Read new_tumbuka_bible Ezekiyele 10 Bible Online

Ezekiyele 10 - new_tumbuka_bible bible

Ezekiyele 10

¹Nkhalaŵiska ndipo nkhawona chizinga icho chikawoneka nga ndi chizumbe cha ufumu cha libwe la safire pachanya pa mitu ya ŵakerubi.

²FUMU yikati kwa munthu uyo wakavwara salu ya bafuta, “Njira pakati pa mikombero yakuzingirira kusi ku ŵakerubi ndipo uzuzge mawoko ghako na makara gha moto agho ghali pakati pa ŵakerubi ndipo ughamwazgire kosekose pa msumba.” Ndipo wakanjira uku nkhumuwona.

³Ŵakerubi ŵara ŵakimilira ku dera la kumwera kwa Nyumba ya Chiuta para munthu yura wakanjiranga. Penepapo bingu likazura baraza lose la mukati.

⁴Uchindami wa FUMU ukakwera kufuma ku ŵakerubi kuya ku muryango wa Nyumba ya Chiuta. Bingu lira likazura Nyumba ya Chiuta ndipo baraza nalo likazura na kuŵala na uchindami wa FUMU.

⁵Mphomo ya mapapindo gha ŵakerubi yikapulikikwanga kuya kafika ku baraza la kuwaro. Yikaŵa nga ndi mazgu gha Chiuta Mwenenkhongono zose para wakuyowoya.

⁶Para FUMU yikalangula munthu uyo wakavwara salu ya bafuta kuti, “Tora moto kufuma pakati pa mikombero yakuzingirira pakati pa ŵakerubi,” munthu yura wakanjira na kwimilira pafupi na mikombero.

⁷Penepapo mukerubi yumoza wakanyoroska wako lakhe ku moto uwo ukaŵa mukati mwawo na kutora moto ndipo wakamupa munthu uyo wakavwara salu ya bafuta yura. Munthu yura wakatora na kuruta.

⁸Kusi kwa mapapindo gha ŵakerubi ŵara kukawoneka chinthu icho chikaŵa nga ndi woko la munthu.

⁹Nkhati ndalaŵiska, nkhawona mikombero yinayi pafupi na ŵakerubi ŵara, mukombero umoza pa mukerubi waliyose. Mikombero yira yikanyezimiranga nga ndi libwe la topazi.

¹⁰Kawonekero ka mikombero yose yira, kakaŵa kakuyana waka nga ndi para mukombero yumoza uli mukati mwa mukombero unyakhe.

¹¹Para ŵakerubi ŵara ŵakendanga kurazga ku madera ghose ghanayi, mikombero yira nayo yikendanga kurazga dera lenelira kwambula kuzgoka.

¹²Mathupi ghawo, miwongo yawo, mawoko ghawo, mapapindo gha ŵakerubi ŵanayi ndiposo na marimu ghawo na masipoko ndiposo na mikombero, vyose vikaŵa na maso ghanandinandi zingirizge.

¹³Nkhapulika mikombero yira yikuchemeka kuti, “Mikombero iyo yikuzingirira”.

¹⁴Mukerubi waliyose wakaŵa na visko vinayi: Chisko chakwamba chikaŵa iyo mukerubi, chisko cha chiŵiri chikaŵa cha munthu, chisko cha chitatu chikaŵa cha nkharamu, ndipo chisko cha chinayi chikaŵa cha nombo.

¹⁵Ŵakerubi aŵa ŵakadukira muchanya kufuma pasi, ndipo ŵeneaŵa ndi vyamoyo ivyo nkhaviwona pafupi na mronga wa Kebara.

¹⁶Para ŵakerubi ŵakendanga, mikombero nayo yikendanga mu mphepete mwawo. Para ŵakerubi ŵakatandaula mapapindo ghawo na kudukira muchanya kufuma pasi, mikombero kuti yikafumako ku mphepete kwawo chara.

¹⁷Para ŵakerubi ŵakimanga, mikombero nayo yikimanga. Para ŵakerubi ŵakadukanga, mikombero nayo yikadukanga, pakuti mzimu wa ŵakerubi ukaŵa mu mikombero yira.

¹⁸Penepapo uchindami wa FUMU ukafumapo pa muryango wa Nyumba ya Chiuta ndipo ukaya kimilira pachanya pa ŵakerubi.

¹⁹Ŵakerubi ŵara ŵakatandaula mapapindo ghawo, ndipo nkhaŵawona ŵakudukira muchanya kufuma pa charu, pamoza na mawilu mu mphepete mwawo. Ŵakimilira pa muryango wa chipata cha ku mafumiro gha dazi kwa nyumba ya FUMU. Ndipo uchindami wa Chiuta wa Israele ukaŵa pa iwo.

²⁰Ŵakerubi aŵa nkhaŵapanikizga kuti ndi vyamoyo ivyo ine nkhaviwona mu mphepete mwa mronga wa Kebara, kusi kwa chizumbe cha ufumu wa Chiuta wa Israele.

²¹Mukerubi waliyose wakaŵa na visko vinayi na mapapindo ghanayi, ndipo kusi kwa mapapindo ghawo mukaŵa chinthu icho chikaŵa nga ndi mawoko gha munthu.

²²Visko vyawo vikaŵa nga ndi ivyo nkhaviwona ku mronga wa Kebara. Vyose vikendanga nyoronyoro kurazga kunthazi.