Read new_tumbuka_bible Chitengero 3 Bible Online

Chitengero 3 - new_tumbuka_bible bible

Chitengero 3

¹Ine ndine munthu uyo wawona visuzgo pakuthyapulika na ndodo ya ukari wa Chiuta.

²Wakandichimbizga na kundirongozgera ku chisi kwenekuko kulije na ungweru.

³Inya nadi wakunditimba ine na woko lakhe, wakunditimba kanandinandi zuŵa lose la msuma.

⁴Chiuta waghandiska munofu wane na chikumba chane, ndipo waphyora viwangwa vyane.

⁵Wakandirotokera na kundizingirizga kosekose na visuzgo vyakuŵinyiska mtima.

⁶Wakandikharika mu chisi cha zani muwone, kuti ndiŵe nga ndi munthu uyo wali kufwa kale chomene.

⁷Wakandijalira mukati mu linga kuti ndireke kuchimbira. Wakandikaka na maunyoro ghazitu chomene.

⁸Nanga ine nkhachemerezga na kuromba chovwiro, iyo kuti wakalipulika lurombo lwane chara.

⁹Wakandijalira msewu wane na mawe ghakuru, ndipo wakabendezga nthowa zane.

¹⁰Wakaŵa nga ndi nkharamira iyo yakhazga panji nga ndi nkharamu iyo yabisama.

¹¹Wakandiwuskamo mu nthowa na kundiparura tuchokotuchoko, ndipo wakandireka waka ndekha.

¹²Wakakweŵa uta wakhe na kundizgora ine kuŵa chichiri chakulasapo muvwi wakhe.

¹³Wakalasa mtima wane na mivwi ya mu phodo lakhe.

¹⁴Ndazgoka chimuhoyere ku ŵanthu ŵakwithu wose, ndipo ŵakundiyimbira sumu zakunyoza zuŵa lose la msuma.

¹⁵Wakandiryeska vyakuŵinya ndipo wakandikhutiska na khuni la mulangali.

¹⁶Wakandiryeska sangalawe ilo likaphyora mino ghane, ndipo wakandikunkhuzga mu vyoto.

¹⁷Mu mtima wane mulije na mutende, ndipo ndili kuruwa umo chimwemwe chiliri.

¹⁸Ntheura sono nkhuti, “Uchindami wane wose wamara, nanga nchigomezgo chakupokera kanthu kwa FUMU nacho chamara.”

¹⁹Nkhukumbuka visuzgo vyane na kuyuzgika kwane, ivyo vili nga ndi khuni la mulangali na nduru.

²⁰Nyengo zose nkhughanaghana vyeneivi, ndicho chifukwa nkhutaya mtima.

²¹Ndipouli nkhukumbukira chinthu ichi, ntheura nkhuŵa na chigomezgo kuti:

²²Chisungusungu cha FUMU chikukhalirira ndipo chiwuravi chakhe kuti chikumara chara.

²³Mulenje uliwose vikuwoneka viphya, pakuti kugomezgeka kwakhe nkhukuru.

²⁴FUMU ndiyo phande lane, ntheura nditi ndigomezge mwa iyo.

²⁵FUMU njiweme kwa awo ŵakumugomezga, kwa munthu uyo wakuyipenja iyo.

²⁶Nkhuweme kulindizga FUMU mwakuzizipizga kuti wawone chiponosko chakhe.

²⁷Nkhuweme kuti munthu wayeghe goliwoli apo wachali muwukirano.

²⁸Wakhare chete pa yekha para FUMU yikumukakilira goliwoli.

²⁹Wawiske chisko chakhe mu fuvu pakujilambika panji chigomezgo chingaŵa chichaliko.

³⁰Wapereke thama lakhe kwa uyo wakukhumba kumutimba ndipo wazizipizge visunjizgo.

³¹Nadi FUMU kuti yiti yimutaye munthu kwa muyirayira chara.

³²Yingamanya kulanga munthu ndipouli yiŵenge na chiwuravi kwakulingana na kuzara kwa chisungusungu chakhe.

³³Iyo kuti wakusungira dala munthu chara nesi kumuyuzga.

