Read new_tumbuka_bible Chitengero 4 Bible Online

Chitengero 4 - new_tumbuka_bible bible

Chitengero 4

¹Okwe mwe! Nako nkhubinkha kwa golide, golide mwenecho sono wabinkhirathu. Mawe ghakupatulika ghaparanyikana pa nkhumano zose za ŵagurwe.

²Wonani ŵanthu ŵakutemweka ŵa mu Ziyoni, ŵakaŵa ŵakuzirwa nga ndi golide, sono ŵakupimika nga ndi viŵiya vya dongo vyeneivyo muwuvi wakuwumba na mawoko ghakhe.

³Nanga ndi ŵakambwe ŵali na maŵere ndipo ŵakonkheska ŵana ŵawo. Kweni ŵanthu wa ku kwithu mbankhaza chomene, ŵakulingana waka na nthiŵatiŵa za mu mapopa.

⁴Lulimi lwa bonda lukudemerera ku chavu cha mlomo wakhe chifukwa cha nyota. Ŵana ŵachoko ŵakuromba waka chakurya, kweni palije na munthu wakuŵapako.

⁵Ŵanthu awo kale ŵakaryanga vya manuni sono ŵakufwira mu ŵagurwe ŵa mu msumba. Awo ŵakakulira mu umoyo wa vyakuzara sono ŵakuvivira pa vyoto.

⁶Chilango cha ŵanthu ŵa ku kwithu nchikuru, kuruska chilango cha ŵanthu ŵa ku Sodomu, ŵeneawo ŵakaparanyika mu kanyengo kachoko waka kwambula kuti munthu wakhwaskeko.

⁷Nduna zakhe zikaŵa zakuŵara kuruska chiwuvi, ndiposo zituŵa kuruska mkaka. Mathupi ghawo ghakaŵa ghaswesi kuruska nkhama, na ghakung'azima kuruska libwe la safire.

⁸Kweni sono visko vyawo vyazgoka vifipa kuruska mwayi. Palije munthu uyo wangaŵapanikizga mu ŵagurwe. Vikumba vyawo vyachita mankhwinya na kudemerera ku viwangwa ndipo nvyakomira nga ndi khuni.

⁹Awo ŵakafwira mu nkhondo ŵakaŵa na mwaŵi kuruska awo ŵakafwa chifukwa cha njara. Iwo ŵakaghandanga pachokopachoko na kufwa chifukwa chakusoŵerwa chakurya kufuma ku munda.

¹⁰Ŵanakazi ŵa mtima wa chiwuravi ŵakaphika ŵana ŵawo na mawoko ghawo na ghawo. Ŵana ŵakazgoka kuŵa chakurya chawo pa nyengo iyo ŵanthu ŵa ku kwithu ŵakamalira petu.

¹¹FUMU yikakwiya chomene, yikafumya ukari wakhe wakocha. Yikapemba moto mu Ziyoni, weneuwo ukawocha msumba mpaka ku malufura.

¹²Ŵakaronga ŵa pa charu cha pasi kuti ŵakagomezga chara nanga ndi ŵanthu awo ŵakakharanga pa charu cha pasi, kuti ŵarwani panji ŵasilikari, ŵangamanya kunjira mu vipata vya mu Yerusalemu.

¹³Ivi vikachitika chifukwa cha zakwananga za nchimi zakhe ndiposo na maubendezi gha ŵasofi ŵakhe, ŵeneawo ŵakathiska ndopa za ŵarunji mukati mwawo.

¹⁴Nchimi na ŵasofi ŵakendendekanga waka mu ŵagurwe nga ndi ŵanthu ŵa chiburumutira. Ŵakakazuzgika na ndopa mwakuti pakaŵavye na munthu wakukhwaska nanga ndi vyakuvwara vyawo.

¹⁵Ŵanthu ŵakachemerezganga kwa iwo kuti, “Fumanipo! Fumanipo! Imwe ndimwe ŵambula kuphotoreka. Mungatikhwaskanga chara.” Ntheura ŵakachimbira na kuyingayinga waka. Ŵanthu ŵakayowoya mukati mu ŵamitundu yinyakhe ŵakayowoyanga kuti, “Ŵangakharangaso pamoza nase chara.”

¹⁶FUMU iyoyene ndiyo yikaŵambininiska, kuti yiti yiŵaghanaghanireso chara. Ŵasofi yilije kuŵachindikaso, ndipo ŵararaŵarara nawo yilije kukondwa nawo.

¹⁷Maso ghithu ghakavuka pa waka kulindizga wovwiri. Tikalindizganga pa waka mtundu wa ŵanthu uwo kuti ungamanya kutithaska chara.

¹⁸Ŵarwani ŵakatirondoranga waka kosekose, mwakuti tikatondekanga kwenda mu ŵagurwe ŵithu. Mazuŵa ghithu ghakacheperachepera, nyifwa yithu yikaŵa pafupi. Umaliro withu ukaŵa kuti wafika.

¹⁹Ŵanthu awo ŵakatirondoranga ŵakachimbiranga luŵiro, kuruska makuŵi agho ghakuwuruka mudera. Ŵakatichimbizganga pa mapiri ndipo ŵakatikhazganga mu mapopa.

²⁰Wakusoreka wa FUMU yura, uyo wali nga ndi mvuchi wa umoyo withu wakakoreka mu misampha yawo. Iyo ndiyo tikayowoyanga kuti, “Na uvikiriri wakhe titi tikhare mukati mu ŵamitundu.”

²¹Sekererani na kukondwa ŵanthu ŵa ku Edomu, imwe mukukhara mu charu cha Uzi. Namweso nkhombo iyi ya visuzgo yizamkumwizirani pa nyengo yinu, mwizamkuloŵera na kuŵa nkhule.

²²Imwe ŵanthu ŵa ku Ziyoni, chilango cha ubendezi winu chamalirathu. FUMU kuti yimusungiliraningiso ku umikori chara. Kweni imwe mwa ŵanthu ŵa ku Edomu, FUMU yizamkumulangani chifukwa cha ubendezi winu. Zakwananga zinu wizamkuzivumbula pakweru.