Read new_tumbuka_bible Ezekiyele 16 Bible Online

Ezekiyele 16 - new_tumbuka_bible bible

Ezekiyele 16

¹Mazgu gha FUMU ghakiza kwa ine ghakati,

²“Iwe mwana wa munthu, rongora ŵanthu ŵa mu Yerusalemu ukazuzi uwo ŵachita.

³Uŵaphalire ŵanthu ŵa mu Yerusalemu kuti FUMU Chiuta wakuti, ‘Kanani ndi charu cha ŵawiskemwe na malo uko ŵakababikira. Wiskemwe wakaŵa Amori ndipo nyinamwe wakaŵa muHiti.

⁴Pa zuŵa ilo ukababikira, mumbwera wako kuti ukadumulika chara, ndipo kuti ukageziskika na maji chara kuti uŵe wakutowa. Kuti ŵakakuphaka na muchere nesi kuvungirizga na salu chara.

⁵Pakaŵavye na yumoza uyo wakaŵa na chitima na iwe kuti wakuchitire vinthu vyeneivi, nesi kuŵa na chiwuravi na iwe. Mu malo mwakhe ukaponyeka ku thengere chifukwa pa zuŵa ilo ukababikira ukatinkhika.’ ”

⁶Para nkhajumphanga pafupi na iwe, nkhakuwona ukukunkhura mu ndopa zako ndipo, uku ukukunkhura mu ndopa zako, nkhati kwa iwe, “Uti ufwenge chara.”

⁷Nkhachita kuti ukure nga ndi mbuto ya mu munda. Iwe ukakura na kuŵa mutali. Ukaŵa murara ndipo maŵere ghako ghakafikapo. Sisi lako likaŵa litali, kweni ukaŵa nkhule na wambula kuvwara.

⁸“Para nkhajumphaposo pafupi na iwe, nkhakuwona kuti ukaŵa pa musinkhu wakutengwera. Ntheura nkhakudikiska chakuvwara chane ndipo nkhabisa unkhule wako. Nkhakujalira na kuchita phangano na iwe ndipo ukaŵa wane.” Ntheura ndimo FUMU Chiuta wakuyowoyera.

⁹“Penepapo nkhakugeziska na maji na kusuka ndopa zako na kukuphakazga mafuta.

¹⁰Nkhakuvwarika salu yakuroŵeka na skapato ya chikumba. Nkhakuvwarikaso salu ya bafuta na ya siliki.

¹¹Nkhakutozga na vitoweskero. Nkhakuvwarika makoza mu mawoko ghako na majuda mu singo yako.

¹²Nkhakuvwarika mphete mu mphuno zako, ndewerewe mu makutu ghako, na mphumphu yakutowa ku mutu wako.

¹³Ntheura ndimo ukatozgekera na golide na siliva. Vyakuvwara vyako vikaŵa vya bafuta muweme na vya siliki ndipo salu yako yikaŵa yakuroŵeka makora. Ukarya chakurya cha ufu wakunyiririka ndiposo na uchi na mafuta. Ukaŵa wakutowa chomene ndipo ukakwezgeka kuŵa fumukazi.

¹⁴Lumbiri lwa kutowa kwako lukatandazgika mu mafuko ghose gha pasi. Kukaŵa kutowa kuweme chomene chifukwa cha uchindami uwo nkhakupa. Ichi ndicho FUMU Chiuta wakuyowoya.”

¹⁵Kweni ukagomezga kutowa kwako ndipo chifukwa cha kumanyikwa kwako ukamba kuchita uzaghali na kujisaska ku waliyose uyo wakajumphanga pafupi na iwe.

¹⁶Ukatora malaya ghako ghanyakhe na kutoweskera malo ghako gha pachanya ghakusoperako kuti uchitirengemo uzaghali wako. Chinthu ichi kuti chili kuchitikapo na kale chara nesi kuti chizamkuchitikapo.

¹⁷Ukatoraso vitowelo vyako viweme vya golide wane na vya siliva wane ivyo nkhakupa na kupanga vikozgo vya ŵanarume ndipo na vyeneivi ukachita uzaghali.

