Read new_tumbuka_bible Chitengero 1 Bible Online

Chitengero 1 - new_tumbuka_bible bible

Chitengero 1

¹Okwe mwe! Msumba wa Yerusalemu uli waka wekha, msumba uwo kale ukazura na ŵanthu. Kale ukaŵa wakumanyikwa chomene pakati pa mafuko ghose kweni sono wakhara nga ndi chokoro. Kale ukaŵa fumukazi mukati mu misumba yinyakhe kweni sono wazgoka muzga.

²Ukutengera chomene na usiku, masozi ghakuthika mu matama. Pa wose awo ŵakawutemwanga palije na yumoza uyo wakakharako kuti wawusanguruske. Ŵabwezi ŵakhe wose ŵamwendera mphiska, wose ŵazgoka kuŵa ŵarwani ŵakhe.

³ŴaYuda ŵayorekera ku umikori kukasuzgika, na kukateŵeta milimo yinonono. Sono ŵakukhara ku mafuko ghanyakhe, ndipo ŵakusanga mutende na pachoko pose chara. Wose ŵakuŵazikizga, ndipo ŵali mukati mu visuzgo vikuru.

⁴Misewu yakuruta ku Ziyoni yili nga ŵanthu ŵakutengera, chifukwa palije uyo wakurutako ku viphikiro vyakwimikika. Vipata vyakhe vyose vilije na ŵanthu, ŵasofi nawo ŵakutampha. Ŵamwali ŵakhe nawo ŵakuyuzgika chomene, ndipo Ziyoni iyomwene wali mu visuzgo vikuru nkhanira.

⁵Ŵa chimphindikwa ŵakhe ŵazgoka kuŵa ŵamazaza pa iyo, ŵarwani ŵakhe ŵakusanga makora, pakuti FUMU yamuŵika Ziyoni mu visuzgo chifukwa cha zakwananga zinandinandi, za ŵanthu ŵakhe. Ŵana ŵakhe ŵayorekera ku umikori, mbazga ku ŵarwani ŵawo.

⁶Uchindami wose wafumamo mu ŵanthu ŵa mu Ziyoni. Nduna zakhe zose zaŵa nga ndi mphoyo izo zikutondeka kusanga utheka wakubiriŵira. Zikuchimbira kwambula nkhongono para ŵarwani ŵafika.

⁷Mu nyengo ya visuzgo vyakhe na kukomwa kwakhe, Yerusalemu wakukumbuka viweme vyose ivyo wakaŵa navyo mu nyengo za kale. Para ŵanthu ŵakhe ŵakakoreka na ŵarwani, pakaŵavye na yumoza wakuŵawovwira. Ŵarwani ŵakhe ŵakamugoskanga waka, na kumuseka chifukwa cha kuwa kwakhe.

⁸Yerusalemu wakananga chomene, mwakuti wakazgoka kuŵa wakukazuzgika. Wose awo ŵakamuchindikanga, lero ŵakumupepura, pakuti ŵakuwona umo wakhalira nkhule. Iyomwene wakutampha waka na kubisa chisko chakhe.

⁹Ukazuzi wakhe ukawonekerathu pakweru, kweni kuti wakalorangako chara za umaliro wakhe. Pa chifukwa ichi kuwa kwakhe kukaŵa kwakofya chomene, pakaŵavye na wakumusanguruska. Iyo wakati, “Mwe FUMU, laŵiskanipo pa visuzgo vyane, pakuti murwani wane ndiyo wavivya.”

¹⁰Ŵarwani ŵatora vinthu vyakhe vyose ivyo vikaŵa vyakuzirwa. Yerusalemu wakawona ŵarwani wakunjira mu malo ghakhe ghakupatulika, ŵanthu ŵeneawo imwe FUMU mukaŵakanizga kunjira pa mpingo winu.

