Read new_tumbuka_bible Ezekiyele 12 Bible Online

Ezekiyele 12 - new_tumbuka_bible bible

Ezekiyele 12

¹Mazgu gha FUMU ghakiza kwa ine ghakati,

²“Iwe mwana wa munthu, ukukhara mukati mu ŵanthu awo mbachigaruka. Iwo ŵali na maso ghakulaŵiskira, kweni kuti ŵakuwona kanthu chara. Ŵali na makutu ghakupulikira, kweni kuti wakupulika kanthu chara, pakuti ndi ŵanthu awo mbachigaruka.

³“Ntheura iwe, mwana wa munthu, urongezge katundu wako wa pa ulendo nga ndi wa awo ŵakuyorekera ku umikori. Wambe ulendo wako nga wamikori na muhanya uku ŵanthu ŵakukuwona. Ŵakuwonenge nga ndi wamikori kufuma ku malo ghako kuruta ku malo ghanyakhe. Panji ŵamkupulikiska nangauli mbachigaruka.

⁴Wamkufumiska katundu wako na muhanya uku ŵanthu ŵakuwona nga katundu wa uyo wakuruta ku umikori. Sono wamkuruta wekha na misemise uku ŵanthu ŵakuwona nga ndi umo ŵakuchitira ŵanthu awo ŵakuruta ku umikori.

⁵Uku ŵanthu ŵakuwona, udorore chiliŵa ndipo utore katundu wako na kufumira pa chidorozi ichi.

⁶Katundu wako umuŵike pa chiŵegha uku ŵanthu ŵakuwona ndipo wambe ulendo wako na ka mdima uku wabenekerera chisko chako mwakuti ureke kuwona pasi, pakuti ndakuzgora iwe kuŵa chimanyikwiro ku ŵanthu ŵa fuko la Israele.”

⁷Ine nkhachita nga ndi umo FUMU yikandilangulira. Na muhanya pakati nkhafumiska katundu wane wa pa ulendo kuruta ku umikori. Ku na mise nkhadorora chiliŵa na mawoko ghane. Nkhendanga mu mdima uku ndayegha katundu wane pa chiŵegha uku ŵanthu ŵakuwona.

⁸Machero ghakhe ku mulenje, mazgu gha FUMU ghakiza kwa ine ghakati,

⁹“Iwe mwana wa munthu, kasi fuko ili la chigaruka la Israele, lindakufumbe kuti, ‘Kasi ukuchitachi?’ ”

¹⁰Iwe uŵazgore kuti, “FUMU Chiuta wakuti, ‘Mazgu agha ghakuchima za karonga mu msumba wa Yerusalemu na fuko lose la Israele ilo liri pano.’

¹¹Uŵaphalire uti, ‘Iwe ndiwe chimanyikwiro kwa iwo.’ Icho iwe wachita ndicho chiti chichitikenge kwa iwo. Ŵati ŵayorekenge kuruta ku umikori.”

¹²“Karonga uyo wakuŵawusa wati wayeghe katundu wakhe pa chiŵegha uku kuchali mdima na kufuma. Chidorozi chimkupangika pa chiliŵa kuti wafumirepo ndipo wamkwenda uku wajara ku maso mwakuti wareke kuwona pasi.

¹³Kweni ine ndamkumuponyera ukonde wane ndipo wamkuwira mu chipingo chane. Nditi ndimutorere ku Babuloni, charu cha ŵaKaladeya, uko wamkufwira kwambula kuchiwona charu cheneicho.

¹⁴Wose awo ŵali kumuzingirizga iyo, ŵeneawo ŵakumovwira, ndiposo na wumba wose wa ŵasilikari ŵakhe ndamkuŵambininiskira kosekose. Pamanyuma ndamkuŵarondora na lupanga kuya kaŵakoma.”

¹⁵“Para ndaŵambininiska ku vyaru vyakupambanapambana vya ŵamitundu, ndipo ŵamkumanya kuti Ine ndine FUMU.

¹⁶Kweni ndamkurekapo ŵachoko waka awo ŵamkuponapo ku nkhondo, ku njara na ku nthenda yakofya mwakuti ŵaphalirenge vya maukazuzi ghawo ghose mukati mu ŵamitundu uko ŵamkuruta. Ntheura ŵamkumanya kuti Ine ndine FUMU.”

¹⁷Mazgu gha FUMU ghakiza kwa ine ghakati,

¹⁸“Iwe mwana wa munthu, uryenge chakurya chako uku ukumbwambwantha, ndipo umwenge maji uku ukutenthema pamoza na wofi.

¹⁹Ŵanthu ŵa mu charu uŵaphalire kuti, ‘FUMU Chiuta wakuti ku awo ŵakukhara mu Yerusalemu na mu charu cha Israele, “Ŵanthu ŵizamkurya chakurya chawo ŵali mu wofi na kumwa maji uku ŵakukweŵeka. Pakuti charu chawo chamkupokeka vyose ivyo vili mwenemumo chifukwa cha vivulupi ivyo ŵamkuchita wose awo ŵakukhara mwenemumo.

²⁰Misumba iyo yili na ŵanthu yizamkukhara mapopa, charu chizamkuŵa cha mayiyi. Penepapo mwizamkumanya kuti Ine ndine FUMU.” ’ ”

²¹Mazgu gha FUMU ghakiza kwa ine ghakati,

²²“Iwe mwana wa munthu, kasi ndi chinthanguni uli icho muli nacho mu charu cha Israele icho chikuti, ‘Mazuŵa ghakumara waka ndipo mboniwoni zose zikuzgoka kuŵa za waka.’

²³Uŵaphalire kuti, ‘FUMU Chiuta wakuti, “Ine nditi ndimarizge chinthanguni ichi, kuti chamkuyowoyekaso mu charu cha Israele chara.” Kweni uŵaphalire kuti, “Mazuŵa ghaneng'enera ndipo mboniwoni zose zili pafupi kufiskika.”

²⁴Pakuti kwamkuŵakoso mboniwoni ya utesi chara, nanga nkhuchima mu nthowa ya kumyamyatika chara mukati mu fuko la Israele.

²⁵Pakuti ine FUMU ndamkuyowoya mazgu agho ndingayowoya ndipo chamkuchitika kwambula kutondeka. Imwe ŵanthu ŵa fuko la chigaruka, mazgu ghane kuti ghaziwurikenge chara. Kweni mu nyengo ya umoyo winu ndamkuyowoya na kughafiska. Ntheura ndimo wakuyowoyera FUMU Chiuta.’ ”

²⁶Mazgu gha FUMU ghakiza kwa ine ghakati,

²⁷“Iwe mwana wa munthu, ŵa fuko la Israele ŵakuti, ‘Mboniwoni iyo wakuyiwona yizamkuchitika kunthazi kufuma sono. Iyo wakuchima za vinthu ivyo vyamkuchitika kunthazi.’ ”

²⁸Ntheura sono uŵaphalire uti, “FUMU Chiuta wakuti, ‘Mazgu ghane kuti ghamkuziwurika chara. Chose icho nkhuyowoya chamkufiskika. Ntheura ndimo wakuyowoyera FUMU Chiuta.’ ”