¹⁸Ukatora malaya ghako ghakuroŵeka makora na kuvivwarika ndipo ukapereka mafuta na vyakununkhira vyane kwa vyeneivi.

¹⁹Nkhakupaso chakurya chane icho chikaŵa ufu wakunyiririka, mafuta, na uchi. Iwe ukavipereka kwa iwo kuŵa vya sungu liweme. Ntheura ndimo FUMU Chiuta wakuyowoyera.

²⁰Ukatora ŵana ŵako ŵanarume na ŵanakazi awo ukababira ine na kuŵapereka kuŵa sembe ku vikozgo vyeneivi kuti chiŵe chakurya chawo. Kasi kuchita uzaghali kwako uko ukachitanga kukaŵa kuchoko,

²¹kuti mpaka ukome ŵana ŵane na kuŵapereka kwa vyeneivi kuŵa sembe yakocha?

²²Mu maukazuzi ghose agha na uzaghali wako, kuti ukakumbuka mazuŵa gha uwukirano wako chara apo ukaŵa nkhule wambula kuvwara na kukunkhura mu ndopa zako.

²³FUMU Chiuta wakuti, “Soka kwa iwe! Soka kwa iwe, pamanyuma pa maukazuzi ghako ghose agha.

²⁴Iwe ukajizengera kavuŵa ndiposo na malo gha pachanya mu maluwugha ghose.

²⁵Ukazenga ŵakavuŵa pa malo gha pachanya ghose mu misewu ya mu misumba uko ukakazuzgiranga utozi wako. Ukajisaskanga kwa waliyose uyo wakajumphangapo ndipo ukandaniska mauzaghali ghako.

²⁶Iwe ukachita uzaghali na ŵaEguputo, ŵazengezgani ŵako ŵamakhumbiro ghaheni, ndipo ukandavyira ku ukari chifukwa cha kwandaniska mauzaghali ghako.

²⁷Pa chifukwa ichi nkhanyoroska nkhongono yane kwimikana na iwe pakuchefyako charu chako. Nkhakupereka ku makhumbiro gha ŵarwani ŵako ŵaFilisiti awo ŵakachita soni chifukwa cha nkharo zako za ukazuzi.”

²⁸“Ukachitaso uzaghali na ŵaAsiriya, chifukwa ukakhorweskeka chara. Ndipouli, nanga ukachita ntheura, napo kuti ukakhorweskeka chara.

²⁹Ukandaniskaso uzaghali wako nanga ndi ku ŵanthu ŵa ku Babuloni, ŵanthu ŵa malonda. Ndipouli nanga kungaŵa ku ŵeneaŵa, kuti ukakhorweskeka chara.”

³⁰FUMU Chiuta wakuti, “Uli wakutomboroka pa makhumbiro ghaheni pakuti wachita vyose vyeneivi nga ndi mwanakazi muzaghali wambula soni.

³¹Iwe wajizengera ŵakavuŵa mu misewu yose na mu malo gha pachanya mu maluwugha ghose. Ndipouli kuti ukaŵa nga ndi mwanakazi muzaghali chara, chifukwa ukapokeranga malipiro chara.

³²Muwoli muzaghali iwe. Ukutemwa ŵalendo kuruska mufumu wako.

³³Ŵanarume ŵakupereka vyawanangwa ku ŵanakazi wose ŵazaghali, kweni iwe ndiwe ukupereka vyawanangwa ku ŵakutemweka wose. Ukaŵapanga vimbundi kuti ŵizenge kufuma uku na uku mwakuti uchitenge nawo uzaghali.

³⁴Ntheura ukapambana na ŵanakazi ŵanyakhe mu uzaghali wako, pakuti pakaŵavye na yumoza uyo wakakunyengereranga kuti wachite nawe uzaghali. Iwe ndiwe ukaperekanga njombe kwa iwo, apo iwo kuti ŵakakupanga njombe yiliyose chara. Nadi, iwe ukapambana na ŵanakazi ŵanyakhe.”

