Read new_tumbuka_bible Yeremiya 9 Bible Online

Yeremiya 9 - new_tumbuka_bible bible

Yeremiya 9

¹Mwe, mphanyi mutu wane uŵenge mbwiwi ya maji, ndipo maso ghane kaŵinduŵindu wa masozi, mwakuti ndilire muhanya na usiku, chifukwa cha kukomeka kwa ŵanthu ŵane.

²Mwe, ndiŵenge na malo mu mapopa, malo ghakukharamo ŵanthu ŵa pa ulendo mphanyi ndiŵaside ŵanthu ŵane, ndifumemo mwa iwo. Pakuti wose mbazaghali, chiwuru cha ŵanthu ŵapusikizgi.

³FUMU yikuti, “Iwo ŵakupinda malulimi ghawo nga ndi uta kuti ŵaponye utesi. Mu charu mwazura utesi kuruska unenesko, pakuti ŵakurutilira kuchita uheni kuya pa uheni unyakhe, ndipo ine kuti ŵakundimanya chara.”

⁴Munthu yose wachenjere na mubwezi wakhe, wareke kugomezga mubali wakhe. Pakuti mubali yose ndi muryarya nga ndi Yakhobe, mubwezi yose wakwendendeka kusesa ŵanyakhe.

⁵Munthu yose ŵakupusika waka mubwezi wakhe, palije uyo wakuyowoya unenesko. Iwo, malulimi ghawo ghakusambizgika kuyowoya utesi. Iwo ŵakuchita ubendezi ndipo ŵakukhumba kung'anamuka chara.

⁶Ŵakuyuzga na kurutilira kuyuzga, ndipo ŵakupusika na kurutilira kupusika. Ŵakukana kundimanya ine. Ntheura ndimo FUMU yikuyowoyera.

⁷Ntheura FUMU Mwenenkhongono zose yikuti, “Wona, nditi ndiŵatozge na kuŵayezga. Pakuti kasi ndingachitachi chinyakhe na ŵanthu ŵane?

⁸Malulimi ghawo ghali nga ndi mivwi yakukoma, pakuti ŵakuyowoya vya upusikizgi pera. Yose wakuyowoya vya mutende kwa muzengezgani wakhe, kweni mu mtima wakunozgera kumukhazga munyakhe.

⁹Kasi ndingareka uli kuŵalanga chifukwa cha vyeneivi? Kasi ndingareka kuwezgera nduzga, pa fuko lakuŵa nga ndi ili?” Ntheura ndimo FUMU yikuyowoyera.

¹⁰Ine nkhati, Nditi nditengere na kulira chifukwa cha mapiri. Nditi nditengere chifukwa cha maluhari gha mu mapopa, pakuti ghocheka mwakuti palije na yumoza uyo wakwendamo. Kubama kwa ng'ombe kuti kukupulikikwamo chara, viyuni vya mudera na vinyama vya mu thengere, vyachimbiramo na kuruta.

¹¹FUMU yikuti, “Nditi ndizgore Yerusalemu kuŵa mulu wa mahami, malo ghakukharamo ŵakambwe. Ndizgore misumba ya mu charu cha Yuda kuŵa mayiyi, ghambula kukharamo na munthu na yumoza.”

¹²Penepapo ine nkhafumba nkhati, “Kasi wa vinjeru ndi njani uyo wangapulikiska vinthu ivi? Kasi FUMU yili kuphalirapo njani, mwakuti iyo wamanye kuphalirapo ŵanyakhe? Kasi nchifukwa uli charu chaparanyika na kuzgoka kuŵa nga ndi mapopa mwakuti palije na yumoza wakwendamo?”

¹³FUMU yikazgora yikati, “Chifukwa nchakuti ŵareka kurondezga dango lane ilo nkhuŵapa. Iwo kuti ŵakapulikira chara mazgu ghane nanga nkhugharondezga.

¹⁴Kweni ŵarondezga makhumbiro gha mitima yawo yinonono. Ŵakasopanga ŵachiuta ŵaBaala ŵawo nga ndi umo ŵawiskewokuru ŵakaŵasambizgira.

¹⁵Ntheura FUMU Mwenenkhongono zose, Chiuta wa Israele wakuti, wonani, nditi ndiŵapenge khuni lakuŵaŵa la mulangali kuti ŵarye ndiposo na maji ghakukoma kuti ŵamwe.

¹⁶Nditi ndiŵambininiskire mukati mu mafuko gha ŵanthu gheneagho nanga ndiwo panji ŵawiskewokuru ŵandaghamanyepo. Nditi ndiŵatumire nkhondo pamanyuma pawo ndisuke ndiŵamare petu.”

¹⁷FUMU Mwenenkhongono zose yikuti, “Ghanaghanani, ndipo mucheme ŵanakazi, awo ŵakumanya kutengera kuti ŵize. Mucheme ŵanakazi awo nvilimbi pakutengera, kuti ŵize.

¹⁸Ŵize luŵiro, ndipo ŵatiwuskire chitengero, mpaka mu maso ghithu muthike masozi, ndipo vikope vyithu vizumbwe na masozi.”

¹⁹Pakuti mphomo ya chitengero, yikupulikikwa mu Ziyoni yikuti, “Mbaya mwe! Tamara ise! Takhozgeka soni nadi, pakuti tikwenera kusida charu chithu, chifukwa ŵabwangandulira pasi nyumba zithu.”

²⁰Ine nkhati, “Imwe ŵanakazi, pulikani mazgu gha FUMU, tegherezgani ku ivyo yikuyowoya. Sambizgani ŵana ŵinu ŵanakazi kutengera, waliyose wasambizge munyakhe kutengera.

²¹Pakuti nyifwa yafika, yanjirira mu vidangazi vyithu, yanjira mu nyumba zithu za ufumu. Yakoma ŵana ŵithu mu misewu ya mu msumba, ndipo yamara ŵawukirano ŵithu mu misika.”

²²FUMU yikandiphalira kuyowoya kuti, “FUMU yikuti vitanda vya ŵanthu vyamkuwa nga mbulongwe mu minda, nga ndi mphundwe mumanyuma mwa awo ŵakuvuna. Pizamkuŵavye na yumoza wamkuviwunganya.”

²³FUMU yikuti, “Munthu wa vinjeru wareke kuthumbwira mu vinjeru vyakhe, nayo wankhongono wareke kuthumbwira mu nkhongono zakhe, ndiposo musambazi nayo wareke kuthumbwira mu usambazi wakhe.

²⁴Kweni uyo wakuthumbwa, wathumbwire mu ichi: kuti wakundipulikiska na kundimanya ine, kuti ine ndine FUMU iyo nja chisungusungu, ya weruzgi wakunyoroka na urunji pa charu, pakuti mu vyeneivi ndimo ine nkhukondwera.” Ntheura ndimo FUMU yikuyowoyera.

²⁵FUMU yikuti, “Mazuŵa ghakwiza apo ndamkuŵalangira wose awo mbakukotoreka, kweni mu mtima kuti mbakukotoreka chara.

²⁶Ndizamkulanga ŵaEguputo, ŵaYuda, ŵaEdomu, ŵaAmoni, ŵaMowabu ndiposo na wose awo ŵakukhara mu chiparamba, ŵeneawo ŵakumeta masisi ghawo mu mphepete. Mafuko ghose agha ngambula kukotoreka nga ndi umo ŵaIsraele nawo ŵaliri ŵambula kukotoreka mu mtima.”