³⁴FUMU yikumanya para ŵakayidi ŵa mu charu ŵakuyuzgika.

³⁵Yikumanya para ŵarongozgi ŵakutindiŵizgira munthu pasi kwambula urunji panthazi pa Chiuta Chikurukuru.

³⁶FUMU yikumanya makora ghene para ŵarongozgi ŵakureka kweruzga munthu mu urunji.

³⁷Ndi njani wangamanya kuyowoya kuti vinthu vichitike, kwambula kuti FUMU yalangula kuti vichitike?

³⁸Asi vinthu viweme na masuzgo vyose vikufumira kwa Chiuta Chikurukuru?

³⁹Kasi pali chifukwa kuti munthu wasinginikenge usange wakulangika chifukwa cha zakwananga zakhe?

⁴⁰Tiyeni tighanaghane na kuziyezga nthowa zithu ndipo tiwerere kwa FUMU.

⁴¹Tiyeni tikwezgere mitima yithu na mawoko ghithu kwa Chiuta kuchanya.

⁴²Ise tananga ndipo tagaruka, ndipo mulije kutigowokera.

⁴³Mwajivungirizga na ukari nga nchakuvwara ndipo mwatirondora na kutikoma kwambula lusungu.

⁴⁴Mwajivungirizga na bingu, mwakuti malurombo ghithu kuti ghangaporota kwiza kwa imwe chara.

⁴⁵Mwatizgora kuŵa marikho na viswaswa mukati mu ŵanthu ŵa mitundu yinyakhe.

⁴⁶Ŵarwani ŵithu wose ŵakutihoya waka.

⁴⁷Wofi na chitimbaheti, ndiposo nyifwa na phasulo vyatizira ise.

⁴⁸Masozi ghakuthika mu maso mwane nga nthumironga chifukwa ŵanthu ŵane ŵamara petu.

⁴⁹Nditi ndilire masozi kwambula kurekezga ndiposo kwambula na kupumula wuwo,

⁵⁰yisuke FUMU yikaŵiske kufuma kuchanya na kuwona visuzgo vyane.

⁵¹Nkhupwetekeka mu mtima wane para nkhuwona ivyo vikuchitikira ŵanakazi ŵa mu msumba wane.

⁵²Awo ŵakaŵa ŵarwani ŵane kwambula chifukwa, ŵakandisokora nga nkhayuni.

⁵³Ŵakandiponya wamoyo mu khururu, ndipo ŵakajara khururu na mawe uku ndili mukati.

⁵⁴Maji ghakabizga na mutu wane ndipo ine nkhati, “Mbaya mwe, nkhufwa!”

⁵⁵Nkharomba kwa imwe, Mwe FUMU, kufumira pasi pa khururu.

⁵⁶Mukapulika mazgu gha kuŵeya kwane kuti, “Mungajaliranga dala makutu ghinu chara, apo ine nkhuromba kuti mundovwire.”

⁵⁷Para nkharomba kwa imwe, mukandizgora ndipo mukandiphalira kuti, “Reka kopa!”

⁵⁸Imwe mukandovwira pa mrandu wane, Mwe FUMU, ndipo mukawombola umoyo wane.

⁵⁹Mwe FUMU, mukawona uheni uwo ŵali kundichitira. Ntheura mweruzge ndimwe mrandu wane.

⁶⁰Imwe ndimwe mukawona umo ŵakandiwezgeranga nduzga, na vyose ivyo ŵakanozgera kundichitira.

⁶¹Mwe FUMU, mukapulika na umo ŵakunditukira, na vyose ivyo ŵakanozgera kundichitira.

⁶²Mukapulika ivyo ŵarwani ŵane ŵakatokotoskerananga zuŵa lose, ndiposo na ivyo ŵakaghanaghana kundichitira.

⁶³Zuŵa lose la msuma apo iwo ŵali, ŵakutandalira kwimba sumu za kuhoya ine.

⁶⁴Mwe FUMU, muŵalange kwakuyana na ivyo iwo ŵachita.

⁶⁵Muŵadindiŵaliske mitima, ndipo muŵatemberere.

⁶⁶Mwe FUMU, muŵazikizge mu ukari winu ndipo muŵamare petu pa charu cha pasi.