane wathika lusoko.

¹⁹Pulikani kulira kwa ŵanthu ŵane, kufumira mu charu cha kutali. Iwo ŵakuti, “Kasi FUMU yili mu Ziyoni chara? Kasi karonga wakhe wali mwenemumo chara?” FUMU yikuzgora yikuti, “Kasi nchifukwa uli ŵandavya kuti ndikaripe, chifukwa cha vikozgo vyawo vyakuŵaja, na ŵangoza ŵawo ŵa chilendo?”

²⁰Ŵanthu ŵakulira, ŵakuti, “Vuna yajumpha, chihanya nacho chamara, kweni tichali tindaponoskeke.”

²¹Pakuti ŵanthu ŵane ŵapwetekeka, ine nane ndapwetekeka. Nkhutengera ndipo ndathika lusoko.

²²Kasi munkhwara wakuchizgira mulije mu Gileyadi? Kasi ng'anga mulije mwenemura? Kasi nchifukwa uli ŵanthu ŵane ŵandachizgike?