Read new_tumbuka_bible Ezekiyele 11 Bible Online

Ezekiyele 11 - new_tumbuka_bible bible

Ezekiyele 11

¹Mzimu wa FUMU ukandinyamulira muchanya na kundiyeghera ku chipata cha ku mafumiro gha dazi kwa Nyumba ya Chiuta. Pa muryango wakhe pakaŵa ŵanthu 25, ndipo mukati mwawo nkhawona ŵarongozgi ŵa ŵanthu aŵa: Yaazaniya mwana wa Azuru na Pelatiya mwana wa Benaya.

²FUMU yikati kwa ine, “Iwe mwana wa munthu, ŵanthu aŵa ndiwo ŵakwata na kupereka urongozgi uheni mu msumba.

³Iwo ŵakuti, ‘nyengo ya kuzengera zinyumba yindakwane. Msumba uwu ndi chiŵiya pa moto ndipo ise tili nyama mu chiŵiya.’

⁴Ntheura iwe mwana wa munthu uchime kuŵasuska iwo. Uchime kwambula kutondeka.”

⁵Mzimu wa FUMU ukiza pa ine ndipo ukandiphalira kuyowoya kuti, “FUMU yikuti, ‘Ivyo imwe ŵaIsraele mukughanaghana mu mitima yinu, Ine nkhuvimanya’.

⁶Imwe mwakoma ŵanthu ŵanandi mu msumba ndipo misewu yazura na vitanda.”

⁷“Ntheura FUMU Chiuta wakuti, ‘Vitanda vya ŵanthu ivyo imwe mwaviŵika mu msumba ndi nyama nadi, ndipo msumba ndi chiŵiya nadi, kweni mwizamkuwuskikamo mukati mu msumba.’ ”

⁸FUMU Chiuta wakuti, “Imwe mukopa nkhondo, kweni ine nditi ndize na nkhondo pa imwe.

⁹Ine nditi ndimuwuskanimo mukati mu msumba na kumuperekani mu mawoko gha ŵamitundu awo ŵamkumulangani.

¹⁰Imwe mwizamkukomeka mu nkhondo ndipo ine ndizamkupereka weruzgi wane mu charu chinu cha Israele. Penepapo ndipo imwe mwizamkumanya kuti ine ndine FUMU.

¹¹Ntheura msumba uwu kuti wizamkumuvikirirani imwe chara nga ndi umo chiŵiya chikuchitira na nyama. Ine ndamkupereka weruzgi wane mu charu chinu cha Israele.

¹²Pamanyuma mwamkumanya kuti ine ndine FUMU, pakuti mundapulikire vilayizgo vyane nanga ndi marango ghane. Kweni imwe mukuchita kwakuyana na maluso gha ŵamitundu awo ŵamuzingirizgani.”

¹³Apo nkhaŵa ndichali kuchima, Pelatiya mwana wa Benaya wakafwa. Penepapo ine nkhawa pasi kavunama ndipo nkhalira na mazgu ghakuru, nkhati, “Mwe FUMU Chiuta, kasi ntheura ndimo muti mumarirenge ŵaIsraele awo ŵakharako?”

¹⁴Mazgu gha FUMU ghakiza kwa ine ghakati,

¹⁵“Iwe mwana wa munthu, ŵabali ŵako, nadi ŵabali ŵako, ŵanyako ŵali mu umikori, na wose ŵa fuko la Israele. Awo sono ŵakukhara mu Yerusalemu ŵakuyowoya kuti, ‘Wose awo ŵali kutorekera ku umikori ŵali kutali na FUMU. Kwa ise charu ichi nchithu.’ ”

¹⁶“Ntheura uŵaphalire ŵamikori ŵanyako kuti: FUMU Chiuta wakuti, ‘Nangauli ndine nkhaŵatuma kutali mukati mu ŵamitundu na kuŵambininiskira mu vyaru vinyakhe, ndipouli kwa kanyengo nkhazgoka kuŵa malo ghawo ghakupatulika mu vyaru ivyo ŵakarutako.’ ”

¹⁷“Kwa chifukwa ichi uŵaphalire kuti: FUMU Chiuta wakuti, ‘Ndimusokororaninge kufuma mu ŵamitundu na kumuwunganyani kufuma ku vyaru vinyakhe ivyo mukambininiskikira. Pamanyuma nditi ndimupaniso charu cha Israele kuŵa chinu.’

¹⁸Para ŵamkwizaso mu charu chawo, ŵizamkuwuskamo vinthu vyose viheni na maukazuzi ghakhe ghose.

¹⁹Ndizamkuŵapa mtima umoza na kuŵika mzimu uphya mwa iwo. Ndizamkuwuskamo mtima unonono nga ndi libwe mwa iwo na kuŵapa mtima utechi nga ndi munofu,

²⁰mwakuti ŵendenge mu vilayizgo vyane na kusunga marango ghane na kughapulikira. Ŵati ŵaŵenge ŵanthu ŵane ndipo ine nditi ndiŵenge Chiuta wawo.

²¹Kweni awo ŵaŵika mtima wawo pakuchita vinthu vyawo viheni na maukazuzi ghawo, ŵizamkupataura pa vyose ivyo ŵachitanga.” Ntheura ndimo FUMU Chiuta wakuyowoyera.

²²Penepapo ŵakerubi pamoza na mikombero mu mphepete mwawo ŵakatandaula mapapindo ghawo na kwamba kuwuruka. Sono uchindami wa Chiuta wa Israele ukaŵa pachanya pa iwo.

²³Uchindami wa FUMU ukakwera kufumamo mukati mu msumba, ndipo ukiza kimilira pachanya pa phiri ilo liri ku mafumiro gha dazi kwa msumba.

²⁴Mu mboniwoni iyo nkhaŵa nayo kwizira mu Mzimu wa Chiuta, Mzimu ukandinyamura na kwiza nane ku ŵamikori mu charu cha Babuloni. Penepapo mboniwoni iyo nkhaŵa nayo yikazgeŵerekera waka.

²⁵Ntheura nkhaŵaphalira awo ŵakayorokera ku umikori vyose ivyo FUMU yikandirongora mu mboniwoni.