Read new_tumbuka_bible Chitengero 5 Bible Online

Chitengero 5 - new_tumbuka_bible bible

Chitengero 5

¹Mwe FUMU, kumbukani ivyo vyatiwira ise. Laŵiskani, muwone umo talengeskekera.

²Charu chithu chaperekeka ku ŵalendo, ndipo nyumba zithu ŵanjiramo ŵayeni.

³Tazgoka ŵana ŵalanda, ŵambula wiskewo. Ŵamama ŵazgoka nga ndi vyokoro.

⁴Maji agho tikumwa tikwenera kulipira ndipo nkhuni nazo tikwenera kugula.

⁵Tikukanchizgika uheniuheni uku goliwoli liri mu singo zithu. Nanga tivuke kuti ŵakutizomerezga kupumula chara.

⁶Tikajipereka ku ŵaEguputo na ŵaAsiriya kuti tisange chakurya chakukwanira.

⁷Ŵasekuru ŵakananga kweni ŵali kufwa. Sono ise tikusuzgika chifukwa cha kwananga kwawo.

⁸Awo ŵakutiwusa mbazga, palije munthu uyo wangatithaska kwa iwo.

⁹Para tikupenja chakurya tikuŵa mu urwani ukuru, chifukwa cha ŵanthu awo ŵakukoma ŵanyawo mu mapopa.

¹⁰Chikumba chithu nchakocha nga ndi ng'anjo chifukwa cha kuŵinya kwa njara.

¹¹Mu msumba wa Ziyoni ŵanthu ŵakuchichizga ŵanakazi kuchita nawo uleŵe, ndipo mu mizi ya charu cha Yuda, ŵamwali ŵakulangwa ŵakuchita nawo ntheura pera.

¹²Nduna zikunyongeka pakuzinyonga ŵararaŵarara nawo kuti ŵakuŵachindika chara.

¹³Ŵanyamata ŵakuŵachichizga kusira tirigu, ndipo ŵasepuka ŵakupenthyapenthya waka na mizigho ya nkhuni.

¹⁴Ŵararaŵarara ŵawukapo pa mphara ya msumba, ŵawukirano nawo ŵareka na kwimba.

¹⁵Mu mitima yithu mulije chimwemwe, kuvina kwithu kwazgoka chitengero.

¹⁶Mphumphu yawukako ku mutu withu na kuwa pasi. Soka kwa ise, pakuti tananga!

¹⁷Ndicho chifukwa mitima yithu yaropwa, ndipo, chifukwa cha ivi, mu maso ghithu muli chisi.

¹⁸Pakuti Phiri la Ziyoni lakhara mapopa, ŵakambwe nawo ŵakuyingayinga waka mwenemumo.

¹⁹Kweni imwe, Mwe FUMU mukuwusa kwa muyirayira, chizumbe chinu chikukhalirira ku miwiro yose.

²⁰Kasi nchifukwa uli mwatiruwa nyengo yitali? Kasi mwatitayirachi nyengo yitali ntheura?

²¹Mwe FUMU, mutiwezgere kwa imwe kuti tiwereremo nga kale. Zgorani mazuŵa ghithu kuŵa gha chimango nga ndi kale.

²²Panji, kasi mwatikanira nkhanira? Kasi, ise mwatikwiyira nkhanira?