³⁵“Ntheura, muzaghali iwe, pulika icho FUMU yikuyowoya.”

³⁶FUMU Chiuta wakuti, “Chifukwa chakuti iwe ukavura kwambula kuŵa na soni, kurongora pakweru nkhule yako pakuchita uzaghali na ŵakutemweka ŵako, ŵangoza ŵako wose ŵa ukazuzi, na kukoma ŵana ŵako kuŵapereka kuŵa sembe ku ŵangoza,

³⁷ntheura nditi ndiwunganye ŵakutemweka ŵako wose, ŵeneawo ukachitanga nawo virere, wose awo ukaŵatemwa na wose awo ukaŵatinkha. Ndamkuŵawunganya kufumira ku dera lirilose, kwimikana nawe, ndipo ndamkukuvura nkhule yako kuti ŵayiwone.

³⁸Ndamkukulanga nga ndi umo nkhuperekera chilango pa mwanakazi uyo wali na mrandu wa uleŵe na wa kuthiska ndopa, ndipo mu sanje zane na mu ukari wane ndamkukweruzga iwe chifukwa cha kuthiska ndopa.

³⁹Ndamkukupereka mu mawoko gha ŵakutemweka ŵako, ndiwo ŵamkuwiskira pasi ŵakavuŵa ŵako na kubwangandulira pasi malo ghako gha pachanya. Ŵamkukuvura vyakuvwara vyako, ŵamkupoka vitowelo vyako viweme, na kukusida wa nkhule.

⁴⁰Ŵamkukutorera wumba wa ŵanthu kwimikana nawe ndipo iwo ŵamkukudina na mawe na kukudumula na malupanga kuŵa tuchokotuchoko.

⁴¹Ndipo ŵamkocha nyumba zako na moto na kukweruzgira panthazi pa ŵanakazi ŵanandi. Ndamkukurekeska kuchita uzaghali ndipo kuti wamkuperekaso njombe chara.

⁴²Ndimo ndamkufumiskira ukari wane pa iwe, ndipo sanje yane pa iwe nayo yamkuwukapo, ndamkukhara chete, kuti ndamkuŵaso mukari chara.”

⁴³FUMU yikuti, “Iwe ulije na kukumbuka mazuŵa gha uwukirano wako, kweni wandikaripiska na vinthu viheni vyose ivi. Ntheura mrandu wa ivi ndamkuŵika pa iwe wamwene. Asi iwe ndiwe wachita vya ukazuzi ivi kusazgirapo pa maukazuzi ghako ghose?”

⁴⁴“Nadi yose uyo wakutemwa kuyowoya zintharika wamkukunena iwe kuti, ‘Nga ndi umo waliri nyina ndimo waliriso na mwana wakhe mwanakazi.’

⁴⁵Nadi ndiwe mwana wakhe mwanakazi, mweneuyo wakatinkha mufumu wakhe na ŵana ŵakhe. Iwe ndiwe nadi munung'una wa ŵanung'una ŵako awo ŵakatinkha ŵafumu ŵawo na ŵana ŵawo. Nyoko wakaŵa muHiti ndipo wuso wakaŵa muAmori.

⁴⁶Mukuru wako ndi Samariya, mweneuyo wakakharanga na ŵana ŵakhe ŵanakazi ku mpoto kwa iwe. Ndipo munung'una wako, mweneuyo wakakharanga ku mwera kwako, ndi Sodomu na ŵana ŵakhe ŵanakazi.

⁴⁷Ndipouli kuti ukakhorwa chara kurondezga mendero ghawo, nanga nkhuchita kwakuyana na maukazuzi ghawo, mu nyengo yichoko waka ukaŵa muheni chomene kuruska iwo mu mendero ghako ghose.”

⁴⁸FUMU Chiuta wakuti, “Nkhurapa nadi kuti, ‘Munung'una wako Sodomu na ŵanthu ŵakhe ŵalije kuchita nga ndiwe na ŵanthu ŵako.

