Read new_tumbuka_bible Ezekiyele 14 Bible Online

Ezekiyele 14 - new_tumbuka_bible bible

Ezekiyele 14

¹Ŵararaŵarara ŵanji ŵa charu cha Israele ŵakiza kwa ine na kukhara pasi panthazi pa ine.

²Ntheura mazgu gha FUMU ghakiza kwa ine ghakati,

³“Iwe mwana wa munthu, ŵanthu aŵa ŵaŵika mitima yawo pakusopa vikozgo ndipo ŵakudodoliska pa vinthu viheni ivyo viti viŵakhuŵazgenge. Kasi ine ndingazomerezga kuti ŵize kwa ine na kundifumba?

⁴Ntheura sono yowoya ku ŵanthu na kuŵaphalira kuti, ‘FUMU Chiuta wakuti, “MuIsraele waliyose uyo wakuŵika mtima wakhe pakusopa vikozgo na kudodoliska pa vinthu viheni ivyo viti vimukhuŵazgenge, ndipo wakwiza kwa nchimi, ine FUMU nditi ndimuzgore, zgoro ilo likwenerera vikozgo vyawo vinandi.

⁵Nditi ndichite cheneichi mwakuti ndikore mitima ya ŵaIsraele wose awo ŵali kupatukako kwa ine kuti ŵasopenge ŵangoza.” ’ ”

⁶“Ntheura uŵaphalire ŵaIsraele kuti FUMU Chiuta wakuti, ‘Rapani, muwereko kukusopa vikozgo kwinu. Muwezgeko maso ghinu ku kudodoliska ku maukazuzi ghinu ghose.’ ”

⁷“Para muIsraele waliyose panji mulendo uyo wakukhara mu charu chinu wakujipatulako kwa ine ndipo wakuŵawika mtima wakhe pakusopa ŵangoza na kudodoliska pa vinthu viheni ivyo viti vimukhuŵazgenge, usange wakwiza kafumba kwa ine kwizira mu nchimi, ine FUMU nditi ndimuzgore ine ndekha.

⁸Ine nditi ndimikane nayo munthu wa ntheura. Nditi ndimuzgore kuŵa chimanyikwiro na chimuhoyere ndipo nditi ndimuwuskemo mukati mu ŵanthu ŵane. Ntheura muti mumanye kuti ine ndine FUMU.

⁹“Usange nchimi yapusikika na kuchima, ine FUMU ndine ndamupusika. Ine nditi ndinyoroskere woko lane na kwimikana nayo ndipo nditi ndimukome na kumuwuskako mukati mu ŵanthu ŵane.

¹⁰Wose ŵaŵiri ŵati ŵalangike, nchimi na uyo wakufumbako kwa iyo.

¹¹Mwa ntheura, kwamkuŵavye muIsraele na yumoza uyo wamkupatukako kwa ine. Kwamkuŵavye na yumoza uyo wakujikazuzga na kwananga kwakhe. Iwo ŵati ŵaŵenge ŵanthu ŵane ndipo ine nditi ndiŵenge Chiuta wawo.” Ntheura ndimo wakuyowoyera FUMU Chiuta.

¹²Mazgu gha FUMU ghakiza kwa ine ghakati,

¹³“Iwe mwana wa munthu, usange charu chandinangira pakureka kugomezga ine, nkhunyoroskera woko lane pa icho na kwimikana nacho na kuchepeska vyakurya vyakhe. Nkhutuma njara mu charu cheneicho na kukomamo ŵanthu na vyakuŵeta.

¹⁴Nanga ŵangaŵa ŵanthu ŵatatu aŵa, Nowa, Daniyele na Yobe usange ŵaŵenge pano, mphanyi ŵanguthaska waliyose chara, kweni umoyo wa iwo ŵekha kwizira mu urunji wawo. Agha ndi mazgu agho FUMU Chiuta wakuyowoya.”

¹⁵“Nyengo zinyakhe ndingatuma vikoko vya ku thengere kuŵa vikari na kukoma ŵanthu mpaka charu chizgoke mapopa mwakuti kuŵavye na munthu wakuporotamo mu charu chifukwa cha vikoko vira.

¹⁶Nadi nkhurapa, yikuti FUMU Chiuta wa moyo, nangauli ŵanthu ŵatatu ŵara ŵaŵenge mwenemumo mphanyi ŵanguthaska chara ŵana ŵawo ŵanarume panji ŵanakazi. Iwo pera ndiwo mphanyi ŵanguthaskika, ndipo charu mphanyi changukhara mapopa.”

¹⁷“Usange ndingiza na nkhondo mu charu na kulangula kuti yijumphemo mu charu chenechira na kukoma ŵanthu na viŵeto,

¹⁸ndipo nanga ŵanthu ŵatatu aŵa ŵaŵenge mwenemumo, nadi nkhurapa, ine FUMU Chiuta kuti mphanyi ŵanguthaska chara ŵana ŵawo ŵanarume panji ŵanakazi. Iwo ŵekha pera mphanyi ndiwo ŵanguthaskika.”

¹⁹“Panji usange nditumenge nthenda yakofya mu charu chenechira na kurongora ukari wane wose pamoza na kuthiska ndopa mu charu chenechira pakukoma ŵanthu na viŵeto,

²⁰nadi nkhurapa, ine FUMU Chiuta, nanga waŵenge Nowa, Daniyele na Yobe mu charu chenechira mphanyi wanguthaska chara mwana wakhe mwanarume panji mwanakazi. Mu urunji wawo mphanyi ŵangujithaska ŵekha, munyakhe chara.”

²¹“FUMU Chiuta wakuti, ‘Kasi kwamkuŵa uli chomene mu msumba wa Yerusalemu para ndamkutuma vilengo vyane vinayi, nkhondo, njara, vikoko vikari na nthenda yakofya kuti vikome ŵanthu na viŵeto!

²²Ndipouli ŵanji ŵamkuŵapo awo ŵamkuponapo mu charu chenechira awo ŵamkuyezga kuthaska ŵana ŵawo ŵanarume panji ŵanakazi. Ŵeneaŵa mukaŵalaŵisiske para ŵamkwiza kwa imwe, kuti muwone mendero na machitiro ghawo. Mwamkusanguruskika chifukwa cha chilango icho ndapereka mu msumba wa Yerusalemu na vyose ivyo ndachita mwenemumo.

²³Mwamkusanguruskika nadi para mwamkuwona mendero ghawo na machitiro ghawo ndipo mwamkupanizga kuti ivyo nkhachita mu Yerusalemu vikaŵa vyambula chifukwa chara.’ ” Ntheura ndimo wakuyowoyera FUMU Chiuta.