¹¹Ŵanthu ŵakhe wose ŵakutampha apo ŵakupenja chakurya. Vinthu vyawo vyakuzirwa wakusinthiskana na chakurya kuti nkhongono zawo ziwereremo. Iyo wakuti, “Mwe FUMU, laŵiskani, muwone umo ndayuyurikira.”

¹²Imwe mukujumpha waka mu nthowa, kasi mukulorako chara na vinthu ivi? Laŵiskani, muwone usange pali visuzgo vinyakhe vyakuyana na vyane, visuzgo ivyo FUMU yikaŵika pa ine pa zuŵa ilo yikakwiya chomene.

¹³Yikatuma moto kufuma kuchanya, ndipo yikawukhizgira mukati mu viwangwa vyane. Yikatandaula ukonde kuti ukore malundi ghane, na kundiwezgera kunyuma. Yikandilegherezga waka, mu vyaŵinya vikuru zuŵa lose.

¹⁴Zakwananga zane zikakakika pamoza kuti ziŵe nga ndi goliwoli. FUMU yikazikaka pamoza na woko lakhe. Yikazikakilira mu singo yane, mwa ntheura yikamarizgirathu nkhongono zane. FUMU yikandiŵika mu mawoko gha ŵanthu ŵeneawo nkhatondeka kulimbana nawo.

¹⁵FUMU yikaviyuyura vinkhara vyane vyose, vyeneivyo vili pamoza nane. Yikawunganya ŵanthu pakwimikana nane, kuti yiŵamare na ŵankhondo ŵane ŵa chiwukirano. FUMU yikaŵakandirizga pasi ŵaYuda, nga ndi umo ŵanthu ŵakuchitira mu chakukamiramo vinyo.

¹⁶Ine nkhulira chifukwa cha vinthu ivi, masozi ghakujithikira waka mu maso ghane. Musanguruski kuti wali pafupi chara, uyo wakundikhwimiska wali kutali. Ŵanthu ŵane ŵarekeka waka, pakuti ŵarwani ndiwo ŵatonda.

¹⁷Ziyoni wakwezga mawoko ghakhe muchanya, kweni palije na yumoza wakumusanguruska. FUMU yalangula kuti ŵazengezgani ŵakhe Yakhobe ŵaŵe ŵarwani ŵakhe. Yerusalemu wazgoka kuŵa chinthu cha nthontho mukati mwawo.

¹⁸Pa ichi FUMU yaneneska, pakuti nkhareka kupulikira marango ghakhe. Pulikani imwe mwa ŵamitundu ndipo wonani na umo ine nkhusuzgikira. Ŵamwali na ŵanyamata ŵane ŵayorekera ku umikori.

¹⁹Nkhachema ŵakutemweka ŵane kuti ŵandovwire, kweni iwo ŵakandipusika waka. Ŵasofi ŵane na ŵararaŵarara ŵakafwira mu msumba, apo ŵakapenjanga vyakurya kuti nkhongono zawo ziwereremo.

²⁰Wonani, Mwe FUMU umo ine ndasuzgikira, mzimu wane uli mu visuzgo. Mtima wane ukunyongozeka mukati mwane, pakuti ndagaruka chomene. Mu ŵagurwe ŵa mu msumba ŵanthu ŵakukomeka na lupanga, ndipo mu nyumba yawo namo muli nyifwa.

²¹Pulikani umo ine nkhutamphira. Palije na yumoza wakundisanguruska. Ŵarwani ŵane wose ŵali kupulika za visuzgo vyane. Iwo mbakukondwa pakuwona kuti mwachita ichi. Mulifiske zuŵa ilo mukapangana, mwakuti ŵarwani ŵane nawo ŵalangike nga ndine.

²²Maubendezi ghawo ghose ghawoneke panthazi pinu. Muŵalange nga ndi umo mukandilangira ine, chifukwa cha maubendezi ghane ghose. Ine nkhutampha chomene ndipo mtima wane waropwa nkhanira.