Read new_tumbuka_bible Ezekiyele 1 Bible Online

Ezekiyele 1 - new_tumbuka_bible bible

Ezekiyele 1

¹Mu chirimika cha 30, pa zuŵa la chinkhonde la mwezi wa chinayi, apo nkhaŵa mukati mu ŵamikori mu mphepete mwa mronga wa Kebara, kuchanya kukajurika ndipo nkhawona mboniwoni ya Chiuta.

²Pa zuŵa la chinkhonde la mwezi, mu chirimika cha chinkhonde, apo Karonga Yehoyiyakini wakaŵira ku umikori,

³mazgu gha FUMU ghakiza kwa ine, musofi Ezekiyele, mwana wa Buzi, mu charu cha Babuloni, mu mphepete mwa mronga wa Kebara. Kwenekura nkhongono ya FUMU yikaŵa nane.

⁴Nkhati ndalaŵiska, nkhawona chimphupuru kufumira ku mpoto chikwiza, pamoza na bingu likuru ilo likazingirizgika na ungweru. Moto ukamwetukanga mu bingu lira kwambula kurekezga. Mukatikati mwakhe mukafuma mbaliŵali za moto izo zikaŵa nga ndi mkuŵa wakung'azima.

⁵Mukatikati mwa moto ura, mukaŵa vilengiwa vyamoyo vinayi. Kawonekero kawo kakaŵa nga ndi ŵanthu.

⁶Chilengiwa chilichose chikaŵa na visko vinayi na mapapindo ghanayi.

⁷Malundi ghawo ghakaŵa ghakunyoroka, ndipo vikandiro vyawo vikaŵa nga ndi vya mwana wa ng'ombe. Vikandiro vira vikang'azimanga nga ndi mkuŵa wakutuwulika.

⁸Kusi kwa mapapindo ghawo, ku madera ghose ghanayi, vikaŵa na mawoko ghakuŵa nga ndi gha munthu. Vilengiwa vira vikaŵa na visko na mapapindo ghawo mwa ntheura:

⁹Mapapindo ghawo ghakakhwaskananga, ndipo vikenda nyoronyoro kurazga kunthazi, kwambula kuzgokera uku na uku para vikendanga.

¹⁰Chilengiwa chilichose chikaŵa na visko vinayi vyakupambanapambana: Chisko cha munthu chikaŵa kunthazi, cha nkharamu ku woko la maryero, cha nkhambako ku woko la mazere, ndipo cha nombo ku nkhonyoro kwakhe.

¹¹Ntheura ndimo vikaŵira visko vyawo. Mapapindo ghawo ghakatandawukira muchanya. Chilengiwa chilichose chikaŵa na mapapindo ghaŵiri, phapindo limoza likakhwaskana na phapindo la chilengiwa chinyakhe, ndipo linyakhe nalo ntheura pera. Mapapindo ghanyakhe ghaŵiri chikajibenekerera thupi lakhe.

¹²Chilengiwa chilichose chikendanga nyoronyoro kurazga kunthazi. Kulikose uko mzimu ukarongozgera, nacho chikarutanga kwenekuko kwambula kuzgoka pakwenda.

¹³Mukati mu vilengiwa vira mukaŵa kanthu ako kakaŵa nga ndi khara la moto, panji nga ndi muliko uwo ukamulikanga uku na uku. Moto ura ukaŵalanga ndipo leza wakamwetukanga kufuma mu moto ura.

¹⁴Vilengiwa vira vikendanga mwakubwanthabwantha nga ndi kumwetuka kwa leza.

¹⁵Para nkhalaŵiska pasi pa chilengiwa chilichose, nkhawona mukombero pafupi nacho.

¹⁶Kawonekero ka mikombero yira kakaŵa nga ndi libwe la topazi, ndipo ghose ghanayi ghakaŵa ghakukozgana. Kapangikiro kawo kakaŵa nga ndi mukombero uwo wapangikira mukati mu mukombero unyakhe.

¹⁷Pa kwenda vikamanya kwendera ku madera ghose ghanayi kwambula kuzgoka.

¹⁸Marimu gha mikombero yinayi yira ghakaŵa na vizinga vikuru na vyakofya, ndipo vikazura na maso posepose.

¹⁹Para vilengiwa vira vikendanga, mikombero nayo yikendanga pamoza nayo, ndipo para vikawukanga pasi, mikombero nayo yikawukanga.

²⁰Kose uko mzimu ukavirongozgeranga ndiko navyo vikarutanga, ndipo mikombero yira nayo yikawukiranga pamoza nayo, chifukwa mzimu wa vilengiwa ukaŵa mu mikombero yira.

²¹Para vilengiwa vikendanga, mikombero nayo yikendanga, para vikimiliranga, mikombero nayo yikimiliranga, chifukwa mzimu wa vilengiwa ukaŵa mu mikombero yira.

²²Pachanya pa mitu ya vilengiwa vira, pakaŵa chizinga icho chikawoneka nga ndi mtambo wakunyezimira nga ndi sangalawe.

²³Kusi ku chizinga chakuwoneka nga ndi mtambo chira, mapapindo gha vilengiwa vira ghatandauka nyoronyoro, ndipo ghakakhwaskananga. Penepapo chilengiwa chilichose chikajibenekerera na mapapindo ghaŵiri.

²⁴Para vilengiwa vira vikendanga, nkhapulika mphomo ya mapapindo ghawo iyo yikaŵa nga ndi maji ghanandi. Yikaŵa nga ndi kududumira kwa Mwenenkhongono zose, panji nga ndi chiwawa cha ŵasilikari. Para vikimilira, vikagowozga mapapindo ghawo.

²⁵Penepapo nkhapulika mazgu kufuma mu chizinga cha mtambo pachanya pa mitu ya vilengiwa vira uku vikwimilira kugowozga mapapindo ghawo.

²⁶Pachanya pa chizinga cha mtambo chira pa mitu ya vilengiwa, pakaŵa chikozgo cha chizumbe chakuwoneka nga ndi libwe la safire. Ndipo pachanya pa chizumbe pakakhara uyo wakawoneka nga ndi munthu.

²⁷Kufuma mu chiuno chakhe kukwera kunena, nkhawona icho chikawoneka nga ndi mkuŵa wakunyezimira, chakuŵa nga ndi moto wakugolera chomene. Kufuma mu chiuno kukhira kusika, nkhawona icho chikaŵa nga ndi moto, ndipo ungweru wakhe ukamuzingirizga.

²⁸Ungweru ura ukaŵa nga ndi chiŵingavura mu maŵingu pa zuŵa ilo kwawa vura. Ntheura ndimo ukaŵira uchindami wa FUMU ukawonekera. Para nkhawuwona, nkhawa pasi kavunama, ndipo nkhapulika mazgu.