⁴⁹Wona, uwu ndiwo ukaŵa mrandu wa munung'una wako Sodomu, iyo na ŵanthu ŵakhe ŵakaŵa ŵakujikuzga, mu usambazi unandi wa vyakurya, na kufwasa, kweni kuti wakawovwira chara ŵakavu na ŵasokwano.

⁵⁰Ŵakaŵa ŵakujikuzga na ŵakuchita vya ukazuzi panthazi pane, ntheura nkhaŵawuskapo apo nkhati ndachiwona.

⁵¹Nanga ndi ŵaSamariya ŵalije kuchitapo hafu wa zakwananga zako, iwe wachita maukazuzi ghanandi kuruska iwo. Waŵazgora ŵanung'una ŵako kuŵa ŵarunji kuruska iwe, na mauheni agho wachita.

⁵²Ndipo iwe wamwene, soni ziti zikukore, pakuti pa kweruzga waŵarunjiska ŵanung'una ŵako. Chifukwa cha zakwananga zako izo ukachitira mu ukazuzi kuruska iwo, ŵana ŵanyako mbarunji kuruska iwe. Ntheura ukhozgeke soni iwe nawe chifukwa waŵazgora ŵana-ŵanyako kuŵa nga mbarunji.’ ”

⁵³“Ndiŵawezgerenge mauweme ghawo, uweme mu charu cha Sodomu na ŵanthu ŵakhe, na uweme wa charu cha Samariya na ŵanthu ŵakhe, ndiposo nditi ndikuwezgerenge mauweme ghako pamoza na ghawo,

⁵⁴kuti ulengeskekenge na kukhozgeka soni chara chifukwa cha vyose ivyo wavichita, pakuti wazgoka kuŵa chisangurusko kwa iwo.

⁵⁵Kweni ŵana ŵanung'una, ŵa mu charu cha Sodomu na ŵanthu ŵakhe, ŵamkuwerera mu kaŵiro kawo ka kale; ndipo para Samariya pamoza na ŵanthu ŵakhe ŵamkuwerera ku kaŵiro kawo ka kale, ndipo iwe na ŵanthu ŵako mwamkuwerera mu kaŵiro kinu ka kale.

⁵⁶Asi munung'una wako, Sodomu, wakaŵa chidokoni mu mlomo wako mu zuŵa la kujikuzga kwako,

⁵⁷apo uheni wako ukaŵa undavumbukwe? Kweni sono wazgoka kuŵa nga ndiyo. Waŵa chinthu chakusunjizgika ku ŵaAramu, na ku ŵazengezgani ŵakhe wose, ndiposo na ku ŵaFilisiti, na awo ŵali kukuzingirizga iwe, ŵeneawo ŵakukwerura.

⁵⁸Sono nawe wavimyantha chifukwa cha kurakaraka kwako na maukazuzi ghako.” Ntheura ndimo yikuyowoyera FUMU.

⁵⁹Inya, FUMU Chiuta wakuti, “Nditi ndikuchitire nga ndi umo wachitira, wamweneiwe wayuyura chirapo pakuswa phangano.

⁶⁰Ndipouli ndamkukumbuka phangano lane na iwe mu mazuŵa ghako gha uwukirano, ndiposo ndamkuchita nawe phangano la muyirayira.

⁶¹Ntheura wamkukumbuka mendero ghako, na kukhozgeka soni para nkhuŵatora ŵana ŵanyako, mukuru wako na munung'una wako, na kuŵapereka kwa iwe nga ŵana ŵako, nangauli kuti ndi chifukwa cha phangano na iwe chara.

⁶²Nditi ndimike phangano pakati pa iwe na ine, ndipo wamkumanya kuti ine ndine FUMU.

⁶³Para ndakugowokera vyose ivyo uli kuchita, wizamkukumbuka na kukhozgeka soni na kureka kujulaso mlomo wako chifukwa cha kuŵa soni.” Ntheura ndimo FUMU Chiuta wakuyowoyera.