Read new_tumbuka_bible Chitengero 2 Bible Online

Chitengero 2 - new_tumbuka_bible bible

Chitengero 2

¹FUMU yakaripa nadi. Wonani na umo yabenekerera Ziyoni na mdima! Utozi wa Israele, FUMU yawutaya pasi kufumira kuchanya. Pa zuŵa la ukari wakhe FUMU yilije kukumbuka kuti Ziyoni wali nga nchitambaliro chakhe.

²FUMU yapankhura kwambula lusungu vikaya vyose vya Yakhobe. Yawiskira pasi malinga gha mu charu cha Yuda chifukwa cha kuphya mtima. Na soni zikuru yabwangandulira pasi ufumu wa Israele na awo ŵakuwusa.

³Mu ukari wakhe ukuru yikawuskako nkhongono zikuru za Israele. Yikawezgako woko lakhe la kuvikirira, uko ŵarwani ŵafika kale. Ukari wakhe wagolera nga ndi moto pa fuko la Yakhobe na kocha kalikose ako kali pafupi pakhe.

⁴Yakweŵa uta wakhe pa ise nga ndi murwani withu, ndipo woko lakhe la maryero ndakunozgeka kulasa nga ndi murwani. Yakoma wose awo tikathumbwirangapo, mu Nyumba ya Chiuta ku Ziyoni. Ukari wakhe ukagolera nga ndi moto.

⁵FUMU yili nga ndi murwani, yapankhura charu cha Israele. Yabwangandula nyumba zakhe za ufumu zose ndipo malinga ghakhe ghose ghazgoka mahami. Yandaniska chiliro na chitengero pakati pa ŵaYuda.

⁶Yabwangandula Nyumba yakhe nga ndi chigongwe cha mu munda. Yazgora malo ghakhe gha viphikiro vyakwimikika kuŵa mahami. FUMU yarekeska mu Ziyoni viphikiro vyakwimikika ndiposo na Sabata wuwo. Sono pakuti yakwiya chomene, yamukana karonga pamoza na ŵasofi.

⁷FUMU yayuyura na jochero lakhe wuwo, ndipo yaghakana malo ghakhe ghakupatulika. Yapereka malinga gha nyumba zakhe za ufumu mu mawoko gha ŵarwani. Mu Nyumba ya FUMU ŵarwani ŵakachita chiwawa chikuru nga ndi umo kukuŵira pa zuŵa la chiphikiro.

⁸FUMU yikadumula kuti yiwiskirenge pasi malinga gha msumba wa Ziyoni. Yikaghapima na chingwe, ndipo yikakhumba chara kureka kughabwangandula. Linga na chiliŵa vikaŵa nga ndi ŵanthu ŵakutengera. Vyose vyabwangandukira pamoza.

⁹Vijaro vyakunjirira mu msumba wa Ziyoni vyaphyoka ndipo vyawundika pasi pa dongo. Mphingirizgo zakhe zaphyoka na kunangika. Karonga wakhe na nduna ŵatorekera ku umikori, pakati pa ŵamitundu. Marango gha Chiuta kuti ghakusambizgikaso chara. Nchimi zakhe nazo kuti zikuwonaso mboniwoni kufuma kwa FUMU chara.

¹⁰Ŵararaŵarara ŵa mu msumba wa Ziyoni ŵakhara pasi, ŵati waka chete. Ŵajithilira fuvu pa mitu yawo ndipo ŵavwara vigudulu. Ŵamwali ŵa mu Yerusalemu ŵasindama, ŵati waka diwidiwi.

¹¹Maso ghane ghavuka na kulira. Mu mtima wane mwazura na chitima chifukwa chakuti ŵanthu ŵane ŵapasuka ndiposo na ŵana ŵabonda wuwo ŵakufwa lunkhuŵa, mu ŵagurwe ŵa mu msumba.

¹²Ŵana ŵakulira ku ŵanyinawo ŵakuti, “Kasi vyakurya na vyakumwa vili nkhu?” Ŵakufumba ivi apo ŵakufwa lunkhuŵa mu ŵagurwe ŵa mu misumba nga ndi ŵanthu awo ŵapwetekeka. Iwo ŵakumarizgikira mu chipakato cha ŵanyinawo.

¹³Iwe msumba wa Yerusalemu, kasi ndingayowoyachi na za iwe ndipo kasi ndingakulinganizga na vichi? Iwe Ziyoni msumba wakulangwa, kasi ndingakukozganiska na vichi mwakuti ndikusanguruske? Kupankhuka kwako nkhusani nga ndi nyanja. Ndi njani wangamanya kukunozgaso?

¹⁴Vinthu ivyo nchimi zako zikakuwonera mu mboniwoni vikaŵa vya utesi na vya upusikizgi waka. Izo zilije kuvumbula uheni wako mwakuti uŵeso makora. Kweni mazgu agho zikachima ghakaŵa gha utesi na gha upusikizgi.

¹⁵Wose awo ŵakujumpha mu nthowa ŵakukuŵa nkhufi pakukuseka. Ŵakujuma na kupukunyira mitu yawo, iwe msumba wa Yerusalemu. Iwo ŵakuyowoya ŵakuti, “Kasi msumba ura ndi uwu wenewura ukachemekanga wakutowa nkhanira, msumba wakukondweska charu chose cha pasi?”

¹⁶Ŵarwani ŵako wose ŵakukuhoya. Ŵakujuma na kumemena mino ghawo. Ŵakuchemerezga ŵakuti, “Tawupankhura. Ili ndilo zuŵa lira tikalindizganga. Asi ili taliwona!”

¹⁷FUMU yachita icho yikanozgera kuchita. Yafiska nadi mazgu ghakhe. Yabwangandula kwambula lusungu nga ndi umo yikanozgerathu mu mazuŵa gha kale. Yazomerezga kuti ŵarwani ŵako ŵakuhoye ndipo yakuzga nkhongono za ŵarwani ŵako.

¹⁸Lira chomene kwa FUMU, iwe linga la msumba wa Ziyoni! Masozi ghathikenge nga ndi kamronga muhanya na usiku. Ureke kujipa nyengo ya kupumulira. Masozi ghako ghangarekanga chara kuthika.

¹⁹Wuka ndipo uchemerezge na usiku, pa nyengo yakwambira maulinda gha usiku. Pungura vya mu mtima wako nga ndi maji panthazi pa FUMU. Kwezga mawoko na kuromba kwa iyo chifukwa cha umoyo wa ŵana ŵako, ŵeneawo chifukwa cha njara ŵakufwa lunkhuŵa mu misewu yose.

²⁰Mwe FUMU, wonani ndipo laŵiskani! Kasi ndi njani uyo mwamusuzga ntheura? Kasi ŵanakazi mpaka ŵarye ŵana ŵawo, ŵana awo ŵakaŵalera makora? Kasi ŵasofi na nchimi ŵachite kuŵakomera mu Nyumba ya FUMU?

²¹Ŵawukirano pamoza na ŵarara ŵali ngundangunda mu ŵagurwe ŵa mu msumba. Ŵamwali na ŵanyamata ŵane ŵakomeka mu nkhondo. Mwaŵakoma mu zuŵa la ukari winu, mwaŵakoma nadi kwambula na lusungu.

²²Umo imwe mukuchemera ŵanthu ku chiphikiro, ndimo mwandichemera vinthu vyakofya kufuma kosekose. Kukaŵavye na yumoza wakupona panji kukharako wamoyo pa zuŵa la ukari winu, imwe FUMU. Ŵarwani ŵane ŵakakoma ŵana ŵane awo nkhaŵalera.