Read new_tumbuka_bible Ezekiyele 13 Bible Online

Ezekiyele 13 - new_tumbuka_bible bible

Ezekiyele 13

¹Mazgu gha FUMU ghakiza kwa ine ghakati,

²“Iwe mwana wa munthu, uchime pakususka nchimi za charu cha Israele izo sono zikuchima. Uziphalire izo zikuchima vya mu mtima wawo kuti, ‘Pulikani icho FUMU yikuyowoya.’ ”

³FUMU Chiuta wakuti, “Soka kwa nchimi izo zikuchimira mu kupusa zeneizo zikwata vya kuchima vyawo, kwambula kuwona mboniwoni kufumira kwa ine.

⁴Iwe Israele, nchimi zako zikuyana waka na ŵakambwe awo ŵakukhara mu mahami.

⁵Iwo kuti ŵali kurutako kuya kanozga malo agho ghali kupasuka chara nanga nkhuzenga chiliŵa cha ŵaIsraele mwakuti chiyimilire nganganga pa zuŵa la nkhondo ya FUMU.

⁶Iwo ŵakuyowoya mboniwoni za kupusika ndipo ivyo ŵakuroska nvyautesi. Iwo ŵakuti, ‘Agha ndi mazgu gha FUMU’ apo kuti ndi FUMU chara iyo yaŵatuma. Ndipouli ŵakugomezga kuti FUMU yiti yifiske mazgu ghawo.

⁷Asi mboniwoni yinu nja kupusika? Asi kuroska kwinu nkhwa utesi? Imwe mukuphara kuti ndi mazgu gha FUMU apo kuti ndine chara ndayowoya mazgu gheneagho.

⁸“Ntheura FUMU Chiuta wakuti, ‘Chifukwa chakuti mwayowoya mazgu ghakupusika, na kuroska vya utesi, nditi ndimikane namwe.’ Ntheura ndimo yikuyowoyera FUMU.

⁹Nditi ndiwuske woko lane kwimikana na nchimi izo mboniwoni zawo nzakupusika, ndipo kuroska kwawo nkhwa utesi. Izo kuti zamkusanga malo chara mu ungano wa ŵanthu ŵane. Mazina ghawo kuti ghalembekenge chara mu mundandanda wa fuko la Israele, nesi kunjiramo mu charu cha Israele. Ntheura ndipo zamkumanyira kuti ine ndine FUMU Chiuta.”

¹⁰“Nadi nchimi izi zapuruska ŵanthu ŵane pakuyowoya kuti kuli mutende apo mutende kuti ulipo chara. ŴaIsraele ŵali nga ndi ŵanthu awo ŵakuzenga chiliŵa chambula kukhora ndipo nchimi zikwiza na kuchiphaka utoto utuŵa.

¹¹Uŵaphalire awo ŵakuphaka chiliŵa na utoto utuŵa kuti chiliŵa chiti chiwenge. Kwamkurokwa vura yikuru, matalala ghamkuwa ndipo chimphupuru chamkuwuka.

¹²Para chiliŵa chikuwa, ŵamkuyowoya kuti, ‘Kasi utoto utuŵa uwo mukaphakanga uli nkhu?’ ”

¹³Ntheura FUMU Chiuta wakuti, “Mu ukari wane nditi nditume chimphupuru chikuru. Chifukwa cha ukari wane kwamkuŵa vura yikuru, ndipo matalala ghakurughakuru ghamkuwa na kugumura chiliŵa.

¹⁴Ndamkuchigumura chiliŵa icho muli kuchiphaka utoto utuŵa. Ndamkuchiwiskira pasi mwakuti lufura lwakhe luŵe pakweru. Para chawa, imwe mwamkumalira mukati mwakhe. Penepapo mwamkumanya kuti ine ndine FUMU.

¹⁵Ntheura ndimo ndamkufiskira ukari wane pa chiliŵa cheneichi na pa awo ŵakachiphaka utoto utuŵa. Ndamkuyowoya kwa imwe kuti, ‘Chiliŵa chawiskikira pasi ndipo awo ŵakachiphaka utoto utuŵa nawo ŵamara.

¹⁶Izi ndi nchimi za charu cha Israele izo zikachimanga za Yerusalemu ndipo zikawonanga mboniwoni za mutende apo mutende kuti ukaŵapo chara. Ntheura ndimo wakuyowoyera FUMU Chiuta.’ ”

¹⁷Ntheura FUMU yikati, “Sono iwe mwana wa munthu, razgira chisko chako ku ŵanakazi ŵakwinu uŵasuske, ŵeneawo ŵakuchima ivyo mitima yawo yikughanaghana. Uchime pakuŵasuska,

¹⁸ndipo uyowoye kuti FUMU Chiuta wakuti, ‘Soka ku ŵanakazi awo ŵakusonerera vinthumwa pa mawoko ghose na kusona vidiko vya ku mitu ya ŵanthu ŵa misinkhu yakupambanapambana mwakuti ŵathyenge mitima ya ŵanthu. Kasi muthyenge mitima ya ŵanthu ŵane mwakuti musungilire yinu?

¹⁹Mwandiyuyura ine panthazi pa ŵanthu ŵane chifukwa chakukhumba kupokera nyauti muchoko waka wakuzura mawoko ghinu ndiposo na tuvimenyu twa chakurya. Imwe mukukoma ŵanthu awo kuti ŵakwenera kufwa chara, ndipo mukuŵareka ŵamoyo ŵanthu awo kuti ŵakwenera kukhara ŵamoyo chara, pakuŵayowoyera mautesi ŵanthu ŵane awo ŵakupulikizga mautesi.’ ”

²⁰“Pa chifukwa ichi, FUMU Chiuta wakuti, ‘Nditi ndimikane navyo vinthumwa vyinu vya mu mawoko vyeneivyo mukukopera mitima ya ŵanthu nga mukukora tuyuni. Nditi ndiparure vinthumwa vyinu vya mu mawoko kuti ndithaske ŵanthu awo mukuŵakora nga ndi tuyuni.

²¹Nditi ndiparureso vidiko vyinu vya ku mitu yinu kuti ndithaske ŵanthu ŵane mu mawoko ghinu. Kuti ŵizamkuŵaso mu mawoko ghinu kuŵa nga ndi skoghi chara. Ntheura muti mumanye kuti ine ndine FUMU.

²²Chifukwa cha mautesi ghinu, mwagongoweska ŵanthu awo mbaweme ŵeneawo kuti nkhakhumba chara kuti ndiŵagongoweske. Ntheura mukukhozga muheni mwakuti ŵareke kuwerako ku nthowa zakhe ziheni na kuthaska umoyo wakhe.

²³Ntheura kuti muti muwoneso mboniwoni za utesi chara nesi kuroska. Ine nditi ndithaske ŵanthu ŵane kufuma mu mawoko ghinu, ndipo imwe mwamkumanya kuti ine ndine FUMU